ഫേസ്ബുക്കില്‍ കണ്ടുമുട്ടിയ കാമുകിയെ തേടിപ്പോയ കാമുകന്‍ പാകിസ്ഥാനില്‍ കുടുങ്ങി; നാലു വര്‍ഷത്തിനു ശേഷം ഇന്ത്യയ്ക്ക് കൈമാറി
കഴിഞ്ഞ നാലു വര്‍ഷമായി പാകിസ്ഥാനില്‍ തടവിലായിരുന്ന ഹൈദരാബാദ് സ്വദേശിയെ ഇന്ത്യയ്ക്ക് കൈമാറി. കാമുകിയെ തേടിപ്പോയ സോഫ്റ്റ് വെയര്‍ എഞ്ചിനീയറായ പ്രശാന്ത് എന്ന യുവാവിനെയാണ് വാഗാ അതിര്‍ത്തിയില്‍ വച്ച്‌ പാകിസ്ഥാന്‍ അധികൃതര്‍ ഇന്ത്യയ്ക്ക് കൈമാറിയത്. പ്രശാന്ത് ഇന്ന് ഉച്ചയോടെ ഹൈദരാബാദിലെ സ്വന്തം വീട്ടിലെത്തി. 2017 ഏപ്രിലിലാണ് പ്രശാന്തിനെ കാണാതായത്. 30 മാസത്തിന് ശേഷമാണ് മകന്‍ പാകിസ്ഥാനില്‍ പിടിയിലാണെന്ന വിവരം കുടുംബാംഗങ്ങള്‍ മനസ്സിലാക്കിയത്.
തുടര്‍ന്ന് പ്രശാന്തിന്റെ പിതാവ് ബാബു റാവു സൈബരാബാദ് പൊലീസ് കമ്മീഷണര്‍ വി സി സജ്ജനാറിനെ കാണുകയും മകന്റെ തടങ്കലിനെക്കുറിച്ച്‌ അറിയിക്കുകയും സഹായം തേടുകയും ചെയ്തു. പ്രശാന്തിനെ കാണാതായ വിവരം സജ്ജനാര്‍ വിദേശകാര്യ മന്ത്രാലയത്തെയും ഇമിഗ്രേഷന്‍ അധികൃതരെയും അറിയിച്ചു.
പ്രശാന്ത് ഫേസ്ബുക്കില്‍ കണ്ടുമുട്ടിയ ഒരു പെണ്‍കുട്ടിയുമായി പ്രണയത്തിലായിരുന്നുവെന്നും ഈ പെണ്‍കുട്ടി സ്വിറ്റ്സര്‍ലന്‍ഡിലേക്ക് പോയപ്പോള്‍ ഇയാള്‍ വിഷാദത്തില്‍ ആയിരുന്നുവെന്നുമാണ് ഇമിഗ്രേഷന്‍ അധികൃതരില്‍ നിന്ന് ലഭിച്ച വിവരം. എന്നാല്‍, പ്രശാന്തിന് പെണ്‍കുട്ടിയോടുള്ള പ്രണയം പെണ്‍കുട്ടിക്ക് തിരിച്ച്‌ പ്രശാന്തിനോട് ഇല്ലായിരുന്നുവെന്നും അധികൃതര്‍ പറഞ്ഞു.
ഇന്ത്യയില്‍ നിന്ന് പാകിസ്ഥാന്‍, ഇറാന്‍, തുര്‍ക്കി വഴി യൂറോപ്പിലേക്ക് പ്രവേശിക്കാനായിരിക്കും പ്രശാന്ത് തീരുമാനിച്ചതെന്നും സ്വിറ്റ്‌സര്‍ലന്‍ഡിലേക്കുള്ള ഏറ്റവും കുറഞ്ഞ ദൂരമായിരിക്കാം തിരഞ്ഞെടുത്തിരിക്കുന്നതെന്നും ഇമിഗ്രേഷന്‍ അധികൃതര്‍ പറഞ്ഞു.
എന്നാല്‍, ഇന്ത്യയില്‍ നിന്ന് വിസയും പാസ്‌പോര്‍ട്ടും ഇല്ലാതെ പാകിസ്ഥാന്‍ അതിര്‍ത്തി കടന്ന പ്രശാന്തിനെ പാകിസ്ഥാന്‍ അധികൃതര്‍ പിടികൂടുകയായിരുന്നു. ഇരു രാജ്യങ്ങളുടെയും ഇമിഗ്രേഷന്‍, വിദേശകാര്യ അധികൃതരുമായി കൂടിയാലോചിച്ച ശേഷമാണ് പ്രശാന്തിനെ വിട്ടയച്ചത്.
സോഷ്യല്‍ മീഡിയയിലൂടെ സുഹൃത്തായ യുവാവിനെ കാണാന്‍ നേപ്പാളില്‍ നിന്നും മധ്യപ്രദേശിലേക്ക് യാത്ര ചെയ്ത് പതിനാറുകാരിയുടെ വാര്‍ത്ത കഴിഞ്ഞ വര്‍ഷം മാധ്യമങ്ങളില്‍ റിപ്പോര്‍ട്ട് ചെയ്തിരുന്നു. ഫേസ്ബുക്കിലൂടെ പരിചയപ്പെട്ട മധ്യപ്രദേശ് സ്വദേശിയായ ഇരുപതുകാരനെ തേടിയാണ് പെണ്‍കുട്ടി എത്തിയത്.
മൂന്ന് വര്‍ഷം മുമ്പാണ് ഇരുവരും പരിചയപ്പെട്ടത്. കാഠ്മണ്ഡു സ്വദേശിയായ പതിനാറു വയസ്സുള്ള പെണ്‍കുട്ടി വിമാന മാര്‍ഗം ഇന്ത്യയിലെത്തി നിരവധി നാടുകളിലൂടെ ബസില്‍ യാത്ര ചെയ്താണ് ഒടുവില്‍ മധ്യപ്രദേശില്‍ എത്തിയത്.
മധ്യപ്രദേശിലെ സെഹോര്‍ ജില്ലയിലുള്ള ആഷ്ത ടൗണിലാണ് യുവാവ് താമസിച്ചിരുന്നത്. ഇവിടെ മെഡിക്കല്‍ സ്റ്റോറില്‍ ജീവനക്കാരനായിരുന്നു ഇയാള്‍. യുവാവിനെ അറിയിക്കാതെയാണ് പെണ്‍കുട്ടി ഇത്ര ദൂരം യാത്ര ചെയ്ത് എത്തിയത്. പെണ്‍കുട്ടിയെ കണ്ട് അമ്പരന്ന യുവാവ് പൊലീസിനെ വിവരം അറിയിക്കുകയായിരുന്നു.
വിവരം അറിഞ്ഞെത്തിയ പൊലീസ് പെണ്‍കുട്ടിയെ ഭോപ്പാലിലെ ശിശുക്ഷേമ സമിതിക്ക് കൈമാറി. കോവിഡ് പരിശോധനയ്ക്ക് വിധേയമാക്കിയ ശേഷം പെണ്‍കുട്ടിയെ ശിശുക്ഷേമസമിതി നേപ്പാളിലേക്ക് തിരിച്ചയച്ചു.
ഫേസ്ബുക്കിലൂടെ പരിചയപ്പെട്ട പതിനാലുകാരിയായ പെണ്‍കുട്ടിയെ കാണാന്‍ അര്‍ദ്ധരാത്രി വീട്ടിലെത്തിയ യുവാവിന്റെ വാര്‍ത്തയും മാധ്യമങ്ങളില്‍ ഇടം നേടിയിരുന്നു. തിരുവനന്തപുരത്തു നിന്ന് പ്രതി ബൈക്കിലാണ് പെണ്‍കുട്ടിയുടെ നാട്ടിലെത്തിയത്. പെണ്‍കുട്ടിയുടെ വീട്ടുകാരുടെ പരാതിയില്‍ ഇയാള്‍ക്ക് എതിരെ കേസ് എടുത്തിരുന്നു.
https://www.facebook.com/Malayalivartha
