യുഎഇ ആവേശത്തിന്റെ കൊടിമുടിയിൽ നിൽക്കുകയാണ്. ഐപിഎൽ താരങ്ങളുടെ വരവും കൊറോണ വ്യാപനം നൽകിയ മൗനവുമൊക്കെ മായുമ്പോൾ ഇതാ അക്ഷമരായി കാത്തിരിക്കുകയാണ് ജനത. താരങ്ങളുടെ വരവിനു പിന്നിലെ ആവേശം ഏറ്റെടുത്ത് അവർ പങ്കുവയ്ക്കുന്ന ചിത്രങ്ങളും വിഡിയോകളും ഏറെ ശ്രദ്ധ നേടുകയാണ്. ഇപ്പോഴിതാ അടിപൊളി മലയാളം ഗാനത്തോടൊപ്പം ‘വർക്ക് ഔട്’ ചെയ്യുന്ന ഇന്ത്യൻ ക്രിക്കറ്റ് താരം രവീന്ദ്ര ജഡേജയുടെ വിഡിയോ വൈറലായിരിക്കുകയാണ്.

ഇന്ത്യൻ പ്രിമിയർ ലീഗിൽ (െഎപിഎൽ) പങ്കെടുക്കാൻ ചെന്നൈ സൂപ്പർ കിങ്സിന്റെ താരമായി യുഎഇയിലെത്തിയ അദ്ദേഹം ദുബായിലെ താജ് ഹോട്ടൽ മുറിയിൽ വ്യായാമം ചെയ്യുന്നതാണ് വിഡിയോ. ചെന്നൈ സൂപ്പർകിങ്സിന്റെ ഇൻസ്റ്റാഗ്രാം പേജിൽ ‘You know you're in Dubai when you work out to Mallu songs!

@ravindra.jadeja #WhistlePodu’ എന്ന കുറിപ്പോടെ പങ്കുവച്ചിട്ടുള്ളത്. പള്ളിവാള് ഭദ്രവടക്കം എന്നു തുടങ്ങുന്ന നാടൻപാട്ടാണ് ജഡേജ വ്യായാമം ചെയ്യുമ്പോൾ പശ്ചാത്തലത്തിൽ കേൾക്കുന്നത് തന്നെ. ഇതേതുടർന്ന് ഇൗ ഹിറ്റ് ഗാനം മലയാളികളോടൊപ്പം ഇതര സംസ്ഥാനക്കാര്‍ക്കും ഏറെ ഇഷ്ടപ്പെട്ടതാണ്. അതേസമയം ഐപിഎല്ലിൽ പങ്കെടുക്കാനായി മുംബൈ ഇന്ത്യൻ, ചെന്നൈ സൂപ്പർ കിങ്സ്, ബാംഗ്ലൂർ റോയൽ ചലഞ്ചേഴ്സ്, കൊൽക്കത്ത നൈറ്റ് റൈഡേഴ്സ്, രാജസ്ഥാൻ റോയൽസ്, കിങ്സ് ഇലവൻ പഞ്ചാബ്, ഡല്‍ഹി ക്യാപിറ്റൽസ്, സൺറൈസേഴ്സ് ഹൈദരബാദ് എന്നീ ടീമുകൾ യുഎഇയിൽ എത്തിചച്ചേർന്നിട്ടുണ്ട്. അങ്ങനെ വരവറിയിച്ച് യുഎഇയിൽ നിന്നുള്ള ചിത്രങ്ങൾ താരങ്ങൾ സമൂഹ മാധ്യമങ്ങളിൽ പങ്കുവയ്ക്കുന്നുണ്ട്. റോയൽ ചലഞ്ചേഴ്സ് ബാംഗ്ലൂർ ടീം ക്യാപ്റ്റൻ വിരാട് കോലി യുഎഇയിലെത്തിയ ഉടൻ തന്നെ ദുബായ് പശ്ചാത്തലത്തിൽ തംസ് അപ്പ് കാണിച്ച് നിൽക്കുന്ന ചിത്രം ട്വീറ്റ് ചെയ്തതും ആരാധകർ ഒന്നടങ്കം ഏറ്റെടുത്തിരുന്നു.