പുര കത്തുമ്പോള് തന്നെ വാഴ വെട്ടണം... സുരേഷ് ഗോപിയെ വിമര്ശിച്ചും സുകുമാരന് നായരെ അനുകൂലിച്ചും സിപിഎം
സമുദായ ആചാര്യന്മാരെ ഒരു കാലത്തും മൈന്ഡ് ചെയ്യാത്ത സിപിഎം പുര കത്തിയപ്പോള് തന്നെ വാഴ വെട്ടു തുടങ്ങി. ഇനി വരാന് പോകുന്ന സംസ്ഥാന തെരഞ്ഞെടുപ്പാണ് മുഖ്യം. ഹിന്ദു വേട്ടുകള് സിപിഎമ്മില് നിന്നും ചോരുന്നുവെന്ന് പാര്ട്ടി നേരത്തെ തന്നെ കണ്ടെത്തിയിരുന്നു. അതിന്റെ ഭാഗമാണ് ഹൈന്ദവ ആചാരങ്ങളും ആഘോഷങ്ങളും പാര്ട്ടിയും ആഘോഷിച്ചത്. ബിജെപിയുടെ വളര്ച്ച പാര്ട്ടിയെ ദോഷം ചെയ്യും എന്ന് തന്നെയാണ് പാര്ട്ടിയുടെ ഭയം. അതിനാലാണ് സമുദായ നേതാക്കളെ ഒപ്പം കൂട്ടാന് പാര്ട്ടി ശ്രമിക്കുന്നത്. എന്നും സിപിഎമ്മിന് അനുകൂലമായി നിന്നിരുന്ന എസ്എന്ഡിപി മാനസികമായി മോഡിയ്ക്കൊപ്പമാണ്.
ഇനിയുള്ളത് എന്എസ്എസാണ്. അവരാകട്ടെ സമദൂരം പറഞ്ഞ് പറഞ്ഞ് ആര് ജയിക്കുന്നോ അവര്ക്കൊപ്പം നിന്ന് ശരിദൂരമാക്കി എല്ലാ സ്ഥാനമാനങ്ങളും നേടുകയും ചെയ്യും. ഇങ്ങനെ ഇരിക്കുന്ന സമയത്താണ് സുരേഷ് ഗോപിയെ സുകമാരന്നായര് ആട്ടിയിറക്കിയത്. സോഷ്യലിസം എന്നും പ്രസംഗിക്കുന്ന കമ്മ്യൂണിസ്റ്റുകാര് ഈ ബൂര്ഷ്വാ ആട്ടിയിറക്കലിനെതിരെ മിണ്ടിയില്ലെന്നു മാത്രമല്ല സുകുമാരന് നായരെ അനുകൂലിച്ച് നിയമസഭയില് പരാമര്ശം നടത്തുകയും ചെയ്തു. ഇരയായ സുരേഷ് ഗോപിയെ തള്ളി പറയുകയും ചെയ്തു.
മന്നം സമാധിയില് പോകാന് സുരേഷ്ഗോപിയെന്താ മന്നത്തിന്റെ കൊച്ചുമകനാണോ എന്ന് ജി. സുധാകരന് എംഎല്എ പറഞ്ഞത്. സുരേഷ്ഗോപി പണ്ടേ വിവരം കെട്ടവനാണെന്നും സുധാകരന് കൂട്ടിച്ചേര്ത്തു. രാവിലെ കമ്മ്യൂണിസ്റ്റ്, ഉച്ചയ്ക്ക് കോണ്ഗ്രസ്,വൈകിട്ട് ബിജെപി എന്ന രീതിയില് നടക്കുന്ന സുരേഷ്ഗോപി ആരൊക്കെ സീറ്റ് നല്കിയാലും മത്സരിക്കുമെന്നും ഇത്തരക്കാര് കലാകാരന്മാരല്ല, കലാ ആഭാസന്മാരാണെന്നും ജി. സുധാകരന് പറഞ്ഞു. നിയമസഭയിലാണ് സുധാകരന് സുരേഷ്ഗോപിയ്ക്കെതിരെ ആഞ്ഞടിച്ചത്.
അതേസമയം ബിജെപിക്ക് താക്കീതുമായി പിണറായിയും രംഗത്തെത്തി. കയ്യൂക്ക് കൊണ്ട് രാഷ്ട്രീയം കളിച്ച് ആളുകളെ ഭയപ്പെടുത്തി വരുതിയില് നിര്ത്താം എന്ന ബിജെപി നയം കേരളത്തില് നടപ്പില്ലെന്ന് സിപിഐ എം പൊളിറ്റ് ബ്യൂറോയംഗമായ പിണറായി വിജയന് പറഞ്ഞു. ഫേസ്ബുക്കിലൂടെയാണ് പിണറായി ഈ അഭിപ്രായം രേഖപ്പെടുത്തിയത്. സുരേഷ് ഗോപിയെ ഇറക്കിവിട്ട നടപടിയില് പ്രതിഷേധിച്ച് ബിജെപി പ്രവര്ത്തകര് എന്എസ്എസ് ജനറല് സെക്രട്ടറി സുകുമാരന്നായരുടെ കോലവും കത്തിച്ചതിനെ തുടര്ന്നായിരുന്നു പിണറായിയുടെ പ്രതികരണം. എന്എസ്എസ് അടക്കമുള്ള സംഘടനകള് തങ്ങളുടെ വാലായി നില്ക്കണമെന്നാണ് ആര്എസ്എസ് ആഗ്രഹിക്കുന്നത്. അതിനു ഭംഗം വരുമ്പോള് ഇത്തരം ഹീനമായ നീക്കമുണ്ടാകുന്നു. കയ്യൂക്ക് കൊണ്ട് ആളുകളെ ഭയപ്പെടുത്തി വരുതിയില് നിര്ത്താം എന്ന അഹങ്കാരം കേരളത്തില് നടപ്പില്ലെന്ന് പിണറായി വിജയന് പറഞ്ഞു.
ഈ രണ്ടു സിപിഎം നേതാക്കളുടേയും ലക്ഷ്യം തെരഞ്ഞെടുപ്പ് തന്നെ. സുകുമാരന് നായരെ സന്തോഷിപ്പിച്ച് നായര് സമൂഹത്തിന്റെ വോട്ട് പെട്ടിയിലാക്കി ഹൈന്ദവ ചോര്ച്ച തടയുകയാണ് ഇവരുടെ ലക്ഷം.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
