ഐ ജി ടോമിന്‍ ജെ തച്ചങ്കരി മുഖം മിനുക്കാനൊരുങ്ങുന്നു. സര്‍വീസിന്റെ അവസാന ഘട്ടത്തിലാണ് അദ്ദേഹം അഴിമതിരഹിത സ്വപ്നവുമായി രംഗത്തെത്തിയിരിക്കുന്നത്. കണ്‍സ്യൂമര്‍ഫെഡ് എന്ന അഴിമതി സ്ഥാപനത്തെ നന്നാക്കാന്‍ ഇറങ്ങി തിരിച്ചിരിക്കുകയാണ് വിജിലന്‍സ് കേസുകളുടെ സഹയാത്രികനായ ടോമിന്‍ തച്ചങ്കരി. എന്നാല്‍ തച്ചങ്കരിയുടെ അഴിമതിരഹിത വിപ്ലവത്തിന് പിന്നില്‍ എ ഗ്രൂപ്പിന് കൈയുണ്ടോ എന്നാണ് ഐ ഗ്രൂപ്പിന്റെ സംശയം.
റിജി ജി നായരുടെ ഭരണകാലത്ത് കണ്‍സ്യൂമര്‍ഫെഡ് അഴിമതിക്ക് പേരുകേട്ട സ്ഥാപനമായിരുന്നു. ഇതിന്റെ പേരില്‍ റിജി ജി നായര്‍ സസ്‌പെന്റ് ചെയ്യപ്പെട്ടു. മദ്യ വ്യവസായത്തിലാണ് തച്ചങ്കരിക്ക് കമ്പമെന്ന് കണ്‍സ്യൂമര്‍ഫെഡ് പ്രസിഡന്റ് പറയുന്നു. എന്നാല്‍ മദ്യ വ്യവസായത്തിലുള്ള കമ്പമല്ല ഇമേജിലുള്ള കമ്പമാണ് തച്ചങ്കരിക്കുള്ളതെന്ന് തച്ചങ്കരിയെ നന്നായറിയുന്നവര്‍ പറയുന്നു.
തച്ചങ്കരിയുടെ കരിയര്‍ ഗ്രാഫിലെ കറുത്ത പൊട്ടുകളെ കുറിച്ച് വര്‍ഷങ്ങള്‍ക്കു മുമ്പേ വാര്‍ത്തയുണ്ട്. നേരത്തെ സിംഗപ്പൂരില്‍ നിന്നും ക്യാമറകള്‍ കടത്തിയെന്ന ആരോപണം അദ്ദേഹം നേരിട്ടിരുന്നു. മാര്‍ക്‌സിസ്റ്റുകാരുടെ വിപ്ലവചാനലിലേയ്ക്ക് വാങ്ങിയ ക്യാമറകള്‍ കൊണ്ടുവന്നത് തച്ചങ്കരിയാണെന്ന ആക്ഷേപം ഏറെ നാള്‍ പിടിച്ചുലച്ചിരുന്നു.
വരവില്‍ കവിഞ്ഞ സ്വത്ത് സമ്പാദനവും തച്ചങ്കരിക്ക് മേല്‍ ആരോപിക്കപ്പെട്ടിരുന്നു. നിരവധി അന്വേഷണങ്ങളും നടന്നു. പ്രതിപക്ഷ നേതാവ് വിഎസ് അച്യുതാനന്ദന്‍ തച്ചങ്കരിയ്‌ക്കെതിരെ രംഗത്തെത്തിയിരുന്നു. ഉമ്മന്‍ചാണ്ടിയുടെ കൃപാ കടാക്ഷത്തിലാണ് അദ്ദേഹം സര്‍വീസില്‍ തിരിച്ചെത്തിയത്. കണ്‍സ്യൂമര്‍ഫെഡിന്റെ ചുമതലയുള്ളത് ഐ ഗ്രൂപ്പ് മന്ത്രി സി എന്‍ ബാലകൃഷ്ണനാണ്. സിഎന്‍ ബാലകൃഷ്ണന്‍ രമേശ് ചെന്നിത്തലയുടെ വിശ്വസ്തനാണ്. സി എന്‍ ബാലകൃഷ്ണനെ നിലംപരിശാക്കാനാണ് തിരുവഞ്ചൂര്‍ രാധാകൃഷ്ണന്‍ കണ്‍സ്യൂമര്‍ഫെഡില്‍ റെയ്ഡ് നടത്തിയത്. ഉമ്മന്‍ചാണ്ടിയോട് കൂറു പുലര്‍ത്താനാണ് കണ്‍സ്യൂമര്‍ഫെഡില്‍ വിപ്ലവം നടത്തുന്നതെന്ന് ഐ ഗ്രൂപ്പുകാരുടെ സംശയത്തില്‍ ന്യായമുണ്ട്.
സര്‍വീസില്‍ കയറിയ കാലം മുതല്‍ തച്ചങ്കരി വിവാദനായകനാണ്. അഴിമതി ആരോപണങ്ങള്‍ വഴി ദീര്‍ഘകാലം സര്‍വീസിനു പുറത്താണ് കഴിച്ചു കൂട്ടിയത്. ഇന്നത്തെ കാലത്ത് ജനങ്ങള്‍ അഴിമതി പൊറുക്കില്ല. പക്ഷേ എന്തു ചെയ്താലും ഒരു നല്ലപേര് അദ്ദേഹത്തിന് കിട്ടാന്‍ മറ്റുള്ളവര്‍ സമ്മതിക്കില്ലെന്നു തോന്നുന്നു. പാറമട പ്രശ്‌നത്തില്‍ ഇന്നും കിട്ടി പുതിയ ഒരു വിജിലന്‍സ് അന്വേഷണം കൂടി. എന്താ ചെയ്ക.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha