ആര്‍ത്തവം സാധാരണമായി കണക്കാക്കപ്പെടുന്നത് സങ്കടകരമാണെന്ന് രശ്മിക
ആര്‍ത്തവ സമയങ്ങളിലെ ശാരീരിക ബുദ്ധിമുട്ടുകള്‍ സ്ത്രീകള്‍ നേരിടുന്ന വലിയ വെല്ലുവിളിയാണെന്ന് നടി രശ്മിക മന്ദാന. സിനിമാ സെറ്റുകളില്‍ ആര്‍ത്തവ അവധി എന്ന ആശയം ഇനിയും വേണ്ടത്ര ചര്‍ച്ചയായിട്ടില്ലെന്നതാണ് യാഥാര്‍ത്ഥ്യം. സിനിമ മേഖലയില്‍ സ്ത്രീകള്‍ ഉയര്‍ന്ന സ്ഥാനങ്ങളില്‍ എത്തുന്നുണ്ടെങ്കിലും ആര്‍ത്തവ സമയത്തെ ശാരീരിക ബുദ്ധിമുട്ടുകള്‍ക്കിടയില്‍ അവധി നല്‍കുക, അടിസ്ഥാന സൗകര്യങ്ങളില്ലാതെ ജോലി ചെയ്യേണ്ടി വരിക തുടങ്ങിയ കാര്യങ്ങള്‍ തുടരുകയാണെന്നും കാലങ്ങളായി ഇതെല്ലാം സാധാരണമായി കണക്കാക്കപ്പെടുന്നത് സങ്കടകരമാണെന്നും രശ്മിക അഭിപ്രായപ്പെട്ടു.മിഡ്‌ഡേയ്ക്ക് നല്‍കിയ അഭിമുഖത്തില്‍ സംസാരിക്കുകയായിരുന്നു നടി.
ആര്‍ത്തവദിനങ്ങളില്‍ ഉണ്ടാകുന്ന കഠിനമായ വേദന കുറയ്ക്കാന്‍ ചൂടുവെള്ളം നിറച്ച ഹീറ്റിംഗ് പാഡുകള്‍ ഉപയോഗിക്കാറുണ്ടെന്നും ജീരകവെള്ളം കുടിക്കാറുണ്ടെന്നും രശ്മിക പറഞ്ഞു. തനിക്ക് ആദ്യമായി ആര്‍ത്തവം ഉണ്ടായ കാലത്തെ അനുഭവവും രശ്മിക പങ്കുവച്ചു. അന്ന് ഇക്കാര്യം ആരോടെങ്കിലും തുറന്നുപറയാന്‍ ഭയമായിരുന്നുവെന്ന് താരം വ്യക്തമാക്കി. സാനിറ്ററി പാഡ് എന്നൊരു സാധനം ഉണ്ടെന്ന് തന്നെ അറിയില്ലായിരുന്നുവെന്നും രശ്മിക ഓര്‍ത്തെടുത്തു.
എന്നാല്‍ വിവാഹശേഷം ആര്‍ത്തവദിനങ്ങളില്‍ കടുത്ത വേദനയും അസ്വസ്ഥതയും അനുഭവിക്കുമ്പോള്‍ തന്റെ ഭര്‍ത്താവ് വിജയ്‌ദേവരകൊണ്ട നല്‍കുന്ന കരുതലിനെക്കുറിച്ചും താരം തുറന്നു പറഞ്ഞു. ആര്‍ത്തവസമയത്ത് കഠിനമായ വേദനകളിലൂടെ കടന്നുപോകുമ്പോള്‍ വയറില്‍ തലോടിയും കൈകാലുകള്‍ തിരുമ്മിയും വിജയ് ആശ്വാസം പകരാറുണ്ടെന്ന് രശ്മിക പറയുന്നു.
പെണ്‍കുട്ടികള്‍ക്ക് ആര്‍ത്തവം ഉണ്ടാകുന്നതുമായി ബന്ധപ്പെട്ട കാര്യങ്ങള്‍ അദ്ദേഹം വീട്ടില്‍ സംസാരിച്ച് കേട്ടിട്ടില്ലെങ്കിലും തനിക്ക് ശാരീരികവും മാനസികവുമായ ബുദ്ധിമുട്ടുകള്‍ ഉണ്ടാകുമ്പോള്‍ അദ്ദേഹം മനസിലാക്കാറുണ്ടെന്ന് രശ്മിക പറയുന്നു. കാരണമൊന്നുമില്ലാതെ മനസിന് വിഷമം തോന്നുന്നദിവസങ്ങളില്‍ ഏതാനും ദിവസങ്ങള്‍ക്കുള്ളില്‍ തനിക്ക് പിരിയഡ് ഉണ്ടാകുമെന്ന് വിജയ്‌യെ അറിയിക്കാറുണ്ട്. അത്തരം സമയങ്ങളില്‍ അദ്ദേഹം നല്‍കുന്ന കരുതല്‍ ഏറെ ആശ്വാസമാണെന്ന് നടി വ്യക്തമാക്കി.
https://www.facebook.com/Malayalivartha
