ജിവിതത്തിലെ ദുരന്തങ്ങള്‍ക്ക് മുന്നില്‍ വിറങ്ങലിച്ചു നില്‍ക്കുകയല്ല, ഇടപെടുകയാണ് പ്രവാസലോകം. പ്രളയം മലയാളക്കരയെ മുക്കിയെടുക്കാന്‍ മിനക്കെട്ടപ്പോള്‍ ഉടുതുണിക്ക് മറുതുണിയില്ലാതായ സഹജീവികള്‍ക്കായി ഊണും ഉറക്കവും ഒഴിച്ച് തെരുവോരങ്ങള്‍ അലഞ്ഞ് വിഭവങ്ങള്‍ ശേഖരിക്കുന്ന തിരക്കിലായിരുന്നു പ്രവാസലോകത്തെ ആ മനുഷ്യര്‍ എന്ന് മലയാളികൾ അറിയുന്നോ? കൊറോണ ഭീതിമൂലം ആട്ടിയകറ്റിയ കഥകൾ സമൂഹമാധ്യമങ്ങളിലൂടെ പ്രചരിച്ചപ്പോൾ ആ വലിയ മനസുകൾക്ക് വേദനിച്ചിട്ടുണ്ടാകും. ഒന്നു തലചായ്ക്കാൻ ഒരിടം നൽകാതെ കോറോണയെപ്പേടിച്ച് ഓരോ പ്രവാസിയെയും ആട്ടിയകറ്റിയ കാഴ്ചകൾ.

എന്നിട്ടും സംസ്ഥാനത്ത് പേമാരി പെയ്തിറങ്ങിയപ്പോള്‍ സംഭവിച്ച വിലാപങ്ങള്‍ക്ക്‌ കാരുണ്യത്തി​ൻെറ പേമാരിയായി പ്രവാസലോകം നാട്ടിലേക്ക് സഹായഹസ്തം ഒഴുക്കിയ വാർത്ത ഏറെ ആശ്വാസമാണ് നൽകുന്നത്. ചെറുതും വലുതുമായ കൂട്ടായ്മകള്‍ തങ്ങളാല്‍ കഴിയുന്ന തരത്തില്‍ കാര്‍ഗോയില്‍ ആവശ്യസാധനങ്ങള്‍ അയച്ചും കീശയിലെ അവസാന ദിര്‍ഹം പകുത്തുനല്‍കിയും നാട്ടുകാരെ ഹൃദയത്തോട് ചേര്‍ത്തുനിര്‍ത്തിയിരിക്കുകയാണ് പ്രവാസികൾ. പ്രവാസിയുടെ വിയര്‍പ്പി​ൻെറ ഫലം എത്താത്ത ദുരിതാശ്വാസ ക്യാമ്പുകളോ വെള്ളം കയറിയ വീടകങ്ങളോ ഉണ്ടാകില്ല എന്നത് എല്ലാവർക്കും അറിയാവുന്നതാണ്. പ്രവാസി കൂട്ടായ്മകള്‍ മത്സരിച്ചായിരുന്നു നാട്ടിലേക്ക് ആവശ്യസാധനങ്ങള്‍ എത്തിച്ചിരുന്നത് പോലും.