ജിദ്ദയിൽ മൃതദേഹങ്ങളുടെ പടമെടുത്ത്​ സോഷ്യൽ മീഡിയയിൽ പ്രചരിപ്പിച്ച സ്വദേശികളടക്കമുള്ള അഞ്ചു യുവാക്കളെ പോലീസ് അറസ്റ്റ് ചെയ്തു. കിങ്​ അബ്​ദുൽ അസീസ്​ യൂണിവേഴ്​സിറ്റി മെഡിക്കൽ കോളജ്​ അനാട്ടമി വിഭാഗത്തിൽ സൂക്ഷിച്ച മൃതദേഹങ്ങളുടെ ചിത്രമെടുത്ത നാല്​ സ്വദേശികളും ഒരു വിദേശിയും ചിത്രങ്ങൾ സമൂഹ മാധ്യമങ്ങളിലൂടെ പ്രചരിപ്പിക്കുകയായിരുന്നു.

‘ഹാപ്പി ന്യൂ ഇയർ’ എന്ന തലക്കെട്ടിലാണ്​ പടം പ്രചരിച്ചത്​. സോഷ്യൽ മീഡിയയിൽ പടം പ്രചരിച്ചതോടെ അനാട്ടമി വിഭാഗത്തിൽ പ്രവേശിച്ച യുവാക്കളെ എത്രയും വേഗം പിടികൂടാനും നിയമ നടപടികൾ സ്വീകരിക്കാനും മക്ക ഗവർണർ അമീർ ഖാലിദ്​ അൽഫൈസൽ നിർദേശം പുറപ്പെടുവിച്ചിരുന്നു. ഉടനെ ജിദ്ദ പൊലീസ്​ മേധാവി പ്രത്യേക സംഘം രൂപവത്​കരിക്കുകയും ഉടൻ പ്രതികളെ പിടികൂടുകയുമായിരുന്നു.

യുവാക്കളുടെ നടപടി ഒരിക്കലും അംഗീകരിക്കാനാവി​ല്ലെന്ന്​ യുനിവേഴ്​സിറ്റി വക്​താവ്​ ഡോ. ശാരിഅ്​ അൽബുഖ്​മി പറഞ്ഞു. അഞ്ച്​ പേരാണ്​ അനാട്ടമി വിഭാഗത്തിൽ അതിക്രമിച്ചു കടന്ന്​ മൃതദേഹങ്ങൾക്കടുത്ത്​ നൃത്തം ചെയ്​തത്​. നിശ്ചിത ആളുകൾക്കും മെഡിക്കൽ വിദ്യാർഥികൾക്കും മാത്ര​മേ മൃതദേഹങ്ങൾ സൂക്ഷിച്ച സ്​ഥലത്തേക്ക്​ പ്രവേശനാനുമതിയുള്ളൂ. പുറത്ത്​ നിന്നെത്തിയവരാണ്​ സംഭവത്തിനു പിന്നിൽ.​

സംഭവം അറിഞ്ഞ ഉടനെ മെഡിക്കൽ കോളേജ്​ പ്രിൻസിൽ ഡോ. മഹ്​മൂദ്​ അഹ്​ലി​​െൻറ മേൽനോട്ടത്തിൽ സമിതി രൂപവത്​കരിച്ചു അന്വേഷണം നടത്തി. വീഡിയ പരിശോധിച്ചപ്പോൾ കഴിഞ്ഞ തിങ്കളാഴ്​ച രാത്രി 11 മണിക്കാണ്​ സംഭവം നടന്നതെന്ന്​ വ്യക്​തമായി​. വീഡിയോ പിടിച്ചതും യുവാക്കൾക്ക്​ സഹായം ചെയ്​തു കൊടുത്തതും മെഡിക്കൽ കോളജിൽ​ കരാറടിസ്​ഥാനത്തിൽ മെയിൻറനൻസ്​ ജോലിയിലേർപ്പെട്ട വിദേശിയായ അറബ്​ പൗരനാണെന്നും തെളിഞ്ഞു. ഇയാളെ​ ചോദ്യം ചെയ്​തപ്പോഴാണ്​ മറ്റ്​ നാല്​ സ്വദേശികളെക്കുറിച്ച്​ വിവരം ലഭിച്ചത്​. ഇവരെ പൊലീസ്​ പിടികൂടിയതായും വക്​താവ്​ പറഞ്ഞു.