നൃത്ത ചിത്രീകരണത്തിനിടെ പരിക്കേറ്റ് വിശ്രമത്തിലാണെന്ന റിപ്പോര്‍ട്ടുകള്‍ സ്ഥിരീകരിച്ച് നടി രശ്മിക മന്ദാന. മൈസ എന്ന ചിത്രത്തിന്റെ നൃത്ത ചിത്രീകരണത്തിനിടെയാണ് പരിക്കേറ്റതെന്ന് നടി ഇന്‍സ്റ്റഗ്രാമില്‍ അറിയിച്ചു. അടുത്ത കാലത്തായി തനിക്ക് ഏല്‍ക്കുന്ന തുടര്‍ച്ചയായ മൂന്നാമത്തെ പരിക്കാണിതെന്നും രശ്മിക വെളിപ്പെടുത്തി.

വലതുവശത്തെ ഇടുപ്പിലെ നാല് ടെന്‍ഡണുകളില്‍ ഒന്ന് വേര്‍പ്പെട്ട നിലയിലാണെന്നും നടി അറിയിച്ചു. കാല്‍ ശരിയായി ഉയര്‍ത്താന്‍ സാധിക്കണമെങ്കില്‍ ഇത് പൂര്‍വസ്ഥിതിയിലാകണം. താന്‍ ഇതുവരെ ചെയ്തതില്‍ വെച്ച് ഏറ്റവും അഗ്രസീവായ ചിത്രമാണ് 'മൈസ'. ഇതിന്റെ നൃത്തരംഗം ചിത്രീകരിക്കുന്നതിനിടെയാണ് പരിക്കേറ്റതെന്നും താരം വ്യക്തമാക്കി.

ശരീരത്തെ ഒരു യന്ത്രമായി കാണാതെ മനുഷ്യശരീരമായി കാണാന്‍ താന്‍ സ്വയം പഠിക്കണമെന്ന് രശ്മിക കുറിച്ചു. സഹിക്കാവുന്ന വേദനയേ ഇപ്പോഴുള്ളൂവെന്നും നടി വ്യക്തമാക്കി. നിര്‍ബന്ധിത ഇടവേളയായി ഇപ്പോഴത്തെ വിശ്രമകാലത്തെ കാണുന്നുവെന്നും താരം കൂട്ടിച്ചേര്‍ത്തു.

വിശ്രമകാലത്ത് പസിലുകള്‍ സോള്‍വ് ചെയ്താണ് സമയം ചെലവഴിക്കുന്നത്. സ്ഥിരം വര്‍ക്കൗട്ടും ഓട്ടവും മുടങ്ങിയതില്‍ വിഷമമുണ്ടെന്നും താരം തമാശരൂപേണ പങ്കുവെച്ചു. ആരാധകര്‍ ആശങ്കപ്പെടേണ്ടതില്ല. ആവശ്യമെങ്കില്‍ കൂടുതല്‍ വിവരങ്ങള്‍ പങ്കുവെക്കാമെന്നും അറിയിച്ചാണ് രശ്മിക കുറിപ്പ് അവസാനിപ്പിച്ചത്.