കാര്യങ്ങള്‍ മാറിമറിഞ്ഞു... യുഎസ് നാറ്റോ സഖ്യം ചൊവ്വാഴ്ച അഫ്ഗാന്‍ വിടാന്‍ ഒരുങ്ങവേ കാബൂള്‍ വിമാനത്താവളം താലിബാന്‍ നിയന്ത്രണത്തില്‍; കാബൂള്‍ വിമാനത്താവളത്തിനു സമീപം അമേരിക്കന്‍ സിഐഎയുടെ താവളമായ ഈഗിള്‍ ബേസ് നിയന്ത്രിത സ്‌ഫോടനത്തിലൂടെ യുഎസ് സേന തകര്‍ത്തു
29 AUGUST 2021 10:11 AM IST
മലയാളി വാര്‍ത്ത
ഒഴിപ്പിക്കല്‍ ദൗത്യം മിക്കവാറും രാജ്യങ്ങള്‍ പൂര്‍ത്തിയാക്കി. ഒരുലക്ഷത്തിലേറെപ്പേരെ ഒഴിപ്പിച്ച യുഎസ് ദൗത്യവും അവസാനഘട്ടത്തിലേക്കു നീങ്ങി. നാലായിരത്തില്‍ താഴെ യുഎസ് സൈനികര്‍ മാത്രമാണ് ഇനി വിമാനത്താവളത്തിലുള്ളത്. അഫ്ഗാന്‍ ബ്രിട്ടിഷ് പൗരന്മാരെ വഹിച്ചുകൊണ്ടുള്ള യുകെയുടെ അവസാന വിമാനം ഇന്നലെ കാബൂള്‍ വിട്ടു. രണ്ടാഴ്ചയ്ക്കിടെ സ്വന്തം പൗരന്മാര്‍ അടക്കം 15,000 പേരെയാണു യുകെ ഒഴിപ്പിച്ചത്. മിക്കവാറും രാജ്യങ്ങള്‍ക്കും എല്ലാ പൗരന്മാരെയും ഒഴിപ്പിക്കാനായില്ലെന്നാണു വിവരം.
31നു മുന്‍പ് വീണ്ടും ഭീകരാക്രമണത്തിനുള്ള സാധ്യത ശക്തമാണെന്നാണ് യുഎസ് സുരക്ഷാ അധികൃതര്‍ നല്‍കുന്ന മുന്നറിയിപ്പ്. യുഎസ് ദൗത്യത്തിലെ ഏറ്റവും അപകടകരമായ സന്ദര്‍ഭമാണു വരുന്ന ദിവസങ്ങളെന്നും വൈറ്റ് ഹൗസ് വ്യക്തമാക്കി. വൈറ്റ് ഹൗസില്‍ യുഎസ് പ്രസിഡന്റ് ജോ ബൈഡന്റെ അധ്യക്ഷതയില്‍ നടന്ന അടിയന്തര സുരക്ഷാ യോഗത്തില്‍ സേനയിലെ ഉന്നത കമാന്‍ഡര്‍മാരും പങ്കെടുത്തു.
അതിനിടെ, കാബൂള്‍ രാജ്യാന്തര വിമാനത്താവളത്തിന്റെ നടത്തിപ്പിനു സാങ്കേതിക സഹായം തേടി താലിബാന്‍ ഖത്തറിനെ സമീപിച്ചു. നിലവില്‍ വിമാനത്താവളത്തിന്റെ നടത്തിപ്പു ചുമതല തുര്‍ക്കിസേനയ്ക്കാണ്. ചൊവ്വാഴ്ച നാറ്റോ സേന രാജ്യം വിടുന്നതോടെ തുര്‍ക്കിയുടെ സേവനം അവസാനിക്കും. തുര്‍ക്കിയുടെ സഹായം തുടര്‍ന്നും വേണമെന്നു താലിബാന്‍ അഭ്യര്‍ഥിച്ചെങ്കിലും തുടരാനാവില്ലെന്ന മറുപടിയാണു ലഭിച്ചത്.
കാബൂള്‍ വിമാനത്താവളത്തിനു സമീപം സിഐഎയുടെ താവളമായ ഈഗിള്‍ ബേസ് നിയന്ത്രിത സ്‌ഫോടനത്തിലൂടെ യുഎസ് സേന തകര്‍ത്തു. ചൊവ്വാഴ്ച യുഎസ് സേന രാജ്യം വിട്ടുകഴിഞ്ഞാല്‍ താവളത്തിലെ ഉപകരണങ്ങളോ രേഖകളോ താലിബാന്റെ കയ്യിലെത്തുന്നതു തടയാനാണു തകര്‍ത്തത്. ഇഷ്ടിക ഫാക്ടറിയായിരുന്ന സ്ഥലമാണു 20 വര്‍ഷം മുന്‍പ് സിഐഎ മുഖ്യ പ്രവര്‍ത്തന കേന്ദ്രമാക്കി മാറ്റിയത്. ഇവിടെ അഫ്ഗാന്‍ ഏജന്‍സികള്‍ക്കു പരിശീലനവും നല്‍കിയിരുന്നു.
അതേസമയം പണപ്രതിസന്ധി നേരിടുന്ന അഫ്ഗാനിസ്ഥാനില്‍ ബാങ്കിനു മുന്നില്‍ ജനങ്ങളുടെ പ്രതിഷേധം. നൂറുകണക്കിനാളുകളാണു എടിഎം കൗണ്ടറുകള്‍ക്കു മുന്നില്‍ വരിനിന്നത്. കടുത്ത വരള്‍ച്ച നേരിടുന്ന അഫ്ഗാനിസ്ഥാനില്‍ ലക്ഷങ്ങള്‍ പട്ടിണിയിലേക്കു നീങ്ങുകയാണെന്ന് യുഎന്‍ ഏജന്‍സി വേള്‍ഡ് ഫുഡ് പ്രോഗ്രാം മുന്നറിയിപ്പു നല്‍കി.
പാശ്ചാത്യരാജ്യങ്ങളുടെ പിന്തുണയോടെയുള്ള രാജ്യാന്തര സന്നദ്ധ സംഘടനകളുടെ സഹായപദ്ധതികള്‍ താലിബാന്‍ അധികാരത്തിലേറിയതിനു പിന്നാലെ നിലച്ചതാണ് അഫ്ഗാന്‍ നേരിടുന്ന പ്രധാന പ്രതിസന്ധി. "
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെ ഫേസ്‌ബുക്ക്‌ പേജ് LIKE ചെയ്യുക
https://www.facebook.com/Malayalivartha
https://www.facebook.com/Malayalivartha
