കുവൈത്തില്‍ വീണ്ടും ഡീസല്‍ കള്ളക്കടത്ത് നടന്നതായി ആഭ്യന്തര മന്ത്രാലയം. ഡീസല്‍ കള്ളക്കടത്ത് ശൃംഖലയ്‌ക്കെതിരായ തുടര്‍ച്ചയായ നടപടികളുടെ ഭാഗമായി സുരക്ഷാ സേന 10 ടാങ്കര്‍ ട്രക്കുകള്‍ പിടിച്ചെടുത്തതായി കുവൈത്ത് ആഭ്യന്തര മന്ത്രാലയം ബുധനാഴ്ച അറിയിച്ചു. ജഹ്‌റ ഗവര്‍ണറേറ്റിലെ ഖുവൈസത്ത് പ്രദേശത്ത് രാജ്യത്തിന് പുറത്തേക്ക് ഡീസല്‍ ഇന്ധനം കടത്തുന്നതിന് മുമ്പ് ടാങ്കറുകള്‍ തടഞ്ഞതായി മന്ത്രാലയം ഒരു പത്രക്കുറിപ്പില്‍ പറഞ്ഞു.

ടാങ്കറുകളുടെ കസ്റ്റംസ് ഡാറ്റയില്‍ കൃത്രിമം കാണിച്ചതായി അന്വേഷണത്തില്‍ കണ്ടെത്തി. സംഭവത്തില്‍ ഉള്‍പ്പെട്ടവര്‍ക്കെതിരെ നിയമനടപടി സ്വീകരിക്കുന്നതിനുള്ള തയ്യാറെടുപ്പിനായി ജഹ്‌റ ഗവര്‍ണറേറ്റിലെ ക്രിമിനല്‍ അന്വേഷകര്‍ കേസ് അന്വേഷിക്കുന്നത് തുടരുകയാണെന്ന് ആഭ്യന്തര മന്ത്രാലയം കൂട്ടിച്ചേര്‍ത്തു. ഇന്ധന കള്ളക്കടത്ത് ചെറുക്കുന്നതിനും രാജ്യത്തിന്റെ വിഭവങ്ങള്‍ സംരക്ഷിക്കുന്നതിനുമുള്ള പ്രതിബദ്ധത മന്ത്രാലയം വീണ്ടും ആവര്‍ത്തിച്ചു.