അതിരടിക്ക് വേണ്ടി 15 കിലോ ശരീരഭാരം കുറച്ചുവെന്ന് നടന്‍ ബേസില്‍ ജോസഫ്. അതിരടിയുടെ പ്രൊമോഷന്റെ ഭാഗമായി ക്യൂ സ്റ്റുഡിയോയ്ക്ക് നല്‍കിയ അഭിമുഖത്തില്‍ സംസാരിക്കുകയായിരുന്നു ബേസില്‍. ടൊവിനോ തോമസ്, വിനീത് ശ്രീനിവാസന്‍ എന്നിവരും ബേസിലിനൊപ്പമുണ്ടായിരുന്നു.

നവാഗതനായ അരുണ്‍ അനിരുദ്ധന്‍ ആണ് ചിത്രം സംവിധാനം ചെയ്യുന്നത്. സാം ബോയ് എന്ന് വിളിപ്പേരുള്ള ഒരു കോളജ് വിദ്യാര്‍ഥിയായാണ് ബേസില്‍ ഈ ചിത്രത്തിലഭിനയിക്കുന്നത്. 'മരണമാസ് കഴിഞ്ഞിട്ട് ഒരു മെയിന്‍ ലീഡ് റോള്‍ റിലീസ് അതിരടിയാണ്. ഒരു വര്‍ഷമായി കഴിഞ്ഞ ഏപ്രിലില്‍ ആയിരുന്നു മരണമാസ്.

ഈ സിനിമയിലേക്ക് വരുമ്പോള്‍ ആ റോളിനും ആ കാരക്ടര്‍ വര്‍ക്ക് ആകുമ്പോള്‍ ഉണ്ടാകുന്ന ഇമ്പാക്ട്ടും എനിക്ക് നന്നായി അറിയാം. സിനിമയുടെ പ്രൊഡ്യൂസര്‍ കൂടി ആകാന്‍ ഞാന്‍ തീരുമാനിക്കുകയും ചെയ്തു. ഒരു ആക്ടര്‍ എന്ന നിലയില്‍ ഈ ഒരു പോയിന്റ് എത്തി. പൊന്മാന്‍, സൂക്ഷ്മദര്‍ശിനി പോലുള്ള സിനിമകള്‍ വന്നപ്പോള്‍ അതില്‍ നിന്ന് പുറകോട്ട് പോകാന്‍ കഴിയില്ല.

ആളുകള്‍ പ്രതീക്ഷ വെക്കുന്നുണ്ട്. അതുകൊണ്ട് കഥാപാത്രം മികച്ചത് ആകാന്‍ വേണ്ടി കൂടുതല്‍ പരിശ്രമിക്കണം. ഇതില്‍ നിന്ന് പിറകിലേക്ക് പോകാനുള്ള ഒരു സ്‌പെയ്‌സ് ഇല്ല. ആ ഒരു ബാധ്യത കൂടെയുണ്ട്. ഒരു കോളജ് കാരക്ടര്‍ എന്ന് പറയുമ്പോള്‍ തീര്‍ച്ചയായിട്ടും ഞാനൊരു കോളജില്‍ പഠിക്കുന്ന പ്രായമല്ല. എനിക്ക് ഒരു ഭാര്യ ഉണ്ട്, കുട്ടി ഉണ്ട്. എല്ലാം ആളുകള്‍ക്ക് അറിയുന്ന കാര്യമാണ്.

വെറുതെ ക്ലീന്‍ ഷേവ് ചെയ്ത് വന്നിട്ട് കോളജ് പയ്യനാണ് എന്ന് പറയുന്നതില്‍ കാര്യമില്ല. ബാക്കി എല്ലാം വേണമെങ്കില്‍, പൈസ കൊടുത്ത് എന്തും നേടാം. പക്ഷേ ബോഡിയ്ക്ക് വേണ്ടി നമ്മള്‍ തന്നെ പണി എടുക്കണം. കുറച്ചധികം സമയം ഇന്‍വെസ്റ്റ് ചെയ്യുക എന്നുള്ളതല്ലാതെ വേറെ ഓപ്ഷന്‍ ഇല്ല. ഇതിനു വേണ്ടി വേറെ അഭിനയം.

ബാക്കി ഒന്നും ചെയ്യുന്നില്ല എന്ന രീതിയിലേക്ക് വന്നു. ഒരു പത്ത് മാസം ഇതിനുവേണ്ടി തന്നെ ഫാസ്റ്റിങ്ങും വര്‍ക്ക്ഔട്ടും ദിവസം ഒന്ന് രണ്ടു മണിക്കൂര്‍ ചെയ്തു. എക്‌സ്ട്രീം ആയിട്ടുള്ള ഒരു എഫര്‍ട്ട് ഇട്ടിട്ടുണ്ടായിരുന്നു. ട്രയല്‍ ലോക്ക് ചെയ്യുമ്പോള്‍ എല്ലാവരും കോളജ് പയ്യന്‍ എന്ന് പറഞ്ഞപ്പോള്‍ സന്തോഷം ഉണ്ടായിരുന്നു.

പണി എടുത്തതില്‍ ഒരു കാര്യം ഉണ്ടാക്കി എന്ന് പറയുന്നത് കോണ്‍ഫിഡന്‍സ് കൂട്ടിയിരുന്നു. പാന്റിന്റെ അളവ് ഇപ്പോള്‍ 28 ആണ്. ആദ്യം 34 ആയിരുന്നു. മൊത്തം 15 കിലോ കുറഞ്ഞു. 60 കിലോ ആണ് എന്റെ ശരീരഭാരം ഇപ്പോള്‍. സിനിമയ്ക്ക് വേണ്ടിയിട്ട് പാര്‍ട്ട് ഓഫ് മൈ ലൈഫ് തന്നെ ഒരു രണ്ടു വര്‍ഷം ഇതിനുവേണ്ടി കംപ്ലീറ്റ് ആയി ഡെഡിക്കേറ്റ് ചെയ്തിട്ടുണ്ട്'. ബേസില്‍ പറഞ്ഞു.