ആദ്യം ഭാവി അമ്മായി അച്ഛനും അമ്മായി അമ്മയുമായ ശരത്കുമാര്‍, രാധിക ദമ്പതികളുമായാണ് വിശാല്‍ അടിച്ച് പിരിഞ്ഞത്. അതിന് പകരമെന്നോണം കാമുകിയും അവരുടെ മകളുമായ വരലക്ഷ്മി വിശാലുമായി അടിച്ച് പിരിഞ്ഞു. നടികര്‍ സംഘം പ്രസിഡന്റായിരിക്കെ ശരത്കുമാര്‍ തട്ടിപ്പ് നടത്തിയെന്ന് ആരോപിച്ചാണ് വിശാല്‍ രംഗത്ത് എത്തിയിരുന്നത്. നടികര്‍ സംഘത്തിന് ആസ്ഥാനം പണിയാതെ താന്‍ വിവാഹം കഴിക്കില്ലെന്നും താരം വ്യക്തമാക്കിയിരുന്നു. ചെന്നൈയില്‍ നടികര്‍ സംഘത്തിന്റെ പേരിലുള്ള സ്ഥലം സ്വകാര്യ കമ്പനിക്ക് മാള്‍ പണിയാന്‍ പാട്ടം കൊടുത്ത ശരത്കുമാറിന്റെ നടപടിക്കെതിരെയാണ് വിശാല്‍ രംഗത്ത് എത്തിയത്. തുടര്‍ന്ന് നടന്ന തെരഞ്ഞെടുപ്പില്‍ ശരത്കുമാര്‍ പരാജയപ്പെട്ടു. 

ഈ വിവാദങ്ങളെല്ലാം നടക്കുമ്പോഴും വിശാലും വരലക്ഷ്മിയും തമ്മില്‍ കൊടുമ്പിരി കൊണ്ട പ്രണയത്തിലായിരുന്നു. ഇരുവരെയും കുറിച്ച് തമിഴ് പത്രങ്ങളിലും ഓണ്‍ലൈന്‍ മാധ്യമങ്ങളിലും ഗോസിപ്പുകള്‍ വന്നെങ്കിലും അത് സത്യമാണെന്നോ അല്ലെന്നോ പ്രതികരിക്കാന്‍ താരങ്ങള്‍ തയ്യാറായില്ല. എത്രയും വേഗം വരലക്ഷ്മിയെ വിവാഹം ചെയ്യണമെന്ന് വിശാല്‍ ആഗ്രഹം പ്രകടിപ്പിക്കുന്നതായി സുഹൃത്തുക്കള്‍ പറയുന്നു. അതിനിടെ 2018ല്‍ തങ്ങള്‍ വിവാഹം കഴിക്കുമെന്ന് വിശാല്‍ പരസ്യമായി പ്രഖ്യാപിച്ചു. ആരാധകര്‍ക്ക് വലിയ സന്തോഷമാണ് ഈ വാര്‍ത്ത നല്‍കിയത്. 

എന്നാല്‍ വിശാലിന്റെ പ്രഖ്യാപനം വരലക്ഷ്മിയെ ചൊടിപ്പിച്ചു. തന്റെ കരിയറിനെ ഇത് ബാധിച്ചെന്നും പല അവസരങ്ങളും നഷ്ടപ്പെടുമെന്നും വരലക്ഷ്മി ആഞ്ഞടിച്ചു. ഇരുവരും തമ്മില്‍ വലിയ വാക്ക് തര്‍ക്കവും ഉണ്ടായി. ഒടുവില്‍ തനിക്ക് ആരോടും പ്രണയമില്ലെന്ന് വരലക്ഷ്മി തുറന്നടിച്ചു. പ്രണയത്തെ കുറിച്ച് ഇപ്പോള്‍ ചിന്തിക്കുന്നില്ലെന്നും തൊഴിലാണ് പ്രധാനമെന്നും പറഞ്ഞു. അതോടെ വിശാല്‍ തകര്‍ന്നു. നാലഞ്ച് കൊല്ലമായി ഇരുവരും കടുത്ത പ്രണയത്തിലായിരുന്നു. എന്നാല്‍ ഇത് താല്‍ക്കാലികമായ പിരിയല്‍ മാത്രമാണെന്ന് ഇരുവരോടും അടുത്ത സുഹൃത്തുക്കള്‍ പറയുന്നു.