ദുബായിലെ ഫാര്‍മസ്യൂട്ടിക്കല്‍ കമ്പനി ഉദ്യോഗസ്ഥന്‍ മലപ്പുറം സ്വദേശി മുഷ്താഖ്, സുഹൃത്തും എന്‍ജിനീയറുമായ പത്തനംതിട്ട സ്വദേശി ഷഹനാസ് ഷംസുദ്ദീന്‍, ഷഹനാസിന്റെ കുടുംബാംഗങ്ങള്‍ എന്നിവര്‍ ഉള്‍പ്പെടുന്ന പത്തംഗ സംഘം മരുഭൂമിയില്‍ ഇടയ്ക്കിടെ ഉല്ലാസയാത്ര പോകാറുള്ളതാണ്. വെള്ളിയാഴ്ച വൈകിട്ട് 4 മണിയോടെയാണ് ഇവര്‍ രണ്ടു വാഹനങ്ങളിലായി അല്‍ ഖുദ്രയില്‍ എത്തിയത്.

തുടര്‍ന്നു ഫോട്ടോ എടുക്കാനായി മരുഭൂമിയിലേക്ക് തിരിച്ചു. വൈകിട്ട് 6-ന് മടങ്ങാന്‍ തുടങ്ങുമ്പോള്‍ ഒരു വാഹനം മണലില്‍ പുതയുകയും അടുത്തവാഹനത്തിന്റെ ടയര്‍ കേടാകുകയും ചെയ്തു. മണിക്കൂറുകള്‍ നീണ്ട ശ്രമത്തിനു ശേഷം വാഹനങ്ങള്‍ ശരിയാക്കി യാത്രയാരംഭിച്ചെങ്കിലും വഴിതെറ്റി മരുഭൂമിക്കുള്ളിലേക്കു പോയി. 18 കിലോമീറ്ററിലേറെ പിന്നിട്ടപ്പോഴാണ് വഴിതെറ്റിയത് അറിഞ്ഞതെന്ന് മുഷ്താഖ് പറഞ്ഞു.

രാത്രി വളരെ വൈകിയുള്ള യാത്ര സുരക്ഷിതമല്ലാത്തതിനാല്‍ ടെന്റ് ഒരുക്കി കുറച്ചുപേര്‍ അതിലും ബാക്കിയുള്ളവര്‍ വാഹനങ്ങളിലും കിടന്നു. വെള്ളവും ഭക്ഷണവുമില്ലാത്തതും കൊടുംതണുപ്പും പലരെയും അവശരാക്കി. പുലര്‍ച്ചെ പുറപ്പെടാന്‍ തുടങ്ങിയെങ്കിലും വാഹനങ്ങള്‍ മണലില്‍ പുതഞ്ഞുപോയിരുന്നു. പ്രമേഹവും മറ്റ് അസുഖങ്ങളുമുള്ളവര്‍ മരുന്നും ഭക്ഷണവുമില്ലാതെ തീര്‍ത്തും അവശരായി.

എല്ലാ ശ്രമങ്ങളും പരാജയപ്പെട്ടപ്പോള്‍ ദുബായ് പൊലീസിനെ വിവരം അറിയിച്ചു. ഹെലികോപ്റ്ററില്‍ എത്തിയ പൊലീസ് നിരീക്ഷണ സംഘം ഇവരെ കണ്ടെത്തിയശേഷം മരുഭൂമിയിലെ പ്രത്യേക ദൗത്യസംഘത്തെ കൃത്യമായ സ്ഥലം അറിയിക്കുകയായിരുന്നു.

എല്ലാ സംവിധാനങ്ങളുമായി എത്തിയ രക്ഷാസംഘം ആശ്വസിപ്പിക്കുകയും വെള്ളവും ഭക്ഷണവും നല്‍കുകയും ചെയ്തു. മണലില്‍ പുതഞ്ഞുപോയ വാഹനങ്ങള്‍ പുറത്തെടുത്തു. ഉച്ചകഴിഞ്ഞു മൂന്നോടെയാണ് ഇവര്‍ മരുഭൂമിയില്‍ നിന്നു പുറത്തുകടന്നത്.

തണുപ്പുകാലത്ത് മരുഭൂമിയില്‍ ഉല്ലാസയാത്ര നടത്തുന്നത് ആവേശകരമാണെങ്കിലും ചില കാര്യങ്ങളില്‍ അതീവശ്രദ്ധ വേണമെന്ന് പ്രമുഖ ടൂര്‍ ഓപ്പറേറ്റര്‍മാര്‍. ഒറ്റയ്ക്കുള്ള യാത്ര ഒഴിവാക്കണം. ചെറു സംഘങ്ങളായി രണ്ടോ മൂന്നോ വാഹനങ്ങളില്‍ യാത്ര ചെയ്യുന്നതാണ് സുരക്ഷിതം.

പരിചയമില്ലാത്തവരാണെങ്കില്‍ രാത്രി തങ്ങാതിരിക്കുന്നതാണ് സുരക്ഷിതം. പതിവായി പോകുന്നവരില്‍ പോലും ആശയക്കുഴപ്പമുണ്ടാക്കുന്നതാണ് മരുഭൂമി. കാറ്റില്‍ മണല്‍ക്കൂനകളുടെ സ്ഥാനം മാറിക്കൊണ്ടിരിക്കും. അങ്ങോട്ടു പോകുമ്പോള്‍ കാണുന്ന കൂറ്റന്‍ മണല്‍ക്കൂന തിരികെ വരുമ്പോള്‍ ഉണ്ടാകണമെന്നില്ല. ഇതെല്ലാം വഴി തെറ്റിച്ചേക്കാം.

ശ്രദ്ധിക്കേണ്ട മറ്റു കാര്യങ്ങള്‍

പോകുന്ന വാഹനങ്ങള്‍ക്ക് സാങ്കേതിക പ്രശ്‌നങ്ങള്‍ ഇല്ലെന്ന് ഉറപ്പാക്കണം. വാഹനം പുതഞ്ഞുപോയാല്‍ മണല്‍ നീക്കം ചെയ്യാനുള്ള മണ്‍കോരിയും കെട്ടിവലിക്കാനുള്ള വടവും കരുതണം. മരുഭൂമിയില്‍ ടയറിലെ വായു മര്‍ദം 16 ആയിരിക്കണം. സാധാരണ റോഡുകളില്‍ ഇത് 35 ആണ്. മര്‍ദം കൂടിയാല്‍ മണലില്‍ പുതഞ്ഞുപോകും.തണുപ്പു പ്രതിരോധിക്കാനുള്ള വസ്ത്രങ്ങള്‍, തൊപ്പി, ഷൂസ്, ഷാള്‍ തുടങ്ങിയ ഉണ്ടാകണം. ഭക്ഷണവും വെള്ളവും കരുതാന്‍ മറക്കരുത്. കൊച്ചുകുട്ടികളുമായുള്ള യാത്ര കഴിവതും ഒഴിവാക്കുക. നേരത്തെ പോയി പരിചയമുള്ളവര്‍ നിര്‍ബന്ധമായും കൂടെയുണ്ടാകണം. വാഹനങ്ങളുടെ അറ്റകുറ്റപ്പണി അത്യാവശ്യം അറിയുന്നവരെയും ഒപ്പം കൂട്ടാം.  അടിയന്തര ഘട്ടങ്ങളില്‍ പരിഭ്രാന്തരാകാതെ പൊലീസിന്റെ സഹായം തേടുക.