നടന്‍ ചെമ്ബന്‍ വിനോദ് ജോസ് വിവാഹിതനായി. കോട്ടയം സ്വദേശിനിയായ മറിയം തോമസാണ് വധു. സൈക്കോളജിസ്റ്റാണ് മറിയം. സമൂഹമാധ്യമങ്ങളിലൂടെ താരം തന്നെയാണ് ഇക്കാര്യം അറിയിച്ചത്. ജസ്റ്റ് മാരീഡ് എന്നു കുറിച്ച്‌ ഇരുവരും ഒന്നിച്ചുള്ള ചിത്രം താരം തന്റെ ഇന്‍സ്റ്റയില്‍ ഷെയര്‍ ചെയ്തിരിക്കുകയാണ് ഉണ്ടായത്. ചിത്രം പങ്കുവച്ചത് താരം തന്നെയാണ്. ഫേസ്ബുക്കിലും ഇന്‍സ്റ്റയിലുമൊക്കെ നിരവധി ആരാധകര്‍ അദ്ദേഹത്തിന് ആശംസകളുമായി രംഗത്ത് വന്നിട്ടുണ്ട്.

ചെമ്ബന്‍ വിനോദിന്‍റെ രണ്ടാം വിവാഹമാണിത്. 2010ല്‍ ലിജോ ജോസ് പെല്ലിശ്ശേരി സംവിധാനം ചെയ്ത നായകന്‍ എന്ന ചിത്രത്തിലൂടെയാണ് ചെമ്ബന്‍ വിനോദ് മലയാള സിനിമയിലേക്ക് വരുന്നത്. ആ ചിത്രത്തിന് ശേഷം ആമേന്‍, ഈമയൗ, ജല്ലിക്കട്ട്, പെറിഞ്ചു മറിയം ജോസ് തുടങ്ങിയ നിരവധി ചിത്രങ്ങളിലൂടെ പ്രേക്ഷകരുടെ പ്രിയങ്കരനായി മാറിക്കഴിഞ്ഞിരുന്നു.

2018 ല്‍ ഈമയൗവിലൂടെ ഗോവ രാജ്യാന്തര ചലച്ചിത്രമേളയില്‍ മികച്ച നടനായി മാറി. ലിജോ ജോസ് സംവിധാനം ചെയ്ത അങ്കമാലി ഡയറീസിന്റെ രചനയും നിര്‍വ്വഹിച്ചത് ചെമ്ബനായിരുന്നു. ഇതിനിടെ നിര്‍മ്മാണത്തിലും ചെമ്ബന്‍ കൈ വച്ചിട്ടുണ്ട്. ട്രാന്‍സ്, ബിഗ് ബ്രദര്‍ എന്നിവയാണ് താരത്തിന്റേതായി ഈ വര്‍ഷം റിലീസ് ചെയ്ത ചിത്രങ്ങള്‍.