വിദേശ രാജ്യങ്ങളിൽ കഴിയുന്ന യുഎഇ വീസക്കാർക്ക് തിരിച്ചെത്താനുള്ള നടപടികൾ ലഘൂകരിച്ചതോടെ രാജ്യത്ത് എത്തുന്നവരുടെ എണ്ണം കുത്തനെ ഉയരുകയുണ്ടായി. ഇത്തരത്തിൽ താമസ വീസക്കാർക്കു പുറമേ വീസ കാലാവധി കഴിഞ്ഞവരും സന്ദർശക വീസക്കാരും യുഎഇയിൽ എത്തിത്തുടങ്ങിയിരിക്കുകയാണ് എന്നാണ് ലഭ്യമാകുന്ന വിവരം. ഇവർ പ്രത്യേക വിമാനങ്ങളിലാണ് ഇന്ത്യ അടക്കമുള്ള രാജ്യങ്ങളിൽനിന്ന് എത്തുന്നത്. എന്നാൽ സാധാരണ നിലയിൽ വിമാന സർവീസ് തുടങ്ങിയിട്ടില്ല.

അതേസമയം സ്കൂളുകൾ തുറക്കാൻ ഒരാഴ്ച ശേഷിക്കെ നേരത്തേ നാട്ടിൽ ‍പോയി കുടുങ്ങിയവരും തിരിച്ചെത്തുകയാണ്. വന്ദേഭാരത്, ചാർട്ടേ‍‍‍ഡ് വിമാനങ്ങളിൽ നാട്ടിലേക്കു പോയവരും യുഎഇയിലെ സ്ഥിതിഗതികൾ ശാന്തമായതിനെ തുടർന്ന് തിരിച്ചുവന്നു ജോലിയിൽ പ്രവേശിച്ചു തുടങ്ങിയിരിക്കുകയാണ്. ഇത്തരത്തിൽ വീസാ കാലാവധി കഴിഞ്ഞ് നാട്ടിൽ കഴിയുന്നവരും ഐസിഎ ഗ്രീൻ സിഗ്നൽ അനുമതി ലഭിച്ചതോടെ തിരിച്ചുവരുന്നുണ്ട്. അബുദാബി, ഷാർജ വിമാനത്താവളത്തിലേക്കാണ് യാത്രക്കാർ കൂടുതലായി എത്തിച്ചേരുന്നത്. ഐസിഎ റജിസ്ട്രേഷൻ നടപടികൾ ലഘൂകരിച്ചതാണ് ഇതിനു കാരണമായി ചൂണ്ടിക്കാണിക്കുന്നത്. ജിഡിആർഎഫ്എ അനുമതി കർശനമായതിനാൽ ദുബായിൽ തിരിച്ചെത്തുന്നവരുടെ എണ്ണം ഇതര എമിറേറ്റുകളെ അപേക്ഷിച്ചു കുറവാണ് എന്നതാണ്.

അതോടൊപ്പം തന്നെ ഇവിടെ ടൂറിസ്റ്റ് വീസക്കാരെ നേരത്തെ തന്നെ സ്വീകരിച്ചതുകൊണ്ട് ഒട്ടേറെ സന്ദർശകരെത്തുന്നുണ്ട്. ഇപ്പോൾ തിരുവനന്തപുരം, കൊച്ചി, കോഴിക്കോട്, കണ്ണൂർ എന്നീ വിമാനത്താവളങ്ങളിൽനിന്ന് യുഎഇയിലെത്തുന്ന വന്ദേഭാരത് വിമാനങ്ങളിലാണ് യാത്രക്കാർ യുഎഇയിൽ തിരിച്ചെത്തുന്നത്. കൂടാതെ ഇത്തിഹാദ് എയർവേയ്സ്, എയർ അറേബ്യ, ഫ്ളൈ ദുബായ്, എമിറേറ്റ്സ് എന്നിവയുടെ പ്രത്യേക വിമാനങ്ങളിലും ഇന്ത്യയിൽനിന്ന് യുഎഇയിലേക്ക് യാത്രക്കാർ എത്തിക്കൊണ്ടിരിക്കുകയാണ്. എന്നാൽ ഓണം കൂടി കഴിയുന്നതോടെ യുഎഇയിൽ തിരിച്ചെത്തുന്നവരുടെ എണ്ണം ഇനിയും കൂടുമെന്നാണ് അനുമാനിക്കുന്നത്.