25 വര്‍ഷമായി താന്‍ ഓമനിച്ചു വളര്‍ത്തുന്ന ബ്രോണ്‍വെന്‍ എന്ന കുതിരയെ അന്ത്യാഭിലാഷമായി ചുംബിച്ച് 77കാരി ലോകത്തോട് വിട പറഞ്ഞു.അര്‍ബുദ ബാധിതയായി ചികിത്സയിലായിരുന്ന ഷീല മാര്‍ഷെന്ന 77കാരിയാണ് ഈ കൗതുകകരമായ അന്ത്യാഭിലാഷം നിര്‍വഹിച്ച് മരിച്ചത്.

ബ്രിട്ടനിലെ വിഗാനിലുള്ള റോയല്‍ ആല്‍ബര്‍ട്ട് എഡ്വാര്‍ഡ് ആശുപത്രിയില്‍ മരണക്കിടക്കയില്‍ നിന്നാണ് ഷീല തന്റെ അന്ത്യാഭിലാഷം പറഞ്ഞത്. തന്റെ പ്രിയപ്പെട്ട കുതിരയെ ചുംബിച്ച് ഈ ലോകത്തോട് വിടപറയണമെന്നായിരുന്നു ഈ ആഗ്രഹം.
ഉടന്‍തന്നെ ആശുപത്രി അധികൃതര്‍ ഷീലയുടെ അന്ത്യാഭിലാഷം സാധിക്കാനുള്ള ഒരുക്കങ്ങള്‍ നടത്തി കൊടുത്തു. വീട്ടില്‍ നിന്നും രണ്ട് കുതിരകളെ ആശുപത്രിക്ക് പുറത്തെത്തിച്ചു. പിന്നീട് ഷീലയെ കിടക്കയോടെ കുതിരകളുടെ അടുത്തെത്തിച്ചു. തന്റെ യജമാനത്തിയെ കണ്ട കുതിരകളുടെ സ്‌നേഹ പ്രകടനം കണ്ണുകളെ ഈറനണിയിക്കുന്നതായിരുന്നുവെന്ന് സംഭവത്തിന് ദൃസാക്ഷികളായ ആശുപത്രി അധികൃതര്‍ പറയുന്നു. ഷീലയുടെ സമീപത്തേക്ക് നടന്നെത്തിയ കുതിരകള്‍ അവരുടെ കവിളുകളില്‍ മുഖമുരുമ്മിയാണ് സ്‌നേഹം കാണിച്ചത്. ബ്രോണ്‍വെന്‍ എന്ന അവരുടെ പ്രിയപ്പെട്ട കുതിര കവിളുകളില്‍ ചുംബിക്കുകയും ചെയ്തു. എന്തായാലും അന്ത്യാഭിലാഷം സാധിച്ച് അധികം വൈകാതെ തന്നെ ഷീല മരണത്തിന് കീഴടങ്ങി. 
ഒരു തികഞ്ഞ മൃഗസ്‌നേഹിയായിരുന്നു ഷീലയത്രെ. വിഗാനിലെ തന്റെ വീട്ടില്‍ അവര്‍ വളര്‍ത്തിയിരുന്നത് ആറു കുതിരകളെയായിരുന്നു. കുതിരകള്‍ക്കു പുറമെ, മൂന്നു നായ്ക്കളെയും മൂന്നു പൂച്ചകളെയും മറ്റു മൃഗങ്ങളെയും ഷീല തന്റെ വീട്ടില്‍ സംരംക്ഷിച്ചിരുന്നു. 

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha