തിരു: സംസ്ഥാനത്ത്‌ സ്വകാര്യപണമിടപാടുകാര്‍ അമിത പലിശ ഈടാക്കുന്നത്‌ നിരോധിച്ചു. നിയമം ഐകകണ്‌ഠേനയാണ്‌ നിയമസഭ പാസാക്കിയത്‌. കേരള അമിതപലിശ ഈടാക്കാല്‍ നിരോധന നിയമം ചരിത്രത്തില്‍ ഇടംനേടുമെന്ന്‌ ബില്‍ അവതരിപ്പിച്ച ധന-നിയമ മന്ത്രി കെഎം മാണി പറഞ്ഞു. ബാങ്കുകള്‍ ഈടാക്കുന്ന പലിശയെ സംബന്ധിക്കുന്ന കാര്യങ്ങള്‍ തീരുമാനിക്കുന്നതും ബാങ്കുകള്‍ക്ക്‌ നിര്‍ദ്ദേശം നല്‍കുന്നതും റിസര്‍വ്‌ ബാങ്കാണ്‌. കമേഴ്‌സ്യല്‍ ബാങ്കുകള്‍ ഈടാക്കുന്ന പലിശയേക്കാള്‍ 2 ശതമാനത്തില്‍ കൂടുതല്‍ പലിശ ഈടാക്കാന്‍ ആരെയും അനുവദിക്കരുതെന്ന്‌ റിസര്‍വ്‌ ബാങ്ക്‌ സര്‍ക്കാരിന്‌ നിര്‍ദ്ദേശം നല്‍കിയിട്ടുണ്ട്‌. ഇത്‌ പ്രാവര്‍ത്തികമാക്കാന്‍ നിലവിലുള്ള മണി ലെന്റേഴ്‌സ്‌ ആക്ടില്‍ വ്യവസ്ഥയുണ്ട്‌. 
എന്നാല്‍ മണി ലെന്റേഴ്‌സ്‌ ആക്ടിന്‌ കീഴില്‍ സൊസൈറ്റികളും കമ്പനികളും മറ്റ്‌ പണമിടപാടുസ്ഥാപനങ്ങളും വരികയില്ല. നിയമമനുസരിച്ച്‌ ബാങ്കുകള്‍ ഒഴികെയുള്ള പണമിടപാട്‌ സ്ഥാപനങ്ങളും വ്യക്തികളും കമേഴ്‌സ്യല്‍ ബാങ്കുകളെക്കാള്‍ രണ്ട്‌ ശതമാനത്തില്‍ കൂടുതല്‍ പലിശ ഈടാക്കി പണം നല്‍കുന്നത്‌ നിരോധിക്കും.
കൂടുതല്‍ പലിശ ഈടാക്കിയാല്‍ കോടതിയില്‍ അപേക്ഷ നല്‍കി മര്യാദപലിശ അനുസരിച്ച്‌ കടം പുന:ക്രമീകരിക്കാം. ഈടാക്കിയ അമിത പലിശ മുതലില്‍ വകവയ്‌ക്കാം.
അമിത പലിശ ഈടാക്കിയാല്‍ മൂന്നുകൊല്ലം വരെ തടവും 50,000 രൂപ പിഴയും ചുമത്തുമെന്ന്‌ മന്ത്രി കെഎം മാണി പറഞ്ഞു.
അമിത പലിശ ഈടാക്കുന്നതിനായി വ്യക്തികളെ പീഡിപ്പിച്ചാല്‍ ഒരുകൊല്ലം തടവും 10,000 രൂപ പിഴയും ഈടാക്കും. പീഡനം ആത്മഹത്യയിലേക്ക്‌ നയിച്ചാല്‍ 5 കൊല്ലം തടവും 50,000 രൂപയും ഈടാക്കും.
അമിത പലിശ ഈടാക്കുന്നവര്‍ക്ക്‌ ജാമ്യം കിട്ടാത്ത വകുപ്പുകളാണ്‌ വ്യവസ്ഥ ചെയ്‌തിരിക്കുന്നത്‌. അമിത പലിശക്കെതിരെ കോടതിക്കും പൊലീസിനും നടപടി സ്വീകരിക്കാന്‍ സാധിക്കുമെന്ന്‌ മന്ത്രി കെഎം മാണി പറഞ്ഞു.
ബ്ലേഡ്‌ കമ്പനികളെ നിലക്കുനിര്‍ത്താനും പലിശ മാഫിയില്‍ നിന്നും പാവങ്ങളെ രക്ഷിക്കാനും നിയമത്തിന്‌ കഴിയുമെന്ന്‌ മന്ത്രി പറഞ്ഞു.