വ്യത്യസ്തത നിറഞ്ഞ കഥാപാത്രങ്ങള്‍ വെള്ളിത്തിരയില്‍ അവതരപ്പിക്കുന്ന കോളിവുഡ് താരം വിക്രം കാക്കിയണിഞ്ഞ് കാണാനുള്ള ആരാധകരുടെ ഏറെക്കാലമായുള്ള ആഗ്രഹം സഫലമാകുന്നു. കരുത്തനായ പോലീസ് ഓഫീസറുടെ കഥപറഞ്ഞ ആക്ഷന്‍ ചലച്ചിത്രം സാമിയുടെ രണ്ടാം ഭാഗത്തിലൂടെയാകും വിക്രം വീണ്ടും കാക്കിയണിയുക. ഈ വര്‍ഷം ഏപ്രിലോടെ ചിത്രത്തിന്റെ ചിത്രീകരണം തുടങ്ങുമെന്ന് നിര്‍മാതാവ് ഷിബു തമീന്‍സ് പറഞ്ഞു. 'സാമി' സംവിധാനം ചെയ്ത ഹരിതന്നെയാകും ചിത്രത്തിന്റെ രണ്ടാം ഭാഗവും സംവിധാനം ചെയ്യുക. ഹാരിസ് ജയരാജാണ് ചിത്രത്തിലെ ഗാനങ്ങള്‍ക്ക് ഈണം പകരുക. 2003ല്‍ പുറത്തിറങ്ങിയ സാമി വിക്രമിന്റെ കരിയര്‍ ഗ്രാഫ് ഏറെയുയര്‍ത്തിയ ചിത്രമായിരുന്നു.