ലോകമെമ്പാടും കോറോണയെ പ്രതിരോധിക്കാൻ പോരാടുകയാണ്. ഒട്ടുമിക്ക രാജ്യങ്ങളിലും രണ്ടാം തരംഗം റിപ്പോർട്ട് ചെയ്തുകഴിഞ്ഞു. ഇതിനുപിന്നാലെ പുറത്തുവരുന്ന പല പഠനങ്ങളും കൂടുതൽ ജാഗ്രതയോടെ ഇരിക്കാൻ നമ്മെ ഓർമിപ്പിക്കുകയാണ്. രണ്ട്​ ഡോസ്​ വാക്​സിന്‍ സ്വീകരിച്ചാലും ചില വിഭാഗക്കാരുടെ പ്രതിരോധ ശേഷി കൂടില്ലെന്ന​ പഠനമാണ് ഇപ്പോൾ പുറത്തുവരുന്നത്. അതായത് അവയവം മാറ്റിവെച്ച ആളുകള്‍ക്ക്​ രണ്ട്​ ഡോസ്​ വാകസിന്‍ സ്വീകരിച്ചതിന്​ ശേഷവും രോഗപ്രതിരോധ ശേഷി കൂടുന്നില്ലെന്നാണ്​ പഠനം വ്യക്തമാക്കുന്നത്. അമേരിക്കയിലെ ജോണ്‍സ്​ ഹോപ്​കിന്‍സ്​ സര്‍വകലാശാലയിലെ ഗവേഷകര്‍ നടത്തിയ പഠനത്തിന്‍റെ അടിസ്​ഥാനത്തില്‍ ഇക്കൂട്ടര്‍ വാക്​സിനേഷന്​ ശേഷവും കോവിഡ്​ പ്രതിരോധ മാര്‍ഗങ്ങള്‍ കൃത്യമായി പാലിക്കണമെന്ന്​ നിര്‍ദേശിക്കുകയാണ്.

സുപ്രധാന അവയവങ്ങള്‍ മാറ്റിവെച്ചവരില്‍ മൊഡേണ, ഫൈസര്‍ വാക്​സിനുകള്‍ സ്വീകരിച്ച 54 ശതമാനം ആളുകളില്‍ മാത്രമാണ്​ ആന്‍റിബോഡികള്‍ ഉല്‍പാദിപ്പിക്കപ്പെട്ടിരിക്കുന്നത് എന്നും തെളിയുകയുണ്ടായി​. ഗവേഷണത്തിലെ കണ്ടെത്തലുകള്‍ ജേണല്‍ ഓഫ്​ അമേരിക്കന്‍ മെഡിക്കല്‍ അസോസിയേഷനില്‍ പ്രസിദ്ധപ്പെടുത്തിയിരിക്കുകയാണ്​. 'അവയവം സ്വീകരിച്ചവര്‍ രണ്ട് ഡോസ്​ വാക്സിന്‍ മതിയായ പ്രതിരോധശേഷി ഉറപ്പ് നല്‍കുന്നുവെന്ന് കരുതരുത്' - എന്ന് ജോണ്‍സ്​ ഹോപ്​കിന്‍സ്​ സ്​കൂള്‍ ഓഫ്​ മെഡിസിനിലെ ​പ്രഫസറായ ഡോറി സെഗേവ്​ പറയുകയുണ്ടായി.

ഹൃദയം, ശ്വാസകോശം, വൃക്ക എന്നിവ സ്വീകരിക്കുന്ന ആളുകള്‍ പലപ്പോഴും മരുന്നുകള്‍ കഴിക്കേണ്ടിവരുന്നു. അത് പുതിയ അവയവത്തെ ശരീരം നിരസിക്കുന്നത് തടയുന്നതിനായാണ്. ഇത് രോഗാണുക്കള്‍ക്കെതിരെ വാക്സിന്‍ വഴി ഉണ്ടാവുന്ന ആന്‍റിബോഡികള്‍ നിര്‍മിക്കാനുള്ള കഴിവിനെ തടസപ്പെടുത്താൻ സാധ്യത ഉണ്ടെന്നും ഗവേഷകര്‍ ചൂണ്ടിക്കാണിക്കുന്നു. അവയവമാറ്റം നടത്തിയ 658 പേരിൽ​ പഠനം നടത്തിയതിനുപിന്നാലെയാണ് ഇത്തരം നിഗമനത്തിൽ എത്തിച്ചേർന്നത്​. ഇവരില്‍ ആര്‍ക്കും തന്നെ 2020 ഡിസംബര്‍ 16 മുതല്‍ മാര്‍ച്ച്‌​ 13 വരെ കോവിഡ്​ സ്​ഥിരീകരിച്ചിട്ടില്ല. 658 പേരില്‍ 98 പേര്‍ക്ക് (15 ശതമാനം)​ ആദ്യ ഡോസ്​ വാക്​സിന്‍ സ്വീകരിച്ച്‌​ 21 ദിവസങ്ങള്‍ക്ക്​ ശേഷം ആന്‍റിബോഡികള്‍ ഉല്‍പാദിപ്പിക്കപ്പെട്ടതായി ഗവേഷകര്‍ കണ്ടെത്തുകയും ചെയ്തു.

അതോടൊപ്പം തന്നെ രണ്ടാമത്തെ ഡോസ് വാക്​സിന്‍ സ്വീകരിച്ച്‌​ 29 ദിവസത്തിന്​ ശേഷം 658ല്‍ 357 പേരില്‍ ആന്‍റിബോഡി കണ്ടെത്തുകയുണ്ടായി. അതായത്​ പഠനം മുൻനിർത്തി 54 ശതമാനമാണ് ഇത്. രണ്ട്​ ഡോസ്​ വാക്​സിനുകളും പരിഗണിക്കുമ്പോള്‍ 658ല്‍ 301 പേര്‍ക്കും (46 ശതമാനം) ആന്‍റിബോഡികള്‍ ഉല്‍പാദിപ്പിക്കപ്പെട്ടിട്ടില്ല. 259 പേര്‍ക്ക്​ (39 ശതമാനം) രണ്ടാമത്തെ ഡോസിന്​ ശേഷമാണ്​ ആന്‍റിബോഡി ഉണ്ടായതെന്നും പഠനം കണ്ടെത്തിയിട്ടുണ്ട്. 'ഞങ്ങളുടെ കണ്ടെത്തലുകളെ അടിസ്ഥാനമാക്കി അവയവമാറ്റ ശസ്​ത്രക്രിയ കഴിഞ്ഞവരും രോഗപ്രതിരോധ ശേഷിയില്ലാത്ത മറ്റ് രോഗികളും വാക്സിനേഷനു ശേഷവും കര്‍ശനമായ കോവിഡ് സുരക്ഷാ മുന്‍കരുതലുകള്‍ തുടരാന്‍ ഞങ്ങള്‍ നിര്‍ദേശിക്കുന്നു' - എന്നും സര്‍വകലാശാലയിലെ സര്‍ജനായ ബ്രയാന്‍ ബോയര്‍സ്​കി പറഞ്ഞു.