പറഞ്ഞ വാക്കിന് വില നൽകില്ലെന്ന് വീണ്ടും തെളിയിച്ചിരിക്കുകയാണ് താലിബാൻ. ദോഹയിലുണ്ടാക്കിയ ധാരണ താലിബാന്‍ ലംഘിച്ചുവെന്ന് സര്‍വ്വകക്ഷി യോഗത്തില്‍ കേന്ദ്ര സര്‍ക്കാര്‍. ഇന്ത്യ അഫ്ഗാന്‍ ജനതയ്ക്കൊപ്പമാണെന്നും വിദേശകാര്യമന്ത്രി പറഞ്ഞു. 'താലിബാന്‍ കാബൂള്‍ പിടിച്ചെടുത്തത് സായുധ മാര്‍ഗ്ഗത്തിലൂടെയാണ്, ഇത് ദോഹ ധാരണയ്ക്ക് വിരുദ്ധമാണ്'- എസ് ജയശങ്കര്‍ സര്‍വ്വകക്ഷിയോഗത്തില്‍ പറഞ്ഞു.

ഇന്ന് 20 ഇന്ത്യക്കാരെ താലിബാന്‍ തടഞ്ഞുവെന്നും വിദേശകാര്യമന്ത്രി പറയുന്നു. ഇവരെ വിമാനത്താവളത്തിലെത്താന്‍ അനുവദിച്ചില്ല. പത്തു കിലോമീറ്ററില്‍ 15 ചെക്ക് പോസ്റ്റുകളാണ് താലിബാന്‍ ഉണ്ടാക്കിയിട്ടുള്ളത്. അഫ്ഗാനിസ്ഥാനില്‍ നിന്നുള്ള രക്ഷാദൗത്യം വിശദീകരിക്കാനാണ് കേന്ദ്രം സര്‍വ്വകക്ഷി യോഗം വിളിച്ചത്.