മോസ്‌കോയിലെ മൃഗശാലയില്‍ ഉണ്ടായിരുന്ന സാറ്റേണ്‍ എന്നു വിളിച്ചിരുന്ന ചീങ്കണ്ണി ചത്തു. 84 വയസ്സായിരുന്നു പ്രായം. കാട്ടിലെ ചീങ്കണ്ണികളുടെ ആയുസ്സ് സാധാരണ 50 വയസ്സാണ്. 

1936-ല്‍ അമേരിക്കയില്‍ ജനിച്ച ഈ ചീങ്കണ്ണിയെ ജര്‍മന്‍ ഏകാധിപതി അഡോള്‍ഫ് ഹിറ്റ്ലര്‍ വളര്‍ത്തിയിരുന്നതെന്നാണ് കരുതുന്നത്. ഒടുവില്‍ ജര്‍മനിയിലെ ബര്‍ലിനിലുള്ള മൃഗശാലയ്ക്കു കൊടുത്തതായാണു കഥ.

രണ്ടാം ലോകയുദ്ധത്തിനിടെ 1943-ല്‍ സഖ്യശക്തികള്‍ ബര്‍ലിനില്‍ ബോംബാക്രമണം നടത്തിയപ്പോള്‍ തകര്‍ന്ന മൃഗശാലയില്‍ നിന്നു പുറത്തിറങ്ങി അത് എങ്ങോട്ടോ രക്ഷപ്പെട്ടു.

3 വര്‍ഷം കഴിഞ്ഞു ബ്രിട്ടിഷ് സൈനികരുടെ കണ്ണില്‍ പെട്ടു. അവര്‍ അവനെ സോവിയറ്റ് യൂണിയനു കൈമാറിയതിനു ശേഷമാണു ഹിറ്റ്‌ലര്‍ വളര്‍ത്തിയ ചീങ്കണ്ണിയെന്ന പേരു വീണതും കഥകള്‍ പ്രചരിച്ചതും.