പ്രവാസികളുടെ മടക്കയാത്രയ്ക്കായി എമിറേറ്റ്സ് എത്തുന്നു. കൊച്ചിയിലേക്കും തിരുവനന്തപുരത്തേക്കും എമിറേറ്റ്സിന്റെ പ്രത്യേക വിമാനങ്ങൾ സർവീസ് നടത്തുമെന്നാണ് ലഭ്യമാകുന്ന വിവരം. ദുബായിൽ നിന്നാണ് സർവീസുകൾ ഏർപ്പെടുത്തിയിട്ടുള്ളത്. എന്നാൽ കേരളത്തിലേക്ക് കൂടാതെ ഡൽഹി, മും​ബൈ, ബെംഗളൂരു എന്നീ ഇന്ത്യൻ നഗരങ്ങളിലേക്കും കമ്പനി ഈ മാസം സർവീസ് നടത്തും. ദുബായിലുള്ള ഇന്ത്യക്കാർക്ക് തിരിച്ചുവരാനും ഇന്ത്യയിലുള്ള യുഎഇ പൗരൻമാരെയും അവിടെ സ്ഥിരതാമസമാക്കിയവരെയും തിരിച്ചുകൊണ്ടുപോകാനുമായി റിപാട്രിയേഷൻ ​ഫ്ലൈറ്റുകളാണ് ഇന്ത്യയിൽ എത്തുന്നത് എന്നാണ് അധികൃതർ വ്യക്തമാക്കുന്നത്. നിലവിൽ ഇത്തരം സർവീസുകൾക്ക് മാത്ര​മേ തങ്ങൾക്ക് അനുമതി ലഭിച്ചിട്ടുള്ളൂവെന്ന് എമിറേറ്റ്സ് പ്രതിനിധി പറഞ്ഞു.

അതോടൊപ്പം തന്നെ ഓഗസ്റ്റ് 20, 22, 24, 27, 29, 31 തീയതികളിലാണ് ദുബായിൽ നിന്ന് കൊച്ചിയിലേക്ക് എമിറേറ്റ് സർവീസ് നടത്തുന്നത്. ഓഗസ്റ്റ് 21, 23, 25, 28, 30 സെപ്തംബർ ഒന്ന് തീയതികളിൽ കൊച്ചിയിൽ നിന്ന് തിരികെയും സർവീസുകൾ ഉണ്ടാകും. ഓഗസ്റ്റ് 26ന് തിരുവനന്തപുരത്തേക്കും 27ന് തിരികെയും സർവ്വീസ് നടത്തുകയും ചെയ്യും. ഡൽഹിയിലേക്കും മും​ബൈയിലേക്കും ഓഗസ്റ്റ് 31 വരെ എല്ലാ ദിവസവും സർവീസുണ്ടാകുന്നതാണ്. ഓഗസ്റ്റ് 21, 23, 25, 28, 30 തീയതികളിലാണ് ബെംഗളൂരുവിലേക്കുള്ള ​ഫ്ലൈറ്റുകൾ രേഖപ്പെടുത്തിയിട്ടുള്ളത്.

അതോടൊപ്പം തന്നെ ടിക്കറ്റുകൾ എമിറേറ്റ്സ് വെബ്സൈറ്റിലൂടെയോ ട്രാവൽ ഏജൻസികൾ വഴിയോ ബുക്ക് ചെയ്യാവുന്നതാണ്. ഇന്ത്യയിൽ നിന്നു യാത്രചെയ്യുന്ന ദുബായ് താമസവീസക്കാർ എമിഗ്രേഷൻ (ജിഡിഎഫ്ആർഎ) സൈറ്റിൽ (https://www.gdrfad.gov.ae) റജിസ്റ്റർ ചെയ്ത് അനുമതി വാങ്ങേണ്ടതാണ്. അബുദാബിയിലെയും ഇതര എമിറേറ്റുകളിലെയും താമസക്കാർ ഐസിഎ സൈറ്റിലാണ് (https://www.ica.gov.ae) റജിസ്റ്റർ ചെയ്യേണ്ടത്.