അങ്ങനെ ബിഗ് ബോസ് മലയാളം സീസണ്‍ 4 ന് തിരശ്ശീല വീണിരിക്കുകയാണ്. പുതിയൊരു ചരിത്രം സൃഷ്ടിച്ചാണ് ഈ സീസണ്‍ അവസാനിച്ചിരിക്കുന്നത്. ആദ്യമായി ബിഗ് ബോസ് മലയാളത്തില്‍ ഒരു വനിത വിജയിച്ചിരിക്കുകയാണ്. നര്‍ത്തകിയും അഭിനേത്രിയുമായ ദില്‍ഷ പ്രസന്നന്‍ ആണ് ബിഗ് ബോസ് മലയാളം സീസണ്‍ 4ലെ വിജയി. ഇതോടെ സാബു മോനും മണിക്കുട്ടനും ശേഷം ഈ നേട്ടം സ്വന്തമാക്കുന്ന താരമായും ദില്‍ഷ മാറി. ഈ സീസണില്‍ റോബിന്‍ രാധകൃഷ്ണന്‍ വിജയിക്കുമെന്നായിരുന്നു തുടക്കം മുതലുള്ള പ്രവചനങ്ങള്‍. എന്നാല്‍ പാതി വഴിയില്‍ മത്സരം അവസാനിപ്പിച്ച് റോബിന് പുറത്തേക്ക് പോവേണ്ടി വന്നു. എങ്കിലും വലിയ ആരാധക പിന്തുണയാണ് താരത്തിന് ലഭിച്ചത്. ഇപ്പോള്‍ റോബിന്‍ ആഗ്രഹിച്ചത് പോലെ സുഹൃത്ത് ദില്‍ഷ ബിഗ് ബോസ് വിന്നറായിരിക്കുകയാണ്. അതിന്റെ സന്തോഷത്തിലാണ് താരം. ദില്‍ഷയോട് ഇഷ്ടം തോന്നിയെന്നും വിവാഹം കഴിക്കാന്‍ ആഗ്രഹമുണ്ടെന്നും റോബിന്‍ മുന്‍പ് പറഞ്ഞിട്ടുണ്ട്. ദില്‍ഷ വിജയിച്ച് പുറത്തിറങ്ങിയ ശേഷം കല്യാണം ഉണ്ടാവുമോ എന്നറിയാനാണ് ആരാധകരും കാത്തിരിക്കുന്നത്.

എന്നാൽ ദില്‍ഷയുടെ വിജയത്തെ കുറിച്ച് റോബിൻ പറയുന്നത് ഇങ്ങനെയാണ്.. ദില്‍ഷ എന്റെ നല്ല സുഹൃത്താണ്. അങ്ങനെ ഒരാള്‍ വിജയിക്കുക എന്ന് പറയുന്നതില്‍ സന്തോഷമുണ്ട്. ഞാനും ആഗ്രഹിച്ചു. ഫസ്റ്റ് ലേഡി വിന്നര്‍ ആവണമെന്ന് ഞാനും ആഗ്രഹിച്ചിരുന്നു. റോബിന്‍ ആരാധകരുടെ വോട്ട് കിട്ടിയാണ് ജയിച്ചതെന്ന ആരോപണം താരം തള്ളി കളഞ്ഞു. ദില്‍ഷയെ സ്‌നേഹിക്കുന്ന ഒരുപാട് പേരുണ്ട്. അവര്‍ നല്‍കിയ വോട്ട് കാണാതിരിക്കാന്‍ പറ്റില്ല. പിന്നെ എന്നെയും ദില്‍ഷയെയും ഇഷ്ടപ്പെടുന്ന ഒത്തിരി ആളുകളുണ്ടെന്നും താരം വ്യക്തമാക്കുന്നു. എല്ലാവരുടെയും ഒത്തൊരുമയാണ് ഈ വിജയം. ദില്‍ഷ വിജയിക്കുന്നത് വരെ ടെന്‍ഷന്‍ ഉണ്ടായിരുന്നു. ബിഗ് ബോസില്‍ പങ്കെടുത്ത എല്ലാവരും വിജയികളായിട്ടാണ് കണക്കാക്കുന്നതെന്നും താരം സൂചിപ്പിച്ചു. ദില്‍ഷയോട് ആശംസകള്‍ അറിയിക്കുക മാത്രമേ ചെയ്തിട്ടുള്ളു. മറ്റ് കാര്യങ്ങളൊന്നും പറയാന്‍ പറ്റുന്ന സാഹചര്യമല്ല. എന്താണ് ഇവിടെ നടക്കുന്നതെന്ന് അവള്‍ക്ക് അറിയില്ല. ഇപ്പോള്‍ കുടുംബത്തെ കണ്ടതേയുള്ളു. ഈ ലോകത്ത് എന്താണ് നടക്കുന്നതെന്ന് അറിയാന്‍ കുറച്ച് സമയം എടുക്കും. അതുവരെ ശല്യമൊന്നും ചെയ്യണ്ടെന്നാണ് വിചാരിക്കുന്നത്. അത് കഴിഞ്ഞിട്ട് സംസാരിക്കാം.

ദില്‍ഷയുടെ വീട്ടില്‍ കല്യാണം ആലോചിച്ച് പോവേണ്ട സമയമല്ല ഇപ്പോൾ. ഇറങ്ങി കഴിഞ്ഞ ഉടനെ ഒരാളുടെ അടുത്ത് പോയി പറയുന്നത് ശരിയല്ല. സമയം ഉണ്ടല്ലോ. ദില്‍ഷ എന്ന് പറഞ്ഞ വ്യക്തിയ്ക്ക് അവളുടേതായ തീരുമാനങ്ങളുണ്ടാവും. അവളെന്നെ ബെസ്റ്റ് ഫ്രണ്ട് ആയിട്ട് മാത്രമേ കാണുന്നുണ്ടാവുകയുള്ളു. അങ്ങനൊരു ഇഷ്ടം ഉണ്ടാവണമെന്നില്ല. അതുകൊണ്ട് ദില്‍ഷയുടെ തീരുമാനത്തിന് ഞാന്‍ പ്രധാന്യം കൊടുക്കുന്നുണ്ട്. എന്നെ ഇഷ്ടപ്പെടുന്നവരും അത് മനസിലാക്കണമെന്നും റോബിൻ പറഞ്ഞു.