ജാവാക്കടലില്‍ തകര്‍ന്നു വീണ ലയണ്‍ എയര്‍ യാത്രാ വിമാനത്തിലെ യാത്രക്കാര്‍ക്കായുള്ള തെരച്ചില്‍ ഇന്തോനേഷ്യ അവസാനിപ്പിച്ചു. ഇതുവരെയും ആരെയും കണ്ടെത്താന്‍ കഴിയാത്ത സാഹചര്യത്തിലാണ് തെരച്ചില്‍ അവസാനിപ്പിച്ചത്. എന്നാല്‍ വിമാനത്തിന്റെ രണ്ടാമത്തെ ബ്ലാക് ബോക്‌സ്, കോക്പിറ്റ് വോയിസ് റിക്കാര്‍ഡര്‍ എന്നിവയ്ക്കായി അന്വേഷണം തുടരും. ഇക്കാര്യത്തില്‍ എല്ലാവരെയും തൃപ്തിപ്പെടുത്താനായില്ലെന്നറിയാം, എങ്കിലും പൊതുജനങ്ങളോടും പ്രത്യേകിച്ച് ഇരകളുടെ കുടുംബാംഗങ്ങളോടും ഞങ്ങള്‍ ക്ഷമ ചോദിക്കുന്നതായും രക്ഷാദൗത്യ മേധാവി മുഹമ്മദ് സയുഗി പറഞ്ഞു. തകര്‍ന്നുവീണ യാത്രാ വിമാനത്തിന്റെ ഒരു ബ്ലാക്‌ബോക്‌സ് നേരത്തേ കണ്ടെത്തിയിരുന്നു.

കഴിഞ്ഞ മാസം 29ന് ലയണ്‍ എയര്‍വേസിന്റെ രണ്ടുമാസം മാത്രം പഴക്കമുള്ള ബോയിംഗ്737 മാക്‌സ്8 വിമാനമാണ് തകര്‍ന്നത്. 189 പേരാണ് വിമാനത്തിലുണ്ടായിരുന്നത്. ബോയിംഗ് കന്പനിയുടെ ഏറ്റവും പുതിയ മോഡല്‍ വിമാനമായിരുന്നിത്. ജക്കാര്‍ത്തയില്‍നിന്ന് പംഗ്പാല്‍ പിനാംഗ് നഗരത്തിലേക്കു തിരിച്ച വിമാനം 12 മിനിട്ടിനകം കടലില്‍പതിച്ചു.