ബാലഭാസ്‌ക്കറിന്റെ മരണത്തില്‍ തുടരന്വേഷണം ആവശ്യമില്ലെന്ന തിരുവനന്തപുരം സിജെഎം കോടതി വിധിക്കെതിരെ ഹൈക്കോടതിയില്‍ അപ്പീല്‍ നല്‍കുമെന്ന് ബാലഭാസ്‌ക്കറിന്റെ പിതാവ് കെസി ഉണ്ണി പറഞ്ഞു. ബാലഭാസ്‌ക്കറിന്റെ മരണത്തിന് കാരണക്കാര്‍ സ്വര്‍ണക്കടത്ത് സംഘമാണെന്ന് ഉറച്ച് വിശ്വസിക്കുന്നെന്നും ഉണ്ണി ആവര്‍ത്തിക്കുകയാണ്.

ബാലഭാസ്‌ക്കറിന്റെ പിതാവ് പറഞ്ഞതിങ്ങനെയായിരുന്നു..

''കേസില്‍ ഹൈക്കോടതിയില്‍ അപ്പീല്‍ നല്‍കാനാണ് തീരുമാനം. സിബിഐ സംഘം ബാലഭാസ്‌ക്കറിന്റെ ഫോണുകള്‍ പരിശോധിച്ചിട്ടില്ല. എനിക്കിപ്പോള്‍ 76 വയസായി. ഇനി എത്ര നാള്‍ ജീവിച്ചിരിക്കുമെന്ന് അറിയില്ല. ഈച്ചരവാര്യര്‍ നടന്നത് പോലെ സഞ്ചിയും തൂക്കി കോടതികളിലായി ഇങ്ങനെ നടക്കാം. അല്ലാതെ ഇപ്പം എന്ത് ചെയ്യാനാ. സ്‌ട്രോക്ക് വന്ന ശേഷം ശരിയായി നടക്കാന്‍ പോലും സാധിക്കില്ല. ഒരു പൈന്റൊക്കെ അടിച്ചത് പോലെയിരിക്കും നടക്കുമ്പോള്‍. നിയമസഹായം മാത്രമല്ല, ഒരു സഹായവും ആരുടെയും കൈയില്‍ നിന്ന് കിട്ടിയിട്ടില്ല.'' ''മരണത്തിന് പിന്നില്‍ സ്വര്‍ണക്കടത്ത് സംഘമാണെന്ന് 100 ശതമാനം ഉറപ്പാണ്. അതൊരു കൊലപാതകമാണ്. അത് പല രീതിയിലാകാം. പിന്നില്‍ നിന്ന് ചേസ് ചെയ്ത് ഇടിച്ച് മാറ്റിയതാകാം. അല്ലെങ്കില്‍ ഫ്രെണ്ടില്‍ നിന്ന് വന്ന് ഇടിച്ചതാകാം.

''ബാലഭാസ്‌ക്കറിന്റെ കൈയില്‍ ഇഷ്ടം പോലെ കാശുണ്ട്. പണത്തിന്റെ ആവശ്യമേയില്ലായിരുന്നു. മരിക്കുന്നതിന്റെ ഒരാഴ്ച മുന്‍പ് അവന്‍ പറഞ്ഞു ഫെഡറല്‍ ബാങ്കില്‍ ഒരു കോടി ബാലന്‍സുണ്ടെന്ന്. മറ്റ് സാമ്പത്തിക പ്രശ്‌നമൊന്നും അവനില്ല. കാശിന് വേണ്ടി സ്വര്‍ണക്കടത്ത് സംഘവുമായി ബന്ധപ്പെടില്ല. ഇക്കാര്യം ഉറപ്പാണെന്ന് കെസി ഉണ്ണി പറഞ്ഞു.

അന്വേഷണത്തിന്റെ തുടക്കം മുതല്‍ തന്നെ കേസ് അട്ടിമറിക്കാന്‍ ശ്രമങ്ങള്‍ നടന്നതായും കെസി ഉണ്ണി നേരത്തെ പറഞ്ഞിരുന്നു. ബാലഭാസ്‌ക്കറിന്റെ ഫോണ്‍ പരിശോധിക്കാനോ പ്രധാന സാക്ഷികളെ ചോദ്യം ചെയ്യാനോ സിബിഐ തയ്യാറായില്ല. പണമിടപാടുകളിലും കാര്യമായ പരിശോധനകള്‍ നടന്നില്ല. വിഷ്ണു എന്നയാള്‍ ബാലഭാസ്‌ക്കറില്‍ നിന്നും 50 ലക്ഷം രൂപ കടം വാങ്ങിയതായി സിബിഐ ഡിവൈഎസ്പി പറഞ്ഞിരുന്നുവെന്നും ഉണ്ണി പറഞ്ഞു. ഡിആര്‍ഐ ബാലഭാസ്‌ക്കറിന്റെ ഫോണ്‍ പിടിച്ചെടുത്ത സമയത്ത് എല്ലാ രേഖകളും മായ്ച്ചിരുന്നു. രേഖകള്‍ മായ്ച്ചാലും കണ്ടുപിടിക്കാനുള്ള സംവിധാനങ്ങള്‍ ഇപ്പോള്‍ ഉണ്ട്. കേസ് തള്ളുമെന്ന് സരിതാ എസ് നായര്‍ നേരത്തേ തന്നോട് പറഞ്ഞിരുന്നെന്നും ഉണ്ണി പറഞ്ഞു.