കാലം മഞ്ജു വാര്യറില്‍ വരുത്തിയ മാറ്റങ്ങള്‍ തുറന്നു പറയുകയാണ് സംവിധായകന്‍ സത്യന്‍ അന്തിക്കാട്. പ്രമുഖ ഓണ്‍ലൈന് നല്‍കിയ അഭിമുഖത്തിലാണ് മഞ്ജു മനസ് തുറന്നത്.
മഞ്ജുവിന്റെ ആദ്യ വരവില്‍ സല്ലാപം കഴിഞ്ഞ് അഭിനയിച്ചത് എന്റെ തൂവല്‍കൊട്ടാരത്തിലായിരുന്നു. രണ്ടാമത്തെ വരവിലും രണ്ടാമത് അഭിനയിച്ചത് എന്റെ സിനിമയില്‍ തന്നെ. കാലം കാത്തുവെച്ച ആകസ്മികതയാണിത്. തൂവല്‍കൊട്ടാരത്തില്‍ അഭിനയിക്കുമ്പോള്‍ പതിനാറു പതിനേഴ് വയസ്സേ മഞ്ജുവിന് ഉള്ളൂ. സിനിമയെ അത്ര ഗൗരവമായി കാണാത്ത കളിക്കുട്ടിയായിരുന്നു മഞ്ജു. പറഞ്ഞു കൊടുക്കുന്ന രംഗങ്ങള്‍ കൃത്യമായി ചെയ്യും എന്നല്ലാതെ സംശയങ്ങളൊന്നും ചോദിക്കില്ലായിരുന്നു. എങ്കിലും മഞ്ജുവിന്റെ അഭിനയപാടവം തിരിച്ചറിഞ്ഞ സിനിമയായിരുന്നു തൂവല്‍കൊട്ടാരം. 
അതില്‍ സുകന്യയോടൊപ്പം ഒരു നൃത്തരംഗം ഉണ്ടായിരുന്നു. മഞ്ജുവിന്റെ കഥാപാത്രമായ ദേവപ്രഭ സുകന്യയുടെ കഥാപാത്രത്തേക്കാള്‍ ഒരുപടി താഴേ നില്‍ക്കണം. പ്രേക്ഷകര്‍ കാണുമ്പോള്‍ സുകന്യയുടെ നൃത്തമാണ് നല്ലതെന്ന് പറയണം. പക്ഷെ ഷൂട്ടിങ്ങിന്റെ സമയത്ത് എത്ര തവണ ചെയ്തിട്ടും മഞ്ജുവിന്റെ നൃത്തമായിരുന്നു മികച്ചത്. സുകന്യ കലാക്ഷേത്രയില്‍ നിന്നും ഗോള്‍ഡ് മെഡലൊക്കെ നേടിയ അനുഭവസമ്പത്തുള്ള നടിയാണ്, എന്നിട്ടും അവരേക്കാള്‍ മികച്ചു നിന്നത് പുതുമുഖനടിയായ മഞ്ജുവായിരുന്നു. അവസാനം കലാമാസ്റ്റര്‍ക്കും എനിക്കും പറയേണ്ടി വന്നൂ മഞ്ജൂ കുറച്ച് മോശമായി അഭിനയിക്കൂ എന്ന്. ശോഭന കഴിഞ്ഞാല്‍ മലയാളത്തില്‍ ഇത്ര ഭംഗിയായി നൃത്തം ചെയ്യുന്ന അഭിനേത്രി മഞ്ജുവായിരിക്കും.

രണ്ടാംവരവിനു മുന്നോടിയായി മഞ്ജു ഗുരുവായൂരില്‍ അവതരിപ്പിച്ച നൃത്തം ഞാന്‍ കാണാന്‍ പോയി. അന്നു പലരും പറഞ്ഞു എന്റെ സിനിമയിലൂടെയാണ് മഞ്ജു തിരിച്ചു വരുന്നതെന്നൊക്കെ. പക്ഷെ ഞാന്‍ മഞ്ജുവിനോട് പറഞ്ഞിട്ടുണ്ടായിരുന്നു മഞ്ജുവിനെവച്ച് വെറുതെ ഒരു സിനിമ ചെയ്യില്ല. മഞ്ജുവിനു പറ്റിയ കഥ എന്നു വരുന്നോ അന്നു മാത്രമേ സിനിമ ചെയ്യൂ എന്ന്. 
എന്നും എപ്പോഴുമിലെ അഡ്വ: ദീപ മഞ്ജുവിന് ചേര്‍ന്ന കഥാപാത്രമായിരുന്നു. ഞാന്‍ തൂവല്‍കൊട്ടാരത്തില്‍ കണ്ട കളിക്കുട്ടിയായിരുന്നില്ല എന്നും എപ്പോഴുമില്‍ അഭിനയിക്കാന്‍ വന്ന മഞ്ജുവാര്യര്‍. പണ്ട് ഒരു സീന്‍ ചെയ്യുന്നതിനു മുമ്പ് പ്രത്യേകിച്ച് സംശയങ്ങളൊന്നും മഞ്ജു ചോദിക്കില്ലായിരുന്നു. ഇന്ന് മഞ്ജു സംശയങ്ങള്‍ ചോദിക്കും, കൂടുതല്‍ നന്നാക്കേണ്ട ഭാഗങ്ങള്‍ പറയാതെ തന്നെ നന്നാക്കും. എനിക്ക് മഞ്ജുവിനെ അധികം തിരുത്തേണ്ട സാഹചര്യങ്ങളൊന്നും വന്നിട്ടില്ല. ജീവിതാനുഭവം മഞ്ജുവിനെ ഒരുപാട് പക്വമതിയാക്കി. അന്ന് വലിയ വായനയൊന്നും മഞ്ജുവിനില്ലായിരുന്നു, ഇന്ന് വായനയില്‍ നിന്നു കിട്ടിയ അറിവും ജീവിതാനുഭവവും എല്ലാം ചേര്‍ന്നതോടെ തഴക്കം വന്ന ഒരു അഭിനേത്രിയേയാണ് മഞ്ജുവില്‍ കണ്ടത്. 

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha