സുഹൃത്തിനെ കൊലപ്പെടുത്തിയാല് 62 കോടി രൂപ നല്കാമെന്ന് ഓണ്ലൈന് 'കോടീശ്വരന്റെ' വാഗ്ദാനം, പതിനെട്ടുകാരി സുഹൃത്തിനെ കൊലപ്പെടുത്തി
ഓണ്ലൈന് വഴി പരിചയപ്പെട്ട അപരിചിതനായ 'കോടീശ്വരന്' വാഗ്ദാനം ചെയ്ത പണത്തിനായി കൗമാരക്കാരി അടുത്ത കൂട്ടുകാരിയെ കൊലപ്പെടുത്തി. ലൊസാഞ്ചലസിലെ അലാസ്കയിലാണ് 9 മില്യന് ഡോളറിനായി ഏകദേശം 62.68 കോടി രൂപയ്ക്കായി ക്രൂര കൊലപാതകം നടന്നത്.
അലാസ്കയില് നിന്നുള്ള ഡെനാലി ബെര്മര് എന്ന പതിനെട്ടുകാരി പെണ്കുട്ടിയേയാണ്, 21-കാരനും ഇന്ത്യാന സ്വദേശിയുമായ ഡാരിന് സ്കില്മില്ലര് എന്നയാള് കൃത്യം നിര്വഹിക്കാന് ഏല്പ്പിച്ചത്. ഇരുവരും ഓണ്ലൈന് വഴിയാണ് പരിചയപ്പെട്ടത്. ഡെനാലി കൃത്യനിര്വഹണത്തിനായി മറ്റ് നാലു പേരുടെ സഹായം തേടിയിരുന്നു. ഡെനാലിയുടെ അടുത്ത സുഹൃത്ത് കൂടിയായ സിന്തിയ ഹോഫ്മാനാണ് ക്രൂരകൃത്യത്തിന് ഇരയായി കൊല്ലപ്പെട്ടത്.
ഇക്കഴിഞ്ഞ ജൂണ് രണ്ടിന് ഡെനാലിയും കെയ്ടന് മാകിന്ടോഷ് എന്ന ആണ്കുട്ടിയും ചേര്ന്ന് വിനോദയാത്രയ്ക്കെന്ന് പറഞ്ഞ് സിന്തിയയെ തെക്കു പടിഞ്ഞാറന് ആങ്കറേജിലെ തണ്ടര്ബേര്ഡ് വെള്ളച്ചാട്ടത്തിനരികില് എത്തിച്ചു. ആളില്ലാത്ത സ്ഥലത്തുവച്ച് ഡെനാലിയും സഹായിയും ചേര്ന്ന് സിന്തിയയെ കൈകാലുകള് ടേപ്പ് ഉപയോഗിച്ച് വരിഞ്ഞുമുറുക്കി ബന്ദിയാക്കി തലയ്ക്കുപിന്നില് വെടിയുതിര്ക്കുകയായിരുന്നു. അതിനുശേഷം പുഴയിലേക്കു തള്ളിയിട്ടു. ജൂണ് നാലിനാണ് സിന്തിയയുടെ മൃതദേഹം പുഴയില്നിന്നു കണ്ടെടുത്തത്.
സിന്തിയയെ ബന്ദിയാക്കി കൊലപാതകം നടത്തുന്നതിന്റെ ദൃശ്യങ്ങള് എല്ലാം ഡാരിന് ഇരുവരും ഫോട്ടോകളും വിഡിയോകളുമായി സ്നാപ്ചാറ്റിലൂടെ കൈമാറി. ഡെനാലിയേയും സഹായി മാകിന്ടോഷിനെയും കൊലപാതക കുറ്റം ചുമത്തി അറസ്റ്റു ചെയ്തു. ഡാരിനും സംഭവവുമായി ബന്ധപ്പെട്ട മറ്റു മൂന്നുപേര്ക്കെതിരെയും കൊലപാതക ആസൂത്രണം, കൊലപാതക പ്രേരണ എന്നീ വകുപ്പുകളും ചുമത്തിയിട്ടുണ്ട്.
സിന്തിയയ്ക്ക് 19 വയസ്സുണ്ടായിരുന്നെങ്കിലും പന്ത്രണ്ടുകാരിയെപ്പോലെയാണ് മകള് പെരുമാറിയിരുന്നതെന്നും കൂടാതെ അവള്ക്ക് പഠനവൈകല്യങ്ങളും ഉണ്ടായിരുന്നെന്നും സിന്തിയയുടെ അച്ഛന് പറഞ്ഞതായി പ്രാദേശിക മാധ്യമങ്ങള് റിപ്പോര്ട്ടു ചെയ്തു. കൂടുതല് തെളിവുകള്ക്കായി ഡെനാലിയുടെ ഫോണ് പരിശോധിച്ച പൊലീസുകാര്ക്ക് ലഭിച്ചത് ഞെട്ടിക്കുന്ന വിവരങ്ങളാണ്. പ്രായപൂര്ത്തിയാകാത്തതുള്പ്പെടെയുള്ള നിരവധി പെണ്കുട്ടികളുടെ അശ്ലീല ചിത്രങ്ങളാണ് ഡാരിന്റെ നിര്ദേശപ്രകാരം ഡെനാലി അയാള്ക്ക് അയച്ചിരുന്നത്. കോടിപതിയായ 'ടൈലര്' എന്ന വ്യാജ വിലാസത്തില് നിന്നുമാണ് ഡാരിന്, ഡെനാലിയുമായി സംസാരിച്ചിരുന്നത്.
സിന്തിയയുടെ മരണത്തിന് ആഴ്ചകള്ക്കു മുന്പ്, അലാസ്കയില് ഉള്ള മറ്റൊരു പെണ്കുട്ടിയെ പീഡിപ്പിച്ചു കൊല്ലുന്നതിനെകുറിച്ച് ഇരുവരും പദ്ധതി ഇട്ടിരുന്നു. ഈ കൊലപാതകത്തെ മുന്നിര്ത്തി ഡെനാലിയെ ഭീഷണിപ്പടുത്തി കൂടുതല് പെണ്കുട്ടികളെ ലൈംഗികാതിക്രമങ്ങള്ക്ക് ഇരയാക്കുക ആയിരുന്നു ഡാരിന്റെ ലക്ഷ്യം. കുട്ടികള്ക്കെതിരെയുള്ള ലൈംഗികാതിക്രമത്തിന്റെ പേരില് ജീവപര്യന്തം തടവും കൊലപാതക കുറ്റത്തിന് 99 വര്ഷം തടവും ഇരുവരും അനുഭവിക്കേണ്ടി വരുമെന്ന് പൊലീസ് പറഞ്ഞു.
https://www.facebook.com/Malayalivartha