കാലിഫോര്ണിയയിലുണ്ടായ കാട്ടുതീയില് മരിച്ചവരുടെ എണ്ണം 31 ആയി, തീ അണയ്ക്കാനുള്ള ശ്രമങ്ങള് തുടരുന്നു
കാലിഫോര്ണിയയില് വിവിധയിടങ്ങളില് പടരുന്ന കാട്ടുതീയില് മരിച്ചവരുടെ എണ്ണം 31 ആയി ഉയര്ന്നു. ഇതില് 29 പേര് വടക്കന് കലിഫോര്ണിയയിലാണ് മരിച്ചത്. 228 പേരെയാണ് കാണാതായിരിക്കുന്നത്. അതേസമയം കാണാതായ 137 പേരെ സംബന്ധിച്ച വിവരങ്ങള് അധികൃതര്ക്ക് ലഭിച്ചു. ഇവര് സുഹൃത്തുകളുടെയും ബന്ധുക്കളുടെയും വീടുകളിലേക്ക് മാറിയതായാണ് വിവരം. കാട്ടുതീയെ തുടര്ന്നു 300,000 ആളുകളെയാണ് മാറ്റിപ്പാര്പ്പിച്ചിരിക്കുന്നത്. മൂന്നിടങ്ങളിലാണ് കാട്ടുതീ പടരുന്നത് സംസ്ഥാനത്തിന്റെ വടക്ക് കാന്പ് ഫയര്, തെക്ക് വൂള്സ്ലി ഫയറും ഹില് ഫയറും.
കാന്പ് ഫയറാണ് കൂടുതല് നാശം വിതയ്ക്കുന്നത്. പാരഡൈസ് നഗരത്തെ വിഴുങ്ങിയ ഈ കാട്ടുതീ നിരവധി ജീവനുകളാണ് കവര്ന്നത്. 7,000 കെട്ടിടങ്ങളെ തീ വിഴുങ്ങി. പാരഡൈസ് നഗരത്തിലെ 90 ശതമാനം ഭവനങ്ങളും ഇതില് ഉള്പ്പെടുന്നു.
തെക്കന് മേഖലയില് പടരുന്ന വൂള്സ്ലി ഫയറും ഹില് ഫയറും മാലിബൂ നഗരത്തില് വലിയ നാശമുണ്ടാക്കിയത്. ഹെലികോപ്റ്ററുകള് അടക്കമുള്ള സംവിധാനങ്ങളുപയോഗിച്ച് അഗ്നിശമനസേനാംഗങ്ങള് തീ അണയ്ക്കാനുള്ള ശ്രമങ്ങള് നടത്തുന്നത്.
https://www.facebook.com/Malayalivartha