ഇന്ത്യ കൊറോണയുടെ രണ്ടാം തരംഗം എന്ന വലിയ പ്രതിസന്ധിയില്‍ അകപ്പെട്ട് നീറുമ്പോഴും കട്ട സപ്പോര്‍ട്ട് നല്‍കി റഷ്യ കൂടെ നില്‍ക്കുകയാണ്. ഈ ആപത്തില്‍ നിന്ന് കരകയറാന്‍ ആവശ്യമായ എല്ലാ സഹായങ്ങളും ഒരു ഉറ്റ സുഹൃത്ത് എന്ന നിലയ്ക്ക് റഷ്യ ഇന്ത്യയ്ക്കുവേണ്ടി ചെയ്യുന്നുണ്ട്.

ബ്രിക്സ് ഉച്ചകോടിയുടെ ഭാഗമായി നടന്ന യോഗത്തിന് ശേഷം റഷ്യന്‍ വിദേശകാര്യമന്ത്രി സെര്‍ജി ലാവ്‌റോവ് കഴിഞ്ഞദിവസം ഇക്കാര്യം വ്യക്തമാക്കിയിരുന്നു. ഇന്ത്യയുമായി റഷ്യയുണ്ടാക്കിയ പ്രതിരോധ കരാറുമായി മുന്നോട്ട് പോകുമെന്നും അദ്ദേഹം പറഞ്ഞു.

കൊറോണ വൈറസ് വ്യാപനം തടയാന്‍ ഇന്ത്യയ്ക്ക് പൂര്‍ണ പിന്തുണ അറിയിക്കുന്നുവെന്നും ഇതിന്റെ ഭാഗമായി കൊറോണ പ്രതിരോധ മരുന്നായ സ്പുട്നിക് വിയുടെ പുതിയ ബാച്ച് ഇന്ത്യയിലേക്ക് അയച്ചുവെന്നും അവര്‍ അറിയിച്ചിരിക്കുകയാണ്. കൂടുതല്‍ സഹായങ്ങള്‍ ഇനിയും നല്‍കുമെന്നും ലവ്റോവ് വ്യക്തമാക്കി.

എസ്-400 പ്രതിരോധ സംവിധാനങ്ങള്‍ക്കായി ഇന്ത്യയുമായി ഉണ്ടാക്കിയ കരാറില്‍ നിന്നും റഷ്യ പിന്നോട്ടില്ല. കരാറുമായി മുന്നോട്ട് പോകാന്‍ തയ്യാറാണെന്ന കാര്യം ഇന്ത്യ ഒരിക്കല്‍ കൂടി സ്ഥിരീകരിക്കണമെന്നും അദ്ദേഹം പറഞ്ഞു. 2018 ല്‍ റഷ്യന്‍ പ്രസിഡന്റ് വ്ളാഡിമര്‍ പുടിന്റെ ഇന്ത്യ സന്ദര്‍ശനത്തിനിടെയായിരുന്നു ഇരു രാജ്യങ്ങളും കരാറിലേര്‍പ്പെട്ടത്.

നേരത്തെ സ്പുട്‌നിക് ഢ വാക്‌സിന്‍ പ്രാദേശികമായി നിര്‍മിക്കാനുള്ള സാങ്കേതികവിദ്യ ഇന്ത്യയ്ക്ക് കൈമാറാന്‍ റഷ്യ സന്നദ്ധത അറിയിച്ചിരുന്നു. വാക്‌സിന്‍ ഡോസുകളുടെ ആവശ്യകത ഉയരുന്ന സാഹചര്യത്തിലാണ് പുതിയ തീരുമാനം ഇന്ത്യ കൈക്കൊണ്ടിരിക്കുന്നത്.

ഓഗസ്റ്റ് മുതല്‍ വാക്‌സിന്‍ ഇന്ത്യയില്‍ ഉത്പാദനം ആരംഭിക്കുമെന്ന് റഷ്യയിലെ ഇന്ത്യന്‍ പ്രതിനിധി ഡി.ബി വെങ്കടേഷ് വര്‍മ്മ വ്യക്തമാക്കി. ലോകത്തെ മൊത്തം സ്പുട്‌നിക് ഢ വാക്‌സിനുകളില്‍ 65-70% ഇന്ത്യയിലാണ് നിര്‍മ്മിക്കുന്നത്. മെയ് അവസാനത്തോടെ 30 ലക്ഷത്തിലധികം ഡോസുകള്‍ വിതരണം ചെയ്യും. ജൂണില്‍ ഇത് 50 ലക്ഷമായി ഉയര്‍ത്തുമെന്നും അദ്ദേഹം വ്യക്തമാക്കി.

തുടക്കത്തില്‍ 85 കോടി ഡോസ് വാക്‌സിന്‍ ഇന്ത്യയില്‍ ഉത്പാദിപ്പിക്കാനാണ് പദ്ധതിയെന്ന് വര്‍മ്മ പറഞ്ഞു . റഷ്യന്‍ വാക്‌സിന്‍ നിര്‍മ്മാതാക്കള്‍ ഇന്ത്യയിലെ ഡോ. റെഡ്ഡീസ് ലാബുമായി സഹകരിച്ച് ഇതിനകം രണ്ട് ലക്ഷത്തിലധികം ഡോസുകള്‍ ഇന്ത്യയ്ക്ക് നല്‍കി കഴിഞ്ഞിരിക്കുകയാണ്.

''സ്പുട്‌നിക് ആദ്യം 1,50,000 ഡോസും പിന്നീട് 60,000 ഡോസും ഇന്ത്യയ്ക്ക് നല്‍കിയിട്ടുണ്ട്, മെയ് അവസാനത്തോടെ 30 ലക്ഷം ഡോസുകള്‍ കൂടി വിതരണം ചെയ്യുവാന്‍ ഒരുങ്ങുകയാണ്. ഇവ ഇന്ത്യയില്‍ വെച്ചാണ് നിറയ്ക്കുക. ജൂണോടെ ഇത് 50 ലക്ഷമായി വര്‍ധിപ്പിക്കും. അതിനു ശേഷം ഓഗസ്റ്റോടെ ഇന്ത്യയില്‍ ഉത്പാദനവും ആരംഭിക്കുമെന്ന് വര്‍മ്മ പറഞ്ഞു.