ചൈന ഹോങ്കോങ്ങിലെ മനുഷ്യാവകാശങ്ങളും സ്വാതന്ത്ര്യമോഹങ്ങളും തല്ലിക്കെടുത്തിക്കൊണ്ടുള്ള സമീപനമാണ് സ്വീകരിക്കുന്നത്. ചൈനയുടെ കീഴില്‍ അര്‍ധ സ്വയംഭരണ പ്രദേശമായ ഹോങ്കോങ്ങില്‍ കടുത്ത നിയന്ത്രണങ്ങള്‍ ഏര്‍പ്പെടുത്തികൊണ്ടുള്ള വിവാദ സുരക്ഷാ നിയമത്തിന് പാര്‍ലമെന്റ് കഴിഞ്ഞ ദിവസം അംഗീകരം നല്‍കി. ഇതോടെ ജനങ്ങളുടെ എല്ലാ മൗലിക അവകാശങ്ങളും സര്‍ക്കാര്‍ കവര്‍ന്നെടുത്തു.

സുരക്ഷാ നിയമത്തിന് നാഷനല്‍ പീപ്പിള്‍സ് കോണ്‍ഗ്രസില്‍ നിയമത്തെ അനുകൂലിച്ച് 2,878 പേര്‍ വോട്ട് ചെയ്തു. ഇതോടെ അഞ്ചുമാസത്തിനുള്ളില്‍ നിയമം പ്രബല്യമാകും.ജനാധിപത്യത്തിനും കൂടുതല്‍ സ്വയംഭരണാവകാശത്തിനുമായി നടക്കുന്ന പ്രക്ഷോഭം പട്ടാള നടപടിയിലൂടെ അടിച്ചമര്‍ത്താനാണ് കമ്മ്യൂണിസ്റ്റ് ഭരണകൂടം ശ്രമിക്കുന്നതെന്നുള്ള റിപ്പോര്‍ട്ടുകളും പുറത്തുവന്നിട്ടുണ്ട്.

പുതിയ നിയമത്തിനെതിരെ കഴിഞ്ഞ ദിവസം ഹോങ്കോങ്ങില്‍ തുടങ്ങിയ പ്രതിഷേധം അക്രമാസക്തമായി. നഗരത്തിന്റെ പലയിടത്തും പ്രതിഷേധക്കാര്‍ പോലീസുമായി ഏറ്റുമുട്ടി. സംഘര്‍ഷത്തില്‍ നിരവധിപേര്‍ക്ക് പരിക്ക് ഏറ്റിട്ടുണ്ട്. ജനാധിപത്യം ആവശ്യപ്പെടുന്ന സമരക്കാര്‍ക്കെതിരെ പട്ടാള നടപടി സ്വീകരിക്കുമെന്ന സന്ദേശവും കമ്മ്യൂണിസ്റ്റ് സര്‍ക്കാര്‍ പുറത്തുവിട്ടിട്ടുണ്ട്. ജനാധിപത്യ പ്രതിഷേധങ്ങളെ അടിച്ചമര്‍ത്തുമെന്ന മുന്നറിയിപ്പും സര്‍ക്കാര്‍ നല്‍കി.

നേരത്തെ തന്നെ ഹോങ്കോങ്ങിലെ ജനാധിപത്യ പ്രക്ഷോഭങ്ങളെ അനുകൂലിക്കുന്ന അമേരിക്ക,ചൈനയുടെ പുതിയ നീക്കത്തോടും കടുത്ത എതിര്‍പ്പാണ് പ്രകടിപ്പിക്കുന്നത്. ഇ എതിര്‍പ്പ് യുഎന്നില്‍ പരസ്യമായി പ്രകടിപ്പിക്കുന്നതിനും അമേരിക്ക തയ്യാറായി, നിലവില്‍ തന്നെ അമേരിക്കയും ചൈനയും തമ്മിലുള്ള ബന്ധം കൊറോണ വൈറസ് വ്യാപനത്തെ ചൊല്ലി വഷളായിരിക്കുകയാണ്. അമേരിക്ക വിവാദ സുരക്ഷാ നിയമം ചര്‍ച്ച ചെയ്യുന്നതിന് യുഎന്‍ രക്ഷാ സമിതി യോഗം വിളിക്കണം എന്ന് ആവശ്യപെട്ടു. ചൈന ഇതിനോട് കടുത്ത എതിര്‍പ്പാണ് പ്രകടിപ്പിച്ചത്.ചൈനയെ പിന്തുണയ്ക്കുന്ന സമീപനം റഷ്യ സ്വീകരിക്കുകയും ചെയ്തു. അമേരിക്ക മാത്രമല്ല യുറോപ്യന്‍ യൂണിയനും ജപ്പാനും ഒക്കെ പുതിയ നിയമത്തെ ആശങ്കയോടെയാണ് കാണുന്നത്. പുതിയ നിയമത്തിലൂടെ ഹോങ്കോങ്ങിന്റെ സ്വയം ഭരണ പദവി നഷ്ടമായെന്ന് അമേരിക്ക പറയുന്നു. അതേസമയം ഹോങ്കോങ്ങില്‍ ചൈന വിരുദ്ധ പ്രക്ഷോഭം ശക്തി പ്രാപിക്കുകയാണ്.പല സ്ഥലത്തും പ്രതിഷേധക്കാരും സുരക്ഷാ സേനയുമായി ഏറ്റുമുട്ടുകയും ചെയ്തു. ചൈനയുടെ നിലപാടിനെ എതിര്‍ത്ത് കൊണ്ട് കഴിഞ്ഞ കുറേ നാളുകളായി ഹോങ്കോങ്ങില്‍ ജനങ്ങള്‍ പ്രക്ഷോഭം സംഘടിപ്പിക്കുകയാണ്. ഈ പ്രക്ഷോഭങ്ങള്‍ വിവാദ സുരക്ഷാ നിയമത്തിന് ചൈനീസ് പാര്‍ലമെന്റ് അംഗീകാരം നല്‍കിയതോടെ കൂടുതല്‍ തീവ്രമായിരിക്കുകയാണ്. ആയിരക്കണക്കിന് പേരാണ് ചൈന വിരുദ്ധ മുദ്രാവാക്യവുമായി ഹോങ്കോങ്ങിലെ തെരുവുകളില്‍ ഇറങ്ങിയത്. അമേരിക്ക പ്രക്ഷോഭകാരികളെ പിന്തുണയ്ക്കുന്ന സമീപനം സ്വീകരിക്കുന്നത് ചൈനയ്ക്ക് വലിയ തലവേദന സൃഷ്ടിച്ചിരിക്കുകയാണ്.