ബിഗ് ബോസ് മലയാളം നാല് ഗ്രാൻഡ് ഫിനാലെയിൽ എത്തി നിൽക്കുകയാണ്. ആറ് മത്സരാർത്ഥികളും ആവേശത്തിലാണ്. അവരെപ്പോലെ അവരുടെ കുടുംബാംഗങ്ങളും അവരുടെ നേട്ടങ്ങളിലും കഠിനാധ്വാനത്തിലും അഭിമാനിക്കുന്നു. അതിനിടയിൽ ഫൈനലിസ്റ്റുകൾക്ക് സന്തോഷകരമായിട്ടായിരുന്നു കഴിഞ്ഞ ദിവസം ബിഗ് ബോസിൽ നിന്ന് പുറത്തുപോയ മത്സരാർഥികൾ ബിഗ് ബോസ് വീട്ടിലേക്ക് തിരികെയെത്തിയത്. ബിഗ് ബോസിലെ സംഘർഷഭരിതമായ മുഹൂർത്തങ്ങൾക്കെല്ലാം ആശ്വാസമെന്ന കണക്കേയാണ് പുറത്തുപോയ മത്സരാർഥികൾ വന്നപ്പോൾ സംഭവിച്ചത്. ഡോ.റോബിൻ തിരികെയെത്തിയപ്പോൾ ഏറ്റവും കൂടുതൽ സന്തോഷിച്ചവരിൽ ലക്ഷ്മിപ്രിയയും ദിൽഷയും ഉണ്ടായിരുന്നു. കെട്ടിപ്പിടിച്ചാണ് റോബിനെ ലക്ഷ്മിപ്രിയ സ്വീകരിച്ചത്. ഇപ്പോഴിത പരസ്പരം വേദനിച്ചതിനേക്കുറിച്ച് തുറന്നു പറയുകയാണ് ലക്ഷ്മിപ്രിയയും റോബിനും. പുറത്താക്കപ്പെട്ടതിന് ശേഷം ഏതാനും ദിവസങ്ങൾ ചെലവഴിച്ച സീക്രട്ട് റൂമിലിരുന്ന് താൻ ലക്ഷ്മിപ്രിയയുടെ കരച്ചിൽ കേട്ടെന്നായിരുന്നു റോബിൻ പറഞ്ഞത്. റോബിൻ പുറത്തായതിലുള്ള സങ്കടത്തിലായിരുന്നു ലക്ഷ്മിപ്രിയ. ശബ്ദം ഇടറിയാണ് റോബിൻ ഇക്കാര്യം ലക്ഷ്മിപ്രിയയോട് പറഞ്ഞു. ഞാൻ ഇതിനപ്പുറത്ത് നിന്ന കരയുകയായിരുന്നു, ഭിത്തിയിലേക്ക് ചൂണ്ടി കൊണ്ട് റോബിൻ പറഞ്ഞു. എനിക്ക് ചേച്ചിയുടെ ശബ്ദം കേൾക്കാമായിരുന്നു. പക്ഷേ എനിക്ക് ശബ്ദമുയർത്തി സംസാരിക്കാൻ പോലും കഴിയില്ലായിരുന്നു- റോബിൻ പറഞ്ഞു. ഇതുകേട്ട് ലക്ഷ്മിപ്രിയ റോബിനെ കെട്ടിപിടിച്ച് കരഞ്ഞു. റോബിനും ഇടയ്ക്ക് കണ്ണ് തുടയ്ക്കുന്നുണ്ടായിരുന്നു.