മമ്മൂട്ടിയുടേയും സുരേഷ് ഗോപിയുടേയും പിണക്കം സിനിമാ ലോകത്ത് എല്ലാവര്‍ക്കുമറിയാം. ഇരുവരും തമ്മിലുള്ള മാനസികമായുള്ള അകല്‍ച്ച വെളിവായത് ഒരു കല്യാണത്തോടെയാണ്. രതീഷിന്റെ മകളുടെ കല്യാണം നടത്തിയത് സിനിമാ നിര്‍മ്മാതാവായിരുന്ന സുരേഷ് കുമാറിന്റേയും നടി മേനകയുടേയും നേതൃത്വത്തിലായിരുന്നു. മമ്മൂട്ടിയും സുരേഷ് ഗോപിയും ജയറാമുമെല്ലാം എല്ലാ പിന്തുണയുമായി ഒപ്പം നിന്നു. അങ്ങനെ രതീഷിന്റെ മകളുടെ കല്യാണം ഗംഭീരമായി. എന്നാല്‍ അതിന് ശേഷം സിനിമാ ലോകം ചര്‍ച്ച ചെയ്തത് മമ്മൂട്ടിയും സുരേഷ് ഗോപിയും തമ്മിലുള്ള പിണക്കത്തിന്റെ കഥയാണ്.

ബിജെപിയോട് ചേര്‍ന്ന് നില്‍ക്കുന്ന സുരേഷ് ഗോപിയും സിപിഐ(എം) ചാനലിന്റെ ചെയര്‍മാനായ മമ്മൂട്ടിയും രാഷ്ട്രീയ ശത്രുക്കളെ പോലെയാണ് കല്ല്യാണ ചടങ്ങില്‍ പെരുമാറിയത്. ഏഷ്യാനെറ്റിലെ വീഡിയോ സമൂഹമാദ്ധ്യമങ്ങളിലും ചര്‍ച്ച സജീവമാക്കി. എന്നാലിപ്പോള്‍ ഈ ശത്രുക്കളെ ഒരുമിപ്പിച്ചതിന്റെ ആവേശത്തിലാണ് സിനിമാ ലോകം. 

ഇതിന് കളമൊരുക്കിയത് സുരേഷ് കുമാറിന്റേയും മേനകയുടേയും മകളുടെ വിവാഹവും. ഗുരുവായൂരില്‍ നടന്ന രേവതിയുടെ കല്ല്യാണത്തിന് മമ്മൂട്ടിയും സുരേഷ് ഗോപിയുമെത്തി. ഏവരേയും അല്‍ഭുതപ്പെടുത്തി മനസ്സ് തുറന്ന് കെട്ടിപ്പിടിച്ചു. എല്ലാം പറഞ്ഞു തീര്‍ത്തു. ഞങ്ങളുടെ പിണക്കം തീര്‍ന്നെന്ന് സഹപ്രവര്‍ത്തകരോട് പ്രഖ്യാപിക്കുകയും ചെയ്തു. അങ്ങനെ സിനിമാ ലോകത്തെ ഒരു പിണക്കം അവസാനിക്കുകയാണ്.

മമ്മൂട്ടി സുരേഷ് ഗോപി പിണക്കം വര്‍ഷങ്ങള്‍ക്ക് മുന്‍പേ തുടങ്ങിയതാണത്രെ. ഇതിന്റെ വ്യക്തമായ കാരണങ്ങള്‍ ആര്‍ക്കും അറിയില്ലെങ്കിലും പല അഭ്യൂഹങ്ങളും പ്രചരിക്കുന്നുണ്ടായിരുന്നു. ഇതിന് ബലം നല്‍കുന്ന സംഭവമാണ് രതീഷിന്റെ മകളുടെ കല്ല്യാണ ചടങ്ങില്‍ കണ്ടത്. സുരേഷ്‌ഗോപി വന്നു തോളില്‍ തട്ടിയിട്ടും മമ്മൂട്ടി കണ്ടഭാവം നടിച്ചില്ല. ഏഷ്യാനെറ്റിന്റെ വീഡിയോ ശ്രദ്ധിച്ചാല്‍ അത് മനസിലാകും. തോളില്‍ തട്ടിയ സുരേഷ് ഗോപിയെ ഒന്നു മിന്നായം പോലെ നോക്കിയിട്ട് അപ്പുറത്ത് നിന്നും വന്ന ഒരു നടിയുടെ അടുത്തേക്ക് മമ്മൂട്ടി മുഖം തിരിച്ചു. താരത്തിന്റെ സ്വഭാവം അറിയുന്ന സുരേഷ്‌ഗോപി നിന്ന് നാണംകെടാന്‍ ശ്രമിച്ചതുമില്ല.

ഇവരുടെ പിണക്കത്തിന് കാരണമായി പല കഥകള്‍ പ്രചരിച്ചിട്ടുണ്ട്. അതിലൊന്ന് പപ്പയുടെ സ്വന്തം അപ്പൂസ് എന്ന സിനിമയുടെ ഷൂട്ടിംഗിന്റെ ഇടയില്‍ നടന്നതായിരുന്നു. ഷൂട്ടിംഗിനിടെ അത്യാവശ്യമായി തിരുവനന്തപുരത്തേക്ക് വരേണ്ടിയിരുന്ന സുരേഷ് ഗോപി, മമ്മൂട്ടിയും തിരുവനന്തപുരത്തേക്ക് വരുന്നു എന്നറിഞ്ഞ് അദ്ദേഹത്തിന്റെ കാറില്‍ വരാന്‍ തീരുമാനിച്ചു. മമ്മൂട്ടി സുരേഷ് ഗോപിയെ താന്‍ തന്നെ വീട്ടില്‍ എത്തിച്ചു കൊള്ളാമെന്ന് സമ്മതിച്ചതനുസരിച്ച് പ്രൊഡക്ഷന്‍ അദ്ദേഹത്തിനു വിമാന ടിക്കറ്റും അറേഞ്ച് ചെയ്തിരുന്നില്ല. രാത്രി സമയം ആയതിനാലും മികച്ച റോഡായതിനാലും മമ്മൂട്ടി അമിതവേഗതയില്‍ കാര്‍ ചവിട്ടി വിട്ടു. എന്നാല്‍ അമിത വേഗത സഹിക്കാനാവാതെ വണ്ടി പതുക്കെ ഓടിക്കാന്‍ ആവശ്യപ്പെട്ട സുരേഷ് ഗോപിയോട് ദേഷ്യപ്പെട്ട മമ്മൂട്ടി അദ്ദേഹത്തെ കോയമ്പത്തൂരിനടുത്ത് വഴിയില്‍ ഇറക്കി വിട്ടുവത്രെ. പാതിരാത്രി പെരുവഴിയിലായ താരം പിന്നീട് ലോറിയില്‍ യാത്ര ചെയ്ത് ലക്ഷ്യസ്ഥാനത്ത് എത്തി. ഇതോടെ പിണക്കം തുടങ്ങി.

മറ്റൊന്ന് സുരേഷ് ഗോപിക്ക് ദേശീയ അവാര്‍ഡ് ലഭിച്ചതിനെച്ചൊല്ലിയാണ്. സുരേഷ് ഗോപിയുടെ കളിയാട്ടവും മമ്മൂട്ടിയുടെ ഭൂത കണ്ണാടിയും ഇറങ്ങിയത് ഒരേ സമയത്തായിരുന്നു. ഇരു ചിത്രങ്ങളും ദേശീയ പുരസ്‌കാരത്തിന് മത്സരിക്കാനുണ്ടായിരുന്നു. കളിയാട്ടത്തിലെ അഭിനയത്തിന് സുരേഷ് ഗോപിക്ക് ദേശീയ പുരസ്‌കാരം ലഭിച്ചു. പുരസ്‌കാരം ലഭിച്ചപ്പോള്‍ സുരേഷ് അത് അറിയിക്കാനായി മമ്മൂട്ടിയെ വിളിച്ചു. എന്നാല്‍ അവാര്‍ഡ് കിട്ടിയതിന് സുരേഷ് ഗോപിയെ മമ്മൂട്ടി അഭിനന്ദിച്ചു പോലുമില്ല. മമ്മൂട്ടിയുടെ പെരുമാറ്റം സുരേഷ് ഗോപിയെ വല്ലാതെ വേദനപ്പിച്ചുവെന്നും അതോടെ ഇരുവരും വലിയ പിണക്കത്തില്‍ ആയെന്നുമാണ് സിനിമാക്കാര്‍ക്കിടയിലെ പിന്നാമ്പുറ സംസാരങ്ങള്‍.

ഈ പിണക്കം അറിഞ്ഞു കൊണ്ട് തന്നെ പരിഹരിക്കാന്‍ മുമ്പും ശ്രമമുണ്ടായി. അങ്ങനെ ഷാജി കൈലാസിന്റെ നേതൃത്വത്തില്‍ ഒരു സിനിമ തന്നെ വന്നു. എറണാകുളത്തുള്ള മമ്മൂട്ടിയുടെ വീട്ടില്‍ സുരേഷ് ഗോപി സന്ദര്‍ശനം നടത്തിയതോടെ പ്രശ്‌നങ്ങള്‍ തീര്‍ന്നെന്ന് വാര്‍ത്തകളെത്തി. മമ്മൂട്ടിയും സുരേഷ് ഗോപിയും ഒന്നിച്ച് അഭിനയിച്ച കിങ് കമ്മീഷണറിനും പക്ഷേ പ്രശ്‌നം പരിഹരിക്കാനായില്ല. താരപ്പിണക്കം മൂലം അനന്തമായി നീണ്ടു പോയ പ്രൊജക്ട് ഉപേക്ഷിച്ചുവെന്ന് പോലും വാര്‍ത്ത വന്നിരുന്നു. പിണക്കം മാറ്റാനായിരുന്നു സുരേഷ് ഗോപി, മമ്മൂട്ടിയുടെ വീട്ടിലെത്തിയത്. അങ്ങനെ സിനിമയുടെ ഷൂട്ടിങ് തുടങ്ങി. പടം റിലീസാവുകയും ചെയ്തു. എന്നാല്‍ ഷൂട്ടിംഗിനിടെയുണ്ടാക്കിയ പ്രശ്‌നങ്ങള്‍ പിണക്കം കൂട്ടിയതേയുള്ളൂ.

സുരേഷ് ഗോപി രാജ്യസഭാ അംഗമായതും മമ്മൂട്ടിക്ക് രുചിച്ചിരുന്നില്ലെന്ന് വാര്‍ത്തയുണ്ടായിരുന്നു. സിപിഎമ്മുമായി ചേര്‍ന്ന് നിന്ന് മമ്മൂട്ടി പ്രവര്‍ത്തിക്കാന്‍ തുടങ്ങിയിട്ട് നാളുകള്‍ ഏറെയായി. ഇന്നസെന്റിനെ വരെ മത്സരിപ്പിച്ച് പാര്‍ലമെന്റ് അംഗമാക്കി. അപ്പോള്‍ തോല്‍വി ഭയം കാണം ലോക്‌സഭയിലോ നിയമസഭയിലോ ഒരു കൈനോക്കാന്‍ മമ്മൂട്ടി തയ്യാറായില്ല. രാജ്യസഭയിലേക്ക് പലപ്പോഴും പേര് ചര്‍ച്ചയായെങ്കിലും നടന്നില്ല. എന്നാല്‍ സുരേഷ് ഗോപി പ്രധാനമന്ത്രി നരേന്ദ്ര മോദിയെ കൈയിലെടുത്ത് ചുളുവില്‍ രാജ്യസഭാ അംഗമായി. ഇനി കേന്ദ്ര മന്ത്രിയുമാകുമെന്ന് വാര്‍ത്ത വരുന്നു. ഈ സാഹചര്യത്തിലാണ് രതീഷിന്റെ മകളുടെ കല്ല്യാണത്തില്‍ സുരേഷ് ഗോപിയും മമ്മൂട്ടിയും തമ്മിലെ പ്രശ്‌നങ്ങള്‍ ചര്‍ച്ചയായത്.

എന്നാല്‍ ഈ വാര്‍ത്ത സമൂഹമാദ്ധ്യമങ്ങളില്‍ ചര്‍ച്ചയായതോടെ ചില സിനിമാ സുഹൃത്തുക്കള്‍ വിഷയത്തില്‍ ഇടപെട്ടു. ഇതോടെയാണ് പ്രശ്‌നങ്ങള്‍ തീര്‍ന്നത്. ഇനി കാണുമ്പോള്‍ കൈകൊടുത്ത് സ്‌നേഹ പ്രകടനം ഉണ്ടാകുമെന്നും അറിയിച്ചു. ഇതിന്റെ ക്ലൈമാക്‌സാണ് ഗുരുവായൂരിലെ വിവാഹ ചടങ്ങില്‍ ഈ മാസം ആദ്യം നടന്നതെന്ന് സിനിമാക്കാര്‍ പറയുന്നത്.