എച്ച്1 എന്1 പനിക്കെതിരെ പൊതുജനം കൂടുതല് ജാഗ്രതപാലിക്കണമെന്ന് ആരോഗ്യവകുപ്പിന്റെ മുന്നറിയിപ്പ്
സംസ്ഥാനത്ത് ഭീതിയുയര്ത്തി എച്ച്1 എന്1 വ്യാപകം. ആശങ്കപ്പെടേണ്ട സാഹചര്യമില്ലെങ്കിലും എച്ച്1 എന്1 പനിക്കെതിരെ പൊതുജനം കൂടുതല് ജാഗ്രതപാലിക്കണമെന്നാണ് ആരോഗ്യവകുപ്പിന്റെ മുന്നറിയിപ്പ്.
നാലുവയസ്സുകാരന് ഉള്പ്പെടെ ശനിയാഴ്ച മൂന്നുപേരാണ് രോഗം ബാധിച്ച് മരിച്ചത്. തിരുവനന്തപുരം കല്ലിയൂര് സ്വദേശി സൂരജ് കൃഷ്ണന് (നാല്), കൊല്ലം കൊറ്റങ്കര സ്വദേശി സ്റ്റൈഫി (23), കോഴിക്കോട് ഇരിങ്ങാല് സ്വദേശി സുധ (37) എന്നിവരാണ് മരിച്ചത്. ഇതോടെ ഇക്കൊല്ലം എച്ച്1 എന്1 ബാധിച്ച് സംസ്ഥാനത്ത് 53 പേര് മരിച്ചെന്നാണ് ആരോഗ്യവകുപ്പിന്റെ കണക്ക്. എന്നാല്, സ്വകാര്യ ആശുപത്രികളിലെ കണക്കുകള് കൂടി വരുമ്പോള് മരണസംഖ്യ ഉയരും.
പഴുതടച്ച പ്രതിരോധ പ്രവര്ത്തനങ്ങള് ആരോഗ്യവകുപ്പിന്റെയും വിവിധ തദ്ദേശസ്ഥാപനങ്ങളുടെയും നേതൃത്വത്തില് നടക്കുന്നെന്ന് അവകാശപ്പെടുമ്പോഴും രോഗവ്യാപനത്തിന് കുറവില്ലെന്നാണ് കണക്കുകള് വ്യക്തമാക്കുന്നത്. ഇതിനിടെ തിരുവനന്തപുരം, വിളപ്പില് പഞ്ചായത്ത് പ്രദേശത്ത് ഭിന്നശേഷിക്കാരായ നാലുപേര് അടുത്തിടെ മരിച്ചത് എച്ച്1എന്1 ആണെന്ന ഭീതി പരന്നിരുന്നു. എന്നാല്, ജില്ല മെഡിക്കല് ഓഫിസറുടെ നേതൃത്വത്തില് നടത്തിയ പരിശോധനയില്, മരിച്ചവരില് ഒരു കുട്ടി ഒഴികെയുള്ളവര്ക്ക് മറ്റ് ആരോഗ്യപ്രശ് നങ്ങളാണ് മരണകാരണമായതെന്ന് ബോധ്യപ്പെട്ടു. കുട്ടിക്ക് എച്ച്1 എന്1 സ്ഥിരീകരിച്ചിരുന്നതായി ജില്ല മെഡിക്കല് ഓഫിസര് അറിയിച്ചു.
പനി, ജലദോഷം, ചുമ, ശരീരവേദന, തൊണ്ടവേദന, വിറയല്, ക്ഷീണം, ചിലരില് ശ്വാസതടസ്സവും അനുഭവപ്പെടും. ഈ ലക്ഷണങ്ങള് സാധാരണ സമയം കൊണ്ട് കുറയുന്നില്ലെങ്കിലോ ക്രമാതീതമായി അസുഖം കൂടുകയോ ചെയ്താല് ഡോക്ടറെകണ്ട് ശരിയായ ചികിത്സ തേടണം. എച്ച്1 എന്1പനിക്കെതിരെ ഒസര്ട്ടാമീവിര് എന്ന മരുന്നാണ് ഫലപ്രദമായി നല്കുന്നത്. ഇത് ഡോക്ടറുടെ നിര്ദേശാനുസരണം മാത്രമേ കഴിക്കാവൂ. സര്ക്കാര് ആശുപത്രികളിലും കാരുണ്യ ഫാര്മസികളിലും മരുന്ന് ലഭ്യമാണ്.
രോഗി ചുമക്കുമ്പോഴും തുമ്മുമ്പോഴും രോഗാണു വായുവില് കലരുകയും ഇത് ശ്വസിക്കുന്നവര്ക്ക് രോഗം ബാധിക്കുകയും ചെയ്യാം. ചുമക്കുമ്പോഴും തുമ്മുമ്പോഴും ടവല് കൊണ്ട് മൂക്കും വായും മൂടാന് രോഗി ശ്രദ്ധിക്കണം. രോഗലക്ഷണമുള്ളവര് കഴിവതും വീട്ടിനുള്ളില് വിശ്രമിക്കണം.കൈകള് ഇടക്കിടെ സോപ്പും വെള്ളം ഉപയാഗിച്ച് കഴുകണം.
ഗര്ഭിണികളില് ജലദോഷപ്പനിയുടെ ലക്ഷണം കണ്ടാല് ഉടനടി ഡോക്ടറെ കണ്ട് പനിക്കെതിരെ പ്രതിരോധ മരുന്ന് കഴിക്കണം. പ്രമേഹം, ഹൃദ്രോഗം, ഉയര്ന്ന രക്തസമ്മര്ദം, കരള്, വൃക്കരോഗം എന്നീ രോഗങ്ങള് ഉള്ളവരും രോഗപ്രതിരോധശേഷി കുറഞ്ഞവരും വളരെയധികം ശ്രദ്ധിക്കേണ്ടതാണ്.
"
https://www.facebook.com/Malayalivartha