മതിയായ സുരക്ഷ ഉറപ്പാക്കാന് കഴിയാത്ത സാഹചര്യം ! ; യു.എസ് കോണ്ഗ്രസിന്റെ സംയുക്ത സമ്മേളനത്തെ പ്രസിഡന്റ് ട്രംപ് അഭിസംബോധന ചെയ്യുന്നത് നീട്ടിവയ്ക്കണമെന്ന് ഡെമോക്രാറ്റ്
അമേരിക്കന് സര്ക്കാരിന്റെ ഭാഗിക ഷട്ട്ഡൗണ് അനിശ്ചിതമായി തുടരവേ ജനവരി 29 ന് യു.എസ് കോണ്ഗ്രസിന്റെ സംയുക്ത സമ്മേളനത്തെ പ്രസിഡന്റ് ട്രംപ് അഭിസംബോധന ചെയ്യുന്നത് നീട്ടിവയ്ക്കണമെന്ന് ഡെമോക്രാറ്റുകള് ആവശ്യപ്പെട്ടു.
യു.എസ് സീക്രട്ട് സര്വീസും, ഡിപ്പാര്ട്ട്മെന്റ് ഓഫ് ഹോംലാന്ഡ് സെക്യൂരിറ്റിയും 26 ദിവസമായി ഫണ്ടില്ലാതെയാണ് നീങ്ങുന്നതെന്നും, മതിയായ സുരക്ഷ ഉറപ്പാക്കാന് കഴിയാത്ത സാഹചര്യത്തില് പ്രസംഗം എഴുതി തയാറാക്കി അവതരിപ്പിക്കുകയോ, അല്ലെങ്കില് സ്റ്റേറ്റ് ഓഫ് ദ യൂണിയന് പ്രസംഗം ഉചിതമായ മറ്റൊരു തീയതിയിലേക്ക് മാറ്റിവയ്ക്കുകയോ ആണ് നല്ലെതന്ന് ട്രംപിന് അയച്ച കത്തില് യു.എസ് ഹൗസ് സ്പീക്കര് നാന്സി പെലോസി ഓര്മിപ്പിച്ചു.
ട്രംപിനു വേണമെങ്കില് വൈറ്റ്ഹൗസിലെ ഓവല് ഓഫീസില് നിന്ന് കോണ്ഗ്രസിനെ അഭിസംബോധന ചെയ്യാമെന്ന് പാര്ട്ടി നേതാക്കളുടെ യോഗത്തിനു ശേഷം പെലോസി അഭിപ്രായപ്പെട്ടു. അമേരിക്കയുടെ മൂന്നാമത്തെ പ്രസിഡന്റായിരുന്ന തോമസ് ജെഫേഴ്സനാണ് എഴുതി തയാറാക്കി സ്റ്റേറ്റ് ഓഫ് ദ യൂണിയന് അവതരിപ്പിക്കുന്ന രീതിക്കു തുടക്കമിട്ടത്.
1913 ല് പ്രസിഡന്റ് വൂഡ്രോ വില്സണ് സംയുക്ത സമ്മേളനത്തെ നേരിട്ട് അഭിസംബോധന ചെയ്യുന്നതു വരെ ഈ രീതി തുടര്ന്നു. അപൂര്വമായ സാഹചര്യത്തിലൊഴികെ പിന്നീടുള്ള പ്രസിഡന്റുമാരെല്ലാം കാപ്പിറ്റോള് ഹില്ലില് എത്തുന്ന രീതി തുടര്ന്നു. കോണ്ഗ്രസ് അംഗങ്ങള്ക്കു പുറമേ സുപ്രീംകോടതി ജഡ്ജിമാരും, സൈനിക മേധാവികളും ഈ ചടങ്ങിന് എത്തുക പതിവാണ്.
ടെലിവിഷന് യുഗം ആരംഭിച്ചതോടെ സ്റ്റേറ്റ് ഓഫ് ദ യൂണിയന് പ്രസംഗം കൂടുതല് ശ്രദ്ധ ആകര്ഷിക്കുന്ന സംഭവമായി. കടന്നു വരുന്ന വര്ഷത്തില് നടപ്പാക്കാന് ഉദ്ദേശിക്കുന്ന കാര്യങ്ങള് ജനങ്ങളെ ധരിപ്പിക്കാനുള്ള അവസരമായി പ്രസിഡന്റുമാര് ഈ പ്രസംഗം പ്രയോജനപ്പെടുത്തുന്നു. അമേരിക്കന് രാഷ്ട്രീയത്തിലെ പല കീഴ്വഴക്കങ്ങളും തകിടം മറിച്ചു മുന്നേറുന്ന പ്രസിഡന്റ് ട്രംപ് ഇപ്പോഴത്തെ സാഹചര്യം എങ്ങിനെയാകും നേരിടുക എന്നത് കൗതുകമുണര്ത്തുന്ന കാര്യമായിരിക്കും. കോണ്ഗ്രസില് പോകുന്നതിനു പകരം തന്റെ അനുയായികളെ അഭിസംബോധന ചെയ്യാന് അദ്ദേഹം തയാറായേക്കുമെന്നു കരുതുന്നവരുമുണ്ട്.
https://www.facebook.com/Malayalivartha
