യുഎസില്‍ മൂന്നാം ദിവസവും തെരുവു പ്രക്ഷോഭം തുടരുന്നു. കറുത്ത വര്‍ഗക്കാരനായ ജോര്‍ജ് ഫ്‌ലോയ്ഡിനെ പൊലീസ് റോഡിലിട്ടു ശ്വാസംമുട്ടിച്ചു കൊന്നതില്‍ പ്രതിഷേധിച്ചാണ് പ്രക്ഷോഭങ്ങള്‍. മിനസോട്ടയുടെ തലസ്ഥാന നഗരമായ സെന്റ് പോളിലേക്കും സംഘര്‍ഷം വ്യാപിച്ചു. വംശീയ അതിക്രമത്തിനെതിരെ തുടരുന്ന പ്രതിഷേധങ്ങള്‍ക്കിടെ ബാങ്കുകളും കടകളും കുത്തിത്തുറന്നു കൊള്ളയടിച്ചു. പ്രതിഷേധ കേന്ദ്രമായ തേഡ് പ്രീസിന്‍ക്റ്റ് പൊലീസ് സ്റ്റേഷന്‍ കെട്ടിടത്തിനു പ്രക്ഷോഭകര്‍ തീയിട്ടു. ഇവിടെ നിന്നു പൊലീസുകാരെ നേരത്തെ ഒഴിപ്പിച്ചിരുന്നു.

വെള്ളിയാഴ്ച രാവിലെ പ്രക്ഷോഭം റിപ്പോര്‍ട്ട് ചെയ്യുന്നതിനിടെ സിഎന്‍എന്‍ റിപ്പോര്‍ട്ടര്‍ ഒമര്‍ ജിംനസിനെ പൊലീസ് അറസ്റ്റ് ചെയ്തു വിലങ്ങുവച്ചു കൊണ്ടുപോയി. സിഎന്‍എന്നിന്റെ മറ്റു 2 മാധ്യമപ്രവര്‍ത്തകര്‍ കൂടി അറസ്റ്റിലായിട്ടുണ്ട്. മിനിയപ്പലിസില്‍ റെയില്‍ ഗതാഗതവും ബസ് സര്‍വീസും ഞായറാഴ്ച വരെ നിര്‍ത്തിവച്ചു.

ജോര്‍ജ് ഫ്‌ലോയ്ഡ് എന്ന കറുത്ത വംശജനെ സൗത്ത് മിനിയപ്പലിസില്‍ പൊലീസ് നിലത്തുകിടത്തി കഴുത്തില്‍ കാല്‍മുട്ടമര്‍ത്തി കൊലപ്പെടുത്തിയത് തിങ്കളാഴ്ചയാണ്. പ്രക്ഷോഭകരെ അക്രമികള്‍ എന്നു വിശേഷിപ്പിച്ച യുഎസ് പ്രസിഡന്റ് ഡോണള്‍ഡ് ട്രംപ്, സംസ്ഥാനത്തു ഭരണനേതൃത്വമില്ലെന്നും വിമര്‍ശിച്ചു. സംസ്ഥാനം ആവശ്യപ്പെട്ടാല്‍ സൈന്യത്തെ ഇറക്കുമെന്നും ട്രംപ് ട്വീറ്റ് ചെയ്തു.

സമൂഹമാധ്യമങ്ങള്‍ക്കുള്ള പരിരക്ഷ നീക്കംചെയ്യാനുള്ള ഉത്തരവില്‍ ഒപ്പു വച്ചതിനു പിന്നാലെ പ്രസിഡന്റ് ഡോണള്‍ഡ് ട്രംപിന്റെ ട്വീറ്റ് ഫ്‌ലാഗ് ചെയ്തു മറച്ചു ട്വിറ്റര്‍. കറുത്ത വര്‍ഗക്കാരനായ ജോര്‍ജ് ഫ്‌ലോയ്ഡിന്റെ മരണത്തെത്തുടര്‍ന്നുണ്ടായ അക്രമങ്ങളെ പരാമര്‍ശിച്ച് 'കൊള്ള തുടങ്ങുമ്പോള്‍ വെടിവയ്പു തുടങ്ങും' എന്നവസാനിക്കുന്ന ട്വീറ്റാണ് അക്രമത്തെ മഹത്വവല്‍ക്കരിക്കുന്നു എന്നു ചൂണ്ടിക്കാട്ടി ഫ്‌ലാഗ് ചെയ്തത്. പ്രസിഡന്റിന്റെ നയലംഘനത്തെപ്പറ്റി മുന്നറിയിപ്പു നല്‍കിയ ട്വിറ്റര്‍, പൊതുതാല്‍പര്യം പരിഗണിച്ച് സന്ദേശം നീക്കം ചെയ്യുന്നില്ലെന്നും വ്യക്തമാക്കിയിട്ടുണ്ട്.

ഉപയോക്താക്കള്‍ പോസ്റ്റ് ചെയ്യുന്നതിന്റെയെല്ലാം ഉത്തരവാദിത്തം മാധ്യമത്തിനു മേല്‍ ചുമത്തുന്ന പുതിയ ഉത്തരവില്‍ പ്രസിഡന്റ് ഒപ്പുവച്ചത്,
യുഎസ് തിരഞ്ഞെടുപ്പിലെ മെയില്‍ ഇന്‍ വോട്ടുകള്‍ ക്രമക്കേടിനു കാരണമാകുമെന്നാരോപിക്കുന്ന 2 ട്വീറ്റുകള്‍ക്കടിയില്‍ കഴിഞ്ഞ ദിവസം ട്വിറ്റര്‍ ഫാക്ട് ചെക്ക് മുന്നറിയിപ്പ് നല്‍കിയതിനെ തുടര്‍ന്നാണ്.