എ.കെ ബാലന്‍ അഡ്ജസ്റ്റ് ചെയ്തു; ഭാര്യയ്ക്ക് നിയമനമായി
മുന്‍ വൈദ്യുതമന്ത്രി എ.കെ. ബാലന്റെ ഭാര്യ ഡോ. ജമീലയെ പാലക്കാട് ഗവ. മെഡിക്കല്‍ കോളേജിന്റെ സ്‌പെഷ്യല്‍ ഓഫീസറായി നിയമിക്കാന്‍ സര്‍ക്കാര്‍ തീരുമാനിച്ചു. പാലക്കാട് എം.എല്‍.എ ഷാഫി പറമ്പിലിന്റെ എതിര്‍പ്പ് മറികടന്നാണ് വി.എസ്. ശിവകുമാര്‍ തീരുമാനമെടുത്തത്. എന്നാല്‍ ശിവകുമാര്‍ വിചാരിച്ചാല്‍ മാത്രം മുന്‍മന്ത്രി ബാലന്റെ ഭാര്യയെ ഉന്നതസ്ഥാനത്ത് നിയമിക്കാനാവില്ല. ഇതിനര്‍ത്ഥം ഉമ്മന്‍ചാണ്ടി ഇക്കാര്യത്തില്‍ ഇടപെട്ടു എന്നുതന്നെയാണ്.
കഴിഞ്ഞവര്‍ഷം ഡോ. ജമീല ആരോഗ്യവകുപ്പ് ഡയറക്ടര്‍ സ്ഥാനത്ത് നിന്നും വിരമിച്ചിരുന്നു. സര്‍ക്കാര്‍ അവരുടെ സേവനകാലാവധി ഒരുവര്‍ഷം നീട്ടികൊടുത്തു. മന്ത്രിസഭയുടെ തീരുമാനപ്രകാരമാണ് സേവനം നീട്ടിനല്‍കിയത്. കോണ്‍ഗ്രസ് സംഘടനകള്‍ അന്നും ഡോ. ജമീലയ്‌ക്കെതിരെ രംഗത്തുവന്നെങ്കിലും ഉമ്മന്‍ചാണ്ടിയും ശിവകുമാറും വഴങ്ങിയില്ല.
മുന്‍മന്ത്രി ബാലന്‍ സര്‍ക്കാരിനെതിരെ ഒരക്ഷരം മിണ്ടാത്തതിനു പിന്നിലെ കാരണം ചികയുന്നവര്‍ ജമീലയുടെ നിയമനകാര്യം മനസിലാക്കിയാല്‍ മതി. പാലക്കാട് മെഡിക്കല്‍ കോളേജിനെതിരെ വ്യാപകമായ പ്രതിഷേധം കോണ്‍ഗ്രസ് തന്നെ ഉയര്‍ത്തിയിരുന്നു. പി.എസ്.സി. വഴിയല്ലാതെ മെഡിക്കല്‍ കോളേജിലേയ്ക്ക് സര്‍ക്കാര്‍ നേരിട്ട് നിയമനം നടത്തിയിരുന്നു. സി.പി.എം. അനുഭാവികള്‍ക്കും സര്‍ക്കാര്‍ നിയമനം നല്‍കിയെന്ന് ചുരുക്കം. പട്ടികജാതിക്കാര്‍ക്കുള്ള ഫണ്ട് മെഡിക്കല്‍ കോളേജിന്റെ പേരില്‍ വകമാറ്റിയതായും ആരോപണം ഉയര്‍ന്നിരുന്നു. എന്നിട്ടും സര്‍ക്കാര്‍ ഇക്കാര്യം ഏറ്റുപിടിച്ചില്ല.
യുവമോര്‍ച്ച ഇതിനെതിരെ സമരരംഗത്തെത്തിയെങ്കിലും സി.പി.എമ്മിന്റെ യുവജനസംഘടനകള്‍ നിശബ്ദത പാലിച്ചു. നിലവില്‍ വിരമിച്ച ഐ.എ.എസ് ഉദ്യോഗഗസ്ഥനാണ് മെഡിക്കല്‍ കോളേജിന്റെ സ്‌പെഷ്യല്‍ ഓഫീസര്‍ തസ്തികയിലുള്ളത്. ഒരു മന്ത്രിയാണ് നിയമനത്തിന് പിന്നിലെന്നറിയുന്നു. വിഷയം സി.പി.എമ്മിനുള്ളില്‍ ഒച്ചപ്പാടുണ്ടാക്കിയിട്ടുണ്ട്. എന്നാല്‍ സി.പി.എം. സംസ്ഥാന നേതാക്കള്‍ ബാലനൊപ്പമാണ്.
ബാലന്റെ അഡ്ജസ്റ്റ്‌മെന്റ് സി.പി.എം. ജില്ലാ നേതാക്കളെ അലോസരപ്പെടുത്തിയിട്ടുണ്ട്. എന്നാല്‍ ബാലന്റെ കാര്യത്തില്‍ എതിര്‍നിലപാടെടുക്കാന്‍ പിണറായിയോ കൊടിയേരിയോ തയ്യാറാവുകയില്ല. ബാലന്റെ വിഷയം ജില്ലാനേതാക്കള്‍ സംസ്ഥാന കമ്മിറ്റിയ്ക്ക് മുമ്പാകെ കൊണ്ടുവന്നെങ്കിലും ഇത്തരം സംഭവങ്ങള്‍ മേലില്‍ അവതരിപ്പിക്കരുതെന്ന് സംസ്ഥാന നേതാക്കള്‍ അന്ത്യശാസനം നല്‍കിയിട്ടുണ്ട്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
