ഇംഗ്ലണ്ടിലെ ക്ലീതോര്‍പ്‌സ് ബീച്ചില്‍ രണ്ടാം ലോകമഹായുദ്ധത്തില്‍ ഉപയോഗിച്ചതെന്ന് കരുതപ്പെടുന്ന ബ്രിസ്റ്റല്‍ ബ്യൂഫൈറ്റര്‍ ടി.എഫ്.എക്‌സ് യുദ്ധവിമാനത്തിന്റെ അവശിഷ്ടങ്ങള്‍ കണ്ടെത്തി. ബീച്ചില്‍ കഴിഞ്ഞ ദിവസം നടക്കാനിറങ്ങിയ ദമ്ബതികളാണ് മണലില്‍ എന്തോ കിടക്കുന്നത് കണ്ടത്.എന്നാല്‍ ഒറ്റനോട്ടത്തില്‍ അവശിഷ്ടം എന്താണെന്ന് കണ്ടെത്താന്‍ അവര്‍ക്ക് കഴിഞ്ഞിരുന്നില്ല. ഫോട്ടോകളെടുത്ത് നിരീക്ഷിച്ച് 45 മിനിറ്റുകള്‍ക്ക് ശേഷമാണ് വിമാനാവശിഷ്ടമാണ് ഇതെന്ന് കണ്ടെത്തിയത്. ബ്രിട്ടന്റെ റോയല്‍ എയര്‍ഫോഴ്‌സിന്റെ 254ാം സ്‌ക്വാഡണ്‍ ഉപയോഗിച്ചിരുന്ന ജെ.എം 333 എന്ന വിമാനമാണിതെന്ന് റോയല്‍ എയര്‍ഫോഴ്‌സ് മ്യൂസിയം അറിയിച്ചു. 1944 ഏപ്രില്‍ 21ന് ലിങ്കണ്‍ഷെയറില്‍ നിന്നും പറന്നുയര്‍ന്ന ഈ വിമാനം രണ്ട് എഞ്ചിനുകളും തകരാറിലായതോടെ തകര്‍ന്നു വീഴുകയായിരുന്നു. പൈലറ്റ് രക്ഷപ്പെട്ടിരുന്നുവെന്നാണ് രേഖകള്‍. ക്ലീതോര്‍പ്‌സ് ബീച്ചില്‍ ശക്തമായ വേലിയേറ്റമുണ്ടായതിനാല്‍ വിമാനാവശിഷ്ടങ്ങള്‍ കാണാനെന്ന പേരില്‍ ആരും എത്തരുതെന്ന് പൊലീസ് മുന്നറിയിപ്പ് നല്‍കിയിട്ടുണ്ട്.