അരുവിക്കരയിലെ ജനങ്ങള്‍ ബാര്‍കോഴയെ തള്ളിക്കളഞ്ഞപ്പോള്‍ വീണ്ടും മാണി ശ്രദ്ധാകേന്ദ്രമാകുന്നു. ഭരണം തിരിച്ചു പിടിക്കണമെങ്കില്‍ ഇനി മാണിയല്ലാതെ മറ്റൊരു പോംവഴി ഇടതുപക്ഷത്തിനില്ല. വലതുപക്ഷത്തിനാകട്ടെ മാണിയെ വിട്ടാല്‍ ഭരണവും പോകും എന്ന അവസ്ഥയിലാണ്. ഈ അവസ്ഥയിലാണ് മാണി ഇപ്പോള്‍ ശ്രദ്ധാകേന്ദ്രമാകുന്നത്.
അങ്ങനെ അരുവിക്കരയില്‍ ശബരീനാഥിനൊപ്പം ജയിച്ചു കയറിയത് ധനമന്ത്രി കെ എം മാണിയുടെ അമ്പതാണ്ടത്തെ കറ കളഞ്ഞ ഇമേജ് കൂടിയായിരുന്നു. ബാര്‍ക്കോഴ പറഞ്ഞ് മാണിയെ തറപറ്റിക്കാനുള്ള പ്രതിപക്ഷത്തിന്റെ ശ്രമങ്ങളാണ് അരുവിക്കരയില്‍ തോറ്റുതുന്നം പാടിയത്.
അമ്പതു വര്‍ഷത്തെ നിയമസഭാ ജീവിതമുള്ള കെ എം മാണി അദ്ദേഹത്തിന്റെ അമ്പതാംവര്‍ഷം വരെ ഒരു ആരോപണത്തിനും ഇട നല്‍കിയില്ല. മതി കെട്ടാന്‍ വിവാദം കൊടുമ്പിരിക്കൊണ്ടപ്പോഴും അത് മാണിയുടെ ഇമേജിന് കളങ്കം ചാര്‍ത്തിയില്ല. മാണിയുടെ ബന്ധുക്കള്‍ മതികെട്ടാനില്‍ മല കൈയേറിയെന്ന ആരോപണം ഉന്നയിച്ച പി. സി. ജോര്‍ജ് ഒടുവില്‍ അഡ്വ. എം എം മാത്യു നല്‍കിയ മാനനഷ്ടകേസില്‍ പ്രതിയായി നഷ്ടപരിഹാരം നല്‍കേണ്ടി വന്നു.
ബാര്‍ക്കോഴ ആരോപണം മാണിക്ക് മേല്‍ ചാര്‍ത്തപ്പെട്ടതിനു പിന്നിലുള്ള രാഷ്ട്രീയം ഏവര്‍ക്കുമറിയാം. മാണിയെ മുഖ്യമന്ത്രിയാക്കാന്‍ ഇടതു പക്ഷം ചരടു വലിക്കുന്നതിനിടയിലാണ് മാണി ആരോപണ വിധേയനായത്. മുഖ്യമന്ത്രിയല്ലെങ്കിലും ഉമ്മന്‍ചാണ്ടി മന്ത്രിസഭയിലെ മന്ത്രി മുഖ്യനായിരുന്ന കെ എം മാണിക്ക് അകത്ത് നിന്നേറ്റകുത്തലാണ് കൂടുതല്‍ ഏറ്റത്.
കോണ്‍ഗ്രസിലെ ഒരു വിഭാഗം തന്നെയാണ് മാണിയെ വെള്ളത്തിലാക്കിയത്. മാര്‍ക്‌സിസ്റ്റ് പാര്‍ട്ടിയാകട്ടെ സ്ഥിതി കൂടുതല്‍ ഗുരുതരമാക്കി. അരുവിക്കരയില്‍ മാണിയെ കയറ്റരുതെന്ന് വരെ പി.സി. ജോര്‍ജ് പറഞ്ഞു. എന്നാല്‍ പാലാക്കാരനായ മാണി അരുവിക്കരയില്‍ കയറിചെന്ന് ജോര്‍ജിന്റെ പള്ള തകര്‍ത്തു. അരുവിക്കരയില്‍ ശബരീനാഥന്‍ തോറ്റിരുന്നെങ്കില്‍ തീര്‍ച്ചയായും അത് കെ എം മാണിയുടെ പിടലിക്ക് ചാരിയേനെ.
ചുരുക്കത്തില്‍ മാണിക്കെതിരെ ഉയര്‍ന്ന ആരോപണങ്ങളെല്ലാം തെറ്റാണെന്ന് അരുവിക്കര തെളിയിച്ചിരിക്കുകയാണ്. അകത്തു നിന്നും പുറത്തു നിന്നും കുത്തിയവര്‍ക്ക് ഇനി വയോധികനായ കെ എം മാണിയോട് മാപ്പിരക്കാം. ചെയ്യാതിരുന്നാല്‍ അനന്തര തലമുറകള്‍ അനുഭവിക്കേണ്ടി വരും. കൂടാതെ പി.സി.ജോര്‍ജിന്റെയും പി.സി. തോമസിന്റെയും ഗതി വരികയും ചെയ്യും.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha