കോവളത്ത് തമിഴ് പടം ഷൂട്ടിങ്; ഡാന്സുണ്ടോ, ചാന്സുണ്ടോ എന്നു ചോദിച്ചു സായിപ്പും
വിനോദസഞ്ചാര സീസണ് തിരക്കിനിടെ കോവളം ലൈറ്റ് ഹൗസ് തീരത്തു കഴിഞ്ഞദിവസം അരങ്ങേറിയ തമിഴ്സിനിമാ പാട്ടു ചിത്രീകരണം വിദേശികളുള്പ്പെടെ സഞ്ചാരികള്ക്കു കാഴ്ചവിരുന്നായി. ഇതിനിടെ ചാന്സ് ചോദിച്ച് എത്തിയ വിദേശസഞ്ചാരി ഡയറക്ടറടക്കം അണിയറക്കാര്ക്കു കൗതുകവുമായി. തമിഴിലെ യുവസംവിധായകന് മോസസ് മുത്തുപാണ്ടി ആദ്യമായി സ്വതന്ത്ര സംവിധായകനാവുന്ന 'പതുങ്ങിപ്പായണം തല' എന്ന ചിത്രത്തിലെ പാട്ടു ചിത്രീകരണമാണു കഴിഞ്ഞ ദിവസം തീരത്ത് അരങ്ങേറിയത്. തമിഴ് നടന് മൈക്കിള്, മലയാളി കൂടിയായ നടി റിയ എന്നിവര് നായികാനായകന്മാരാകുന്ന ചിത്രമാണിതെന്നു സംവിധായകന് പറഞ്ഞു.
ചിത്രീകരണം തീരത്തു വെയില് കാഞ്ഞുകിടന്ന വിദേശികളുള്പ്പെട്ട സഞ്ചാരി സംഘത്തിനു കണ്ണിനു ചാകരയായി. ഇതിനിടെയാണു വിദേശ സഞ്ചാരികളിലൊരാളായ പീറ്റര് ചാന്സ് തേടി യുവസംവിധായകനെ സമീപിച്ചത്. താന് ഡാന്സറാണെന്നും അഭിനയമോഹം വല്ലാതെയുണ്ടെന്നും പീറ്റര് പറഞ്ഞപ്പോള് ഡയറക്ടര് അന്ധാളിച്ചു നിന്നു. പിന്നെ പതിയെ രംഗത്തുനിന്നു മാറി.
അഭിനയമോഹവുമായി ഡയറക്ടര് കമലിന്റെ അടുത്തുവരെ പോയ ആളാണ് താനെന്നു കൂടി പീറ്റര് പറഞ്ഞു. വര്ഷങ്ങളായി ഇന്ത്യയില് വന്നുപോകുന്ന തനിക്ക് ഈ രാജ്യം ഏറെ പ്രിയപ്പെട്ടതാണെന്നും പീറ്റര് പറഞ്ഞു. പീറ്ററിനെപ്പോലെ സിനിമയില് ഡാന്സ് ഉള്പ്പെടെ മറ്റു മേഖലകളിലെ സാധ്യതകള് തേടി മറ്റു വിദേശികളും ഈ സിനിമാസംഘത്തെ വളയുന്നതു കണ്ടു.
https://www.facebook.com/Malayalivartha
