ജനങ്ങള്‍ക്കിടയില്‍ ഹിതപരിശോധന നടത്തി സ്വവര്‍ഗ വിവാഹത്തിന് അനുമതി നല്‍കിയ ആദ്യ രാജ്യമെന്ന ബഹുമതി അയര്‍ലണ്ടിന്. കത്തോലിക്കാ രാജ്യമായ അയര്‍ലണ്ടില്‍ സ്വവര്‍ഗവിവാഹം അനുവദിച്ചിരുന്നില്ല. എന്നാല്‍, ജനവികാരം എതിരാണെന്ന് മനസ്സിലായതോടെയാണ് സഭയുടെ അനുമതിയോടെ സര്‍ക്കാര്‍ ഹിതപരിശോധനയ്ക്ക് തയ്യാറായത്.
43 മണ്ഡലങ്ങളിലും സ്വവര്‍ഗ വിഭാഗക്കാര്‍ ഒന്നിക്കുന്നതിനോട് അനുകൂല അഭിപ്രായമാണ് ഉയര്‍ന്നത്. 61.1 ശതമാനം പേര്‍ യെസ് പറഞ്ഞു. കഴിഞ്ഞ രണ്ടു ദശാബ്ദത്തിന്‌ടെ അയര്‍ലണ്ടില്‍ ഒരു ഹിതപരിശോധനയ്ക്ക് ലഭിക്കുന്ന ഏറ്റവും വലിയ വോട്ട് വിഹിതമാണിത്.
ഹിതപരിശോധനാ ഫലം വന്നതോടെ, സ്വവര്‍ഗ വിവാഹത്തിനായി വാദിച്ച നൂറു കണക്കിനാളുകള്‍ ഡബ്ലിന്‍ കാസിലിലും മറ്റ് പ്രധാന സ്ഥലങ്ങളിലും ആഹ്ലാദപ്രകടനം നടത്തി. അയര്‍ലണ്ട് തുല്യതാ വകുപ്പ് മന്ത്രി ഓധാന്‍ ഒ റയര്‍ഡിയാന്‍ ഉള്‍പ്പെടെയുള്ളവര്‍ ഹിതപരിശോധനാ ഫലത്തെ അനുകൂലിച്ച് രംഗത്തെത്തുകയും ചെയ്തു. ഒട്ടേറെ സ്വവര്‍ഗാനുരാഗികള്‍ തെരുവില്‍ ചുംബിച്ചും കെട്ടിപ്പുണര്‍ന്നും ആഹ്ലാദം പങ്കിട്ടു.
രാജ്യത്തെ പ്രവിശ്യകളില്‍ ഒന്നൊഴികെ മറ്റെല്ലാം ഹിതപരിശോധനയില്‍ യെസ് വോട്ടുകള്‍ നല്‍കുകകായിരുന്നു. റോസ് കോമണ്‍ സൗത്ത് ലെയ്ട്രിം പ്രവിശ്യ മാത്രമാണ് സ്വവര്‍ഗ വിവാഹത്തെ അനുകൂലിക്കാതിരുന്നത്. അതും നേരീയ ഭൂരിപക്ഷത്തില്‍. 51.42 ശതമാനം പേര്‍ ഇവിടെ നോ പക്ഷത്ത് നിലയുറപ്പിച്ചു.
32 ലക്ഷത്തോളം വോട്ടര്‍മാരാണ് അയര്‍ലണ്ടിലുള്ളത്. ഇതില്‍ 19.5 ലക്ഷത്തോളം പേര്‍ വെള്ളിയാഴ്ചത്തെ ഹിതപരിശോധനയില്‍ പങ്കെടുത്തു. ഇതില്‍ 61 ശതമാനത്തോളം പേര്‍ യെസ് പക്ഷത്ത് വോട്ടുചെയ്തു. ഡബ്ലിന്‍ സൗത്തിലാണ് യെസ് പക്ഷത്തിന് ഏറ്റവും കൂടുതല്‍ വോട്ട് ലഭിച്ചത്. 75 ശതമാനം പേര്‍ സ്വവര്‍ഗ വിവാഹത്തെ അനുകൂലിച്ചു. വിദ്യാര്‍ത്ഥി യൂണിയനുകളും യുവജന സംഘടനകളും നടത്തിയ പ്രചാരണത്തിന്റെ ഫലമാണ് കത്തോലിക്കാ രാജ്യത്ത് സ്വവര്‍ഗ വിവാഹത്തിന് അനുമതി നേടിയെടുക്കുന്ന തലത്തിലേക്ക് ഹിതപരിശോധനാ ഫലത്തെ മാറ്റിയത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha