ലോകരാജ്യങ്ങളില്‍ ബ്രസീല്‍ എന്ന ലാറ്റിന്‍ അമേരിക്കന്‍ രാജ്യത്തിന് നിലവില്‍ ഒട്ടേറെ സവിശേഷതകളാണുള്ളത് .ഒരു ഭരണാധികാരിയും നേരിടേണ്ടി വന്നിട്ടിലാത്ത അത്ര പ്രതിസന്ധിയാണ് ബ്രസീല്‍ പ്രസിഡണ്ട് നേരിടേണ്ടി വരുന്നത് .കോവിഡ് രോഗികളുടെ എണ്ണത്തില്‍ ബ്രസീല്‍ നിലവില്‍ റഷ്യയെ മറികടന്ന് രണ്ടാം സ്ഥാനത്ത് എത്തി നില്‍ക്കുകയാണ് .അതിനാല്‍ തന്നെ സമൂഹവ്യാപനം തടയുന്നതില്‍ സര്‍ക്കാര്‍ പൂര്‍ണ്ണമായും പരാജയപ്പെട്ടിരിക്കുന്നു എന്നാണ് പ്രക്ഷോഭകര്‍ ഉയര്‍ത്തുന്ന ഗുരുതര ആരോപണം .നിലവില്‍ രോഗികളുടെ എണ്ണത്തിലും മരണനിരക്കിലും ഗണ്യമായ വര്‍ദ്ധനവ് ബ്രസീലില്‍ ഉണ്ടായിരിക്കുകയാണ് .
എന്നാല്‍ പതിനാറു ലക്ഷത്തിലധികം പേരില്‍ രോഗബാധ സ്ഥിരീകരിച്ച അമേരിക്കയില്‍ മരണം ഒരു ലക്ഷത്തോളം അടുക്കുകയാണ് .എന്നിട്ടും ഡൊണാള്‍ഡ് ട്രംപ് പ്രസിഡന്റ് തിരഞ്ഞെടുപ്പില്‍ രണ്ടാം തവണ കഴിഞ്ഞ പ്രാവശ്യത്തേക്കാള്‍ മുന്‍തൂക്കം ഉണ്ട് എന്ന സര്‍വ്വേ കണക്കുകള്‍ പോലും വന്നിരുന്നു .ഇരുപതു കോടിയിലധികം ജനങ്ങളുള്ള ബ്രസീലില്‍ മുന്‍ പ്രസിഡന്റ് ദില്‍മ റൂസഫ് രാജിവയ്ക്കേണ്ടി വന്നത് അഴിമതി ആരോപണത്തെ തുടര്‍ന്നായിരുന്നു .
എന്നാല്‍ നിലവിലെ പ്രസിഡന്റായ ബോള്‍സോനാരോ രാജ്യത്തിന് തന്നെ അപകടമാണ് എന്ന തരത്തില്‍ സമാനതകളില്ലാത്ത പ്രതിഷേധമാണ് ഉയരുന്നത് . ബ്രസീലില്‍ കൊറോണ വൈറസ് വ്യാപനം നിയന്ത്രണാതീതമായി എന്നാണ് ഏറ്റവും ഒടുവില്‍ കണക്കുകള്‍ സൂചിപ്പിക്കുന്നത് . രോഗികളുടെ എണ്ണം 3.39 ലക്ഷം കടന്നതോടെ രാജ്യങ്ങളുടെ പട്ടികയില്‍ യുഎസ് കഴിഞ്ഞാല്‍ ബ്രസീല്‍ രണ്ടാമതെത്തി. ഒറ്റദിവസം ആയിരത്തിലേറെ പേര്‍ മരിച്ചതോടെ പല സംസ്ഥാനങ്ങളും നിയന്ത്രണങ്ങള്‍ പുനഃസ്ഥാപിക്കാന്‍ ആലോചിക്കുന്നു. ലാറ്റിന്‍ അമേരിക്കയിലെ മറ്റു രാജ്യങ്ങളിലും രോഗം പടരുകയാണ്.

ഔദ്യോഗികമായി മരണസംഖ്യ 21,000 ആണെങ്കിലും യഥാര്‍ഥത്തില്‍ ഇതിലുമേറെയെന്നാണ് നിഗമനമുള്ളത് ഇതേസമയം, രോഗത്തിന്റെ പ്രഭവകേന്ദ്രമായിരുന്ന ചൈനയില്‍ പുതിയ കോവിഡ് കേസുകള്‍ റിപ്പോര്‍ട്ട് ചെയ്യാത്ത ആദ്യ ദിനമാണ് കഴിഞ്ഞുപോയത്.തീവ്ര വലതുപക്ഷക്കാരനായ പ്രസിഡന്റ് ജെയര്‍ ബോള്‍സോനാരോയുടെ നിലപാടുകള്‍ക്കേറ്റ തിരിച്ചടിയാണ് ബ്രസീലിലെ കൊറോണ വൈറസ് വ്യാപനമെന്നു രാജ്യാന്തര മാധ്യമങ്ങള്‍ തലക്കെട്ടെഴുതി. 'ഇതൊരു ചെറിയ പനി മാത്രമാണ്. കോവിഡ് കൊണ്ടെന്നും നിങ്ങള്‍ മരിക്കാന്‍ പോകുന്നില്ല.കടകളും സ്ഥാപനങ്ങളും അടച്ചിട്ടുള്ള കോവിഡ് പ്രതിരോധം ഗുണത്തേക്കാള്‍ ഏറെ ദോഷമാകും ചെയ്യുക.

വീട്ടില്‍ അടച്ചിട്ടിരിക്കാതെ ജനം ജോലിക്കു പോകണമെന്നാണു ഞാന്‍ പറയുന്നത് റിയോ ഡി ജനീറോയിലെ തെരുവില്‍ അനുയായികളെ ഒത്തുചേര്‍ത്ത് ബോള്‍സോനാരോ നടത്തിയ പ്രസ്താവനയാണിത്.സ്വന്തം ജനതയോട് തെല്ലും ഉത്തരവാദിത്തമില്ലാതെ ഒരു ഭരണാധികാരി വിളിച്ച് കൂവിയ വിഡ്ഢിത്തമാണ് ഇന്നദ്ദേഹത്തെ തിരിഞ്ഞു കൊത്തുന്നത്
ആമസോണ്‍ മഴക്കാടുകള്‍ക്ക് സമീപമുള്ള സെമിത്തേരിയില്‍ ശവപ്പെട്ടികള്‍ കൂട്ടമായി കുഴിച്ചു മൂടുന്ന ചിത്രങ്ങള്‍ വാര്‍ത്താ ഏജന്‍സികള്‍ കഴിഞ്ഞ ദിവസം പുറത്തുവിട്ടിരുന്നു. ആശുപത്രികളില്‍ ഐസിയുകളും വെന്റിലേറ്ററുകളുമില്ലാത്ത അവസ്ഥ. ജനങ്ങളുടെ വികാരം മനസിലാക്കാത്ത സോഷ്യോപാത്ത് രാജ്യം ഭരിക്കുമ്പോള്‍ രാജ്യം ശവപ്പറമ്പാകുമെന്നാണ് ബോള്‍സോനാരോയ്‌ക്കെതിരെ ഒരു രാജ്യാന്തര മാധ്യമം ഉന്നയിച്ച വിമര്‍ശനം.ബ്രസീലിലെ 27ല്‍ 24 ഗവര്‍ണര്‍മാരും പ്രസിഡന്റിനെ അനുസരിക്കില്ലെന്നു പരസ്യനിലപാട് കൂടി എടുത്തതോടെ വന്‍ രാഷ്ട്രീയ പ്രതിസന്ധിയും ബ്രസീലില്‍ ഉടലെടുത്തിരുന്നു