ആ കുടുംബത്തില്‍ എല്ലാമെല്ലാമായിരുന്നു രാജേട്ടന്‍. രാജേട്ടന്റെ വിയോഗത്തില്‍ നിന്നും താരാ കാല്യാണും മകള്‍ സൗഭാഗ്യയും ഇനിയും മേചനം നേടിയിട്ടില്ല. അതിനിടെയാണ് മംഗളത്തിലെ ഇവരുടെ അഭിമുഖം വന്നത്. രാജേട്ടന്റെ വിയേഗത്തിന് മുമ്പായിരുന്നു ഈ ഇന്റര്‍വ്യൂ എടുത്തത്. ഇന്റര്‍വ്യൂ കഴിഞ്ഞിറങ്ങുമ്പോള്‍ ഞങ്ങളുടെ അഭിമുഖം എന്നത്തേയ്ക്ക് വരുമെന്ന് സൗഭാഗ്യ തിരക്കിയിരുന്നു. 

ഈ അഭിമുഖത്തെക്കുറിച്ച് അച്ഛനോട് ഒന്നും ഇതുവരെ പറഞ്ഞിട്ടില്ലെന്നും ഒരു സര്‍െ്രെപസായി കാണിക്കാനാണ് പഌനെന്നും പറഞ്ഞപ്പോള്‍ മകളുടെ അരികില്‍ നിന്ന താര കല്യാണ്‍ ഉറക്കെചിരിച്ചു. 

ഈ അഭിമുഖം പ്രസിദ്ധീകരിക്കുമ്പോഴേക്കും സൗഭാഗ്യയുടെ സര്‍പ്രൈസ് കാണാതെ അച്ഛന്‍ രാജാറാം നിഷ്‌ക്കളങ്കരായ ആ അമ്മയെയും മകളെയും തനിച്ചാക്കി ഈ ലോകത്ത് നിന്ന് വിടപറഞ്ഞിരുന്നു.

മംഗളത്തിന്റെ അഭിമുഖത്തിന്റെ പ്രസക്ത ഭാഗങ്ങള്‍

താര സന്തതികള്‍ അടക്കിവാഴുന്ന സിനിമയിലേക്ക് സൗഭാഗ്യയെ പ്രതീക്ഷിക്കാമോ?

താര: അവള്‍ക്ക് താല്‍പ്പര്യമുണ്ടെങ്കില്‍ ഞാനും ഭര്‍ത്താവും സപ്പോര്‍ട്ട് ചെയ്യും. പക്ഷേ സൗഭാഗ്യ സിനിമയില്‍ പോകുന്നതിനോട് എനിക്ക് യോജിപ്പില്ല. 

ഇപ്പോള്‍ അവള്‍ പി.എച്ച്.ഡി ചെയ്യാനുള്ള തയാറെടുപ്പിലാണ്. നന്നായി പഠിച്ച് ഒരു ജോലിയൊക്കെ നേടി വിവാഹം കഴിച്ച് കുടുംബമായി ജീവിച്ചുകാണുന്നതാണ് ഞങ്ങള്‍ക്കിഷ്ടം. 

സൗഭാഗ്യ: എനിക്കും അഭിനയിക്കാന്‍ താല്‍പ്പര്യമില്ല. ഇപ്പോള്‍ അമ്മയോടൊപ്പം ഡാന്‍സ് പ്രോഗ്രാമുകള്‍ ചെയ്യുന്നുണ്ട്. അഭിനയത്തേക്കള്‍ പ്രാധാന്യം ഞാന്‍ നല്‍കുന്നത് പഠനത്തിനാണ്. 

കല്യാണമൊക്കെ പിന്നെ ചിന്തിക്കേണ്ട വിഷയം. ഇപ്പോള്‍ ഞാനും എന്റെ അമ്മയും അച്ഛനും, പിന്നെ ഞങ്ങളുടെ പട്ടിക്കുട്ടികളും, മാത്രമുള്ള ലോകത്ത് ജീവിക്കുന്നതിന്റെ സുഖം സിനിമയില്‍നിന്ന് കിട്ടില്ല.

ഇഷ്ടമേഖലയില്‍ നിന്ന് ജീവിതപങ്കാളിയെയും കണ്ടുപിടിച്ചു?

എന്റെ ജീവിതത്തില്‍ ഒരു വിവാഹമുണ്ടാകുമെന്ന് ഒരിക്കലും പ്രതീക്ഷിച്ചിരുന്നില്ല. എന്നെ സംബന്ധിച്ച് ചെറുപ്രായം മുതല്‍ എന്റേതു മാത്രമായ ലോകം ഞാന്‍ തീര്‍ത്തു. എന്റെ കാഴ്ചപ്പാടുകള്‍, ഇഷ്ടാനിഷ്ടങ്ങള്‍. ഒരു തമാശകേട്ടാല്‍പ്പോലും പാടുപെട്ടാണ് ഞാന്‍ ചിരിച്ചിരുന്നത്.
അച്ഛനും അമ്മയും ഞങ്ങള്‍ മക്കള്‍ക്ക് ആവശ്യത്തിലധികം സ്വാതന്ത്ര്യം തന്നാണ് വളര്‍ത്തിയത്. എങ്കിലും സ്വന്തമായി ഉണ്ടാക്കിയ ചിട്ടകളിലൂടെയാണ് ഞാന്‍ ജീവിച്ചത്. എനിക്ക് വിവാഹം ആലോചിക്കുന്ന സമയത്താണ് എന്റെ അമ്മ രാജാറാമിനെ കാണുന്നത്.

അദ്ദേഹം അഭിനേതാവും അതിലുപരി നര്‍ത്തകനും കൊറിയോഗ്രാഫറും കൂടിയായിരുന്നു. ആദ്യ കാഴ്ചയില്‍ത്തന്നെ അമ്മയ്ക്ക് അദ്ദേഹത്തെ ഇഷ്ടമായി. അച്ഛന്‍ അദ്ദേഹത്തിന്റെ വീട്ടില്‍ പോയി സംസാരിച്ചു. താമസിയാതെ ഞങ്ങളുടെ വിവാഹനിശ്ചയവും നടന്നു. 

വിവാഹശേഷമാണ് ഞാനേറെക്കുറെ മാറിയത്. ചിറകിന്‍കീഴില്‍ സംരക്ഷിക്കുന്ന ഭര്‍ത്താവായിരിക്കുമെന്നാണ് ഞാന്‍ പ്രതീക്ഷിച്ചത്. എന്നാല്‍ അദ്ദേഹം അങ്ങനെയായിരുന്നില്ല. ഒരു കാര്യത്തിനും എന്റെ കൂടെ വരില്ല. എല്ലാക്കാര്യങ്ങളും ഞാന്‍ ഒറ്റയ്ക്ക് ചെയ്യണം. അദ്ദേഹം രാവിലെ വീട്ടില്‍നിന്ന് പോയിക്കഴിഞ്ഞാല്‍ വൈകിട്ടേ എത്തൂ. 

ഇതിനിടയില്‍ എന്ത് ആവശ്യമുണ്ടെങ്കിലും തന്നെത്താന്‍ പോയി ചെയ്യണമെന്ന് എന്നെ പഠിപ്പിച്ചത് അദ്ദേഹമാണ്. ആദ്യമൊക്കെ ചെറിയ ബുദ്ധിമുട്ട് തോന്നിയെങ്കിലും അദ്ദേഹം പറഞ്ഞതാണ് ശരിയെന്ന് മനസിലായി. സ്ത്രീകളെപ്പോഴും മറ്റുള്ളവരെ ആശ്രയിച്ച് നില്‍ക്കരുതെന്ന് അദ്ദേഹം പറയും.
എന്റെ അച്ഛനും അമ്മയ്ക്ക് വേണ്ടുവോളം സ്വാതന്ത്ര്യം കൊടുത്തിട്ടുണ്ട്. സത്യം പറഞ്ഞാല്‍ എന്റെ മകള്‍ പറയും, ഇത്രയും സപ്പോര്‍ട്ടീവായ ഭര്‍ത്താവിനെ കിട്ടിയത് എന്റെ ഭാഗ്യമാണെന്ന്. (താര പറഞ്ഞുനിര്‍ത്തിയതും മകള്‍ സൗഭാഗ്യ കുസൃതിച്ചിരിയുമായി അമ്മയ്ക്കരികിലെത്തി)
സൗഭാഗ്യ: രണ്ടുപേരും സ്‌നേഹിക്കുന്നതുപോലെ തന്നെ വഴക്കും കൂടാറുണ്ട് കേട്ടോ.

താര: ഇണക്കമുള്ളിടത്തല്ലേ പിണക്കവുമുണ്ടാകൂ. കാഴ്ചയില്‍ അല്‍പ്പം ഗൗരവം തോന്നുമെങ്കിലും നല്ല തമാശക്കാരനാണ് രാജാറാം. എന്റെ ഡാന്‍സ്‌ക്ലാസില്‍ പഠിക്കുന്ന കുട്ടികള്‍ക്കെല്ലാം അദ്ദേഹത്തെ വലിയ ഇഷ്ടമാണ്. 
വിവാഹം കഴിഞ്ഞ സമയത്ത് നിസാരകാര്യത്തിനുപോലും ഞാന്‍ വഴക്കിടുമായിരുന്നു. പിണങ്ങിക്കഴിഞ്ഞാല്‍ ഞാന്‍ അങ്ങോട്ടുകയറി മിണ്ടില്ല. കുറച്ചുകഴിയുമ്പോള്‍ അദ്ദേഹം തന്നെ വന്ന് പിണക്കം മാറ്റും. 

എന്നിട്ടു പറയും, 'ഞങ്ങള്‍ പുരുഷന്മാര്‍ നിങ്ങളുടെ അടുത്തുവന്ന് 'സോറി' പറയുന്നതുവരെ കാത്തിരിക്കരുത്, മാത്രമല്ല, ഇങ്ങനെ ചെറിയ കാര്യങ്ങള്‍ക്ക് വഴക്കുകൂടുന്നതും ശരിയല്ല.' അദ്ദേഹം പറഞ്ഞത് ശരിയാണെന്നെനിക്ക് മനസിലായി. എങ്കിലും, ഇപ്പോഴും വഴക്കുകൂടാറുണ്ട്. അതൊരു രസമാണ്. 
സൗഭാഗ്യ : രസമാണ്. പക്ഷേ ഒരു മകളായതുകൊണ്ട് രണ്ടുപേരുടേയും ഇടയില്‍ക്കിടന്ന് ഞാനാണ് കഷ്ടപ്പെടുന്നത്. 

താര: പറയുന്നതു കേട്ടാല്‍ത്തോന്നും ഞങ്ങളിവിടെ ഭയങ്കര വഴക്കാണെന്ന്. ചെറിയ കാര്യങ്ങളാണ് വഴക്കുകള്‍ക്ക് കാരണം. ആ സമയത്ത് എന്റെ പുന്നാരമോള്‍ തക്കംനോക്കി നില്‍ക്കും. ആദ്യം അച്ഛന്റെ കൂടെ, ഞാന്‍ അല്‍പ്പം സെന്റിയായാല്‍ നേരെ മലക്കംമറിഞ്ഞ് എന്റെ ഭാഗം നില്‍ക്കും. (എന്നിട്ട് മകളെ നോക്കി) 'അല്ലേ സൗഭൂ.'

സൗഭാഗ്യ: 'അതുപിന്നെ, ഒരാളോട് മാത്രം ഇഷ്ടം കാണിച്ചാല്‍ മറ്റേയാള്‍ക്ക് വിഷമമാകും. രണ്ടുപേരും എന്റെ ബെസ്റ്റ് ഫ്രണ്ട്‌സല്ലേ, അമ്മാ.