കിലോഗ്രാമിന്റെ നിര്വചനത്തിനു മാറ്റം, കിലോഗ്രാം ഇനി പഴയ കിലോഗ്രാമല്ല, പുതു മാറ്റം ഇന്ത്യയും സ്വീകരിച്ചു
തൂക്കത്തിന്റെ അടിസ്ഥാനഘടകമായ കിലോഗ്രാമിന്റെ മാറ്റം തിങ്കളാഴ്ച മുതലാണ് പ്രാബല്യത്തില് വന്നത്. പുതിയ മാറ്റം ഇന്ത്യയും സ്വീകരിച്ചു കഴിഞ്ഞു. എന്നാല് ദൈനംദിന ജീവിതത്തെ ഈ മാറ്റം ബാധിക്കില്ലെന്നതാണ് മറ്റൊരു വസ്തുത. കിലോഗ്രാമിന്റെ അളവിലൊന്നും മാറ്റം സംഭവിക്കുന്നില്ല. നിലവിലെ അളവു മെഷീനുകളും തൂക്ക കട്ടികളും ത്രാസുകളും ഉപയോഗിക്കാം. മാറ്റം വന്നത് കിലോഗ്രാമിന്റെ നിര്വചനത്തിനു മാത്രമാണ്.
കഴിഞ്ഞ വര്ഷം നടന്ന ജനറല് കോണ്ഫറന്സ് ഓണ് വെയ്റ്റ്സ് ആന്ഡ് മെഷേഴ്സ് കിലോഗ്രാമിന്റെ തൂക്കത്തിനെതിരെ വോട്ടിനിട്ടിരുന്നു. ഇതോടെയാണ് ഭൗതികവസ്തുവിനെ അടിസ്ഥാനമാക്കി നിര്വചിച്ച അവസാനത്തെ അളവുകോലും ഇല്ലാതായത്. പകരം, മീറ്റര് പോലെ, സെക്കന്ഡ് പോലെ തികച്ചും ശാസ്ത്രീയമായ, അണുവിട പിഴയ്ക്കാത്ത പുതിയൊരു ഘടകം കിലോഗ്രാമിന് എത്ര തൂക്കം എന്നു നിര്ണയിക്കുന്നതാണ്.
300 വര്ഷത്തിലേറെയായി ലോകത്ത് പ്രചാരത്തിലിരിക്കുന്ന കിലോഗ്രാം ന്യൂജെന് ആയി മാറി. ഇതോടെ 110 വര്ഷമായി കിലോഗ്രാമിന്റെ തൂക്കം നിര്ണയിച്ചിരുന്ന പാരിസിലെ ലോഹസിലിണ്ടര് ചരിത്രത്തിന്റെ ഭാഗമായി. കിലോഗ്രാമിന്റെ അടിസ്ഥാനം അഥവാ പ്രോട്ടോടൈപ്പ് ആയി ഇതുവരെ ഉപയോഗിച്ചിരിക്കുന്നത് പാരിസില് സൂക്ഷിച്ചിരിക്കുന്ന പ്ലാറ്റിനവും ഇറിഡിയവും ചേര്ന്ന ഈ ലോഹപിണ്ഡമാണ്. ഇതിന്റെ തൂക്കമാണ് ഒരു കിലോഗ്രാമായി കണക്കാക്കിയിരിക്കുന്നത്.
1795-ല് ലൂയീസ് പതിനാറാമന് രാജാവ് ഏര്പ്പെടുത്തിയ ഈ സംവിധാനം ക്രമേണ മറ്റു രാജ്യങ്ങളും സ്വീകരിച്ചു. പൂജ്യം ഡിഗ്രിയില് ഒരു ലീറ്റര് വെള്ളത്തിന്റെ ഭാരത്തെയാണ് ആദ്യം ഒരു കിലോഗ്രാമായി കണക്കാക്കിയത്. അതിന്റെ അപ്രായോഗികത കണക്കാക്കി ലോഹപിണ്ഡത്തിലേക്കു മാറി. ഇപ്പോള് അടിസ്ഥാനമാക്കിയിരിക്കുന്ന സിലിണ്ടര് 110 വര്ഷമായി ലോകത്ത് കിലോഗ്രാമിന്റെ പ്രോട്ടോടൈപ്പ് ആണ്. എന്നാല്, കാലപ്പഴക്കം മൂലം ഈ സിലിണ്ടറില് വരുന്ന ഭാരമാറ്റം കിലോഗ്രാമിന്റെ തൂക്കത്തില് മാറ്റം വരുത്തിത്തുടങ്ങിയതോടെയാണ് ക്ലിപ്തവും ശാസ്ത്രീയവുമായ മാര്ഗങ്ങളെക്കുറിച്ച് ആലോചന തുടങ്ങിയത്.
പ്രകാശവേഗം അടിസ്ഥാനമാക്കിയ പ്ലാന്ക്സ് കോണ്സ്റ്റന്റ് ഉപയോഗിച്ചാണ് കിലോഗ്രാമിന്റെ പ്രോട്ടോടൈപ്പ് നിര്വചിക്കുന്നത്. അതേസമയം, ഒരു കിലോഗ്രാമിനു തുല്യമായ പിണ്ഡം സൃഷ്ടിക്കാന് ഗുതുത്വാകര്ഷണത്തിനു തത്തുല്യമായ ഇലക്ട്രോമാഗ്നെറ്റിക് ശക്തി സൃഷ്ടിക്കാനാവശ്യമായ വൈദ്യുതി ഉപയോഗിച്ചുള്ള മാര്ഗവും നിലവിലുണ്ട്.
https://www.facebook.com/Malayalivartha