ദമ്മാം: ദമ്മാമിൽ കത്തികാട്ടി ഭീഷണിപ്പെടുത്തി ബഖാല ജീവനക്കാരനെ പരിക്കേൽപിച്ച്​ പണം കവർന്നു. കണ്ണൂർ, മയ്യിൽ സ്വദേശി മൂസക്കുട്ടിയാണ്​ കവർച്ചാ സംഘത്തി​​ന്റെ ​ആക്രമണത്തിനിരയായത്. ശേഷം ബഖാലയിലെ പണം കൊള്ളയടിക്കുകയും ചെയ്​തു.

ദമ്മാം നഗരത്തിൽ അൽഅദാമ ഏരിയയിൽ വെള്ളിയാഴ്​ച രാ​ത്രിയാണ്​ സംഭവം. രാത്രി 11.30 ഒാടെയാണ്​ അറബ്​ വംശജനെന്ന്​ തോന്നിക്കുന്ന യുവാവ്​ കത്തിയുമായി കടയിലെത്തിയത്​. കടയിൽ ഒാടിക്കയറിയ യുവാവ്​ പണം ആവശ്യപ്പെടുകയും ഭീഷണിപ്പെടുത്തുകയും ചെയ്​തു.

പെട്ടെന്ന്, പണം സൂക്ഷിച്ച കൗണ്ടറിലേക്ക്​ കയറിവരുകയും കത്തിവീശുകയുമായിരുന്നു. കത്തി തട്ടി കഴുത്തിൽ പരിക്കേറ്റു. ഉടൻ തന്നെ പണം കവരുകയും പുറത്തേക്ക്​ ഒാടുകയും ചെയ്​തു. പുറത്ത്​ നിർത്തിയിട്ട സുനാത്ത കാറിൽ കയറി രക്ഷപ്പെടുകയായിരുന്നു.

വാഹനത്തിലുണ്ടായിരുന്ന സഹായിയടക്കം രണ്ടിൽ കൂടുതൽ പേർ കവർച്ചാ സംഘത്തിൽ ഉള്ളതായാണ്​ നിഗമനം. മുഖം മറച്ചെത്തിയ കവർച്ചാ സംഘമുൾപ്പെടെ കവർച്ചയുടെ ദൃശ്യങ്ങൾ കടയിലെ സി.സി.ടി.വി കാമറയിൽ പതിഞ്ഞിട്ടുണ്ട്​.

പരിക്കേറ്റ മൂസക്കുട്ടിയെ റെസ്‌ഡ്ക്രോസ്സിന്റെ സഹായത്തോടെ ആംബുലൻസിലാണ്​ ആശുപ​​​ത്രിയിലെത്തിച്ചത്​. കഴുത്തി​ന്റെ വലതു ഭാഗത്തേറ്റ മുറിവിന്​ ഏതാനും തുന്നലുകളുണ്ട്​. സംഭവത്തിൽ പോലീസ്​ കേസെടുത്ത്​ അന്വേഷണമാരംഭിച്ചു