ലോകത്തിലെ ഏറ്റവും ശുദ്ധമായ വികാരങ്ങളില്‍ ഒന്നാണ് ഒരമ്മയ്ക്ക് തന്റെ കുഞ്ഞിനോടുള്ള സ്നേഹവും വാത്സല്യവും. ആ സ്നേഹം സംരക്ഷിക്കുന്നതിനായി ഏതറ്റം വരെ പോകാനും ഒരമ്മ തയ്യാറായേക്കും. കുഞ്ഞിന്റെ സുരക്ഷയ്ക്ക് വേണ്ടി ജീവന്‍ പണയം വെയ്ക്കാന്‍ വരെ തയ്യാറാകുന്ന അമ്മമാര്‍ നമുക്കിടയിലുണ്ട്.

അതിന്റെ ഉത്തമ ദൃഷ്ടാന്തമാണ് ഈ കാലിഫോര്‍ണിയന്‍ വനിതയുടെ ജീവിതത്തിലുണ്ടായ അനുഭവം. അഞ്ച് വയസായ തന്റെ മകനെ ആക്രമിച്ച മൗണ്ടന്‍ ലയണിനെ നഗ്നമായ കൈകള്‍ കൊണ്ട് എതിരിടാന്‍ ഈ അമ്മയ്ക്ക് രണ്ടാമത് ആലോചിക്കേണ്ടി വന്നില്ല. വീടിന്റെ മുന്‍വശത്തെ മുറ്റത്ത് വെച്ചാണ് അവര്‍ക്ക് കുഞ്ഞിനെ രക്ഷിക്കാനുള്ള വ്യഗ്രതയില്‍ ഈ വന്യ ജീവിയുമായി മല്ല യുദ്ധത്തില്‍ ഏര്‍പ്പെടേണ്ടി വന്നത്.

കാലിഫോര്‍ണിയ ഡിപ്പാര്‍ട്ട്മെന്റ് ഓഫ് ഫിഷ് ആന്‍ഡ് വൈല്‍ഡ്‌ ലൈഫ് പുറത്തിറക്കിയ പ്രസ്താവന പ്രകാരം, ഈ അമ്മയുടെയും കുഞ്ഞിന്റെയും വീടിന്റെ മുറ്റത്ത് പ്രവേശിച്ച മൗണ്ടന്‍ ലയണ്‍ 45 അടിയോളം ദൂരം മകനെ വലിച്ചിഴച്ചതായി ദി ഗാര്‍ഡിയന്‍ റിപ്പോര്‍ട്ട് ചെയ്യുന്നു. ഇത് കണ്ട ഉടനെ അമ്മ രണ്ടാമതൊന്ന് ചിന്തിക്കാതെ ആ വന്യ മൃഗത്തിന് മേലെ ചാടി വീഴുകയായിരുന്നു. മാര്‍ജാര വര്‍ഗത്തില്‍പ്പെടുന്ന വലിയ ജീവികളില്‍ ഒന്നാണ് മൗണ്ടന്‍ ലയണ്‍ അഥവാ പൂമ.

മൗണ്ടന്‍ ലയണിന്റെ പിടിയില്‍ നിന്ന് മകനെ രക്ഷിച്ചതിനോടൊപ്പം അതിനെ തന്റെ വീടിന് പുറത്തേക്ക് ഭയപ്പെടുത്തി ഓടിക്കാനും ആ അമ്മയ്ക്ക് കഴിഞ്ഞു. വന്യ മൃഗത്തിന്റെ ഭീഷണി ഒഴിവായതോടെ ആ സ്ത്രീയും ഭര്‍ത്താവും ചേര്‍ന്ന് മകനെ ഒരു പ്രാദേശിക ആശുപത്രിയില്‍ എത്തിക്കുകയായിരുന്നു. അവിടത്തെ ജീവനക്കാര്‍ ഉണ്ടായ സംഭവത്തെക്കുറിച്ച്‌ അധികൃതരെ അറിയിച്ചു.

കുട്ടിയ്ക്ക് തലയിലും ഉടലിലുമായി സാരമായ പരിക്ക് പറ്റിയിട്ടുണ്ട്. എന്നാല്‍, നിലവില്‍ കുട്ടിയുടെ ആരോഗ്യ നില തൃപ്തികരണമാണെന്ന് ആശുപത്രി ജീവനക്കാര്‍ അറിയിക്കുന്നു. ഇതിനിടെ ഒരു സംഘം അധികൃതര്‍ പ്രസ്തുത വനിതയുടെ വീട്ടിലെത്തുകയും അവിടെ ചെടികള്‍ക്കിടയില്‍ മറഞ്ഞിരിക്കുന്ന മൗണ്ടന്‍ ലയണിനെ കണ്ടെത്തുകയും ചെയ്തു.

ആ പ്രദേശത്ത് താമസിക്കുന്ന ജനങ്ങളുടെ സുരക്ഷ കണക്കിലെടുത്ത് അധികൃതര്‍ ആ ജീവിയെ വെടിവെച്ചു കൊന്നു. പിന്നീട് നടത്തിയ ഡി എന്‍ എ പരിശോധനയില്‍ ഈ മൃഗം തന്നെയാണ് കുട്ടിയെ ആക്രമിച്ചതെന്ന് തെളിഞ്ഞു.

തെരച്ചിലിനിടെ മറ്റൊരു മൗണ്ടന്‍ ലയണിനെ കൂടി അധികൃതര്‍ കണ്ടെത്തിയിരുന്നു. എന്നാല്‍, ഈ ആക്രമണത്തില്‍ പങ്കില്ലെന്ന് തെളിഞ്ഞതോടെ അതിനെ അവര്‍ തുറന്നുവിട്ടു. സമാനമായ മറ്റൊരു സംഭവവും കാലിഫോര്‍ണിയയില്‍ നിന്ന് റിപ്പോര്‍ട്ട് ചെയ്തിട്ടുണ്ട്. തന്റെ വീട്ടു വളപ്പില്‍ പ്രവേശിച്ച ഒരു കാട്ടു കരടിയെയും രണ്ടു കരടിക്കുഞ്ഞുങ്ങളെയുമാണ് ഒരു സ്ത്രീയ്ക്ക് നേരിടേണ്ടി വന്നത്.

തന്റെ വളര്‍ത്തു നായകളെ രക്ഷിയ്ക്കാന്‍ ആ സ്ത്രീ കരടികളെ വീടിന്റെ അതിര്‍ത്തി മതിലിന് പുറത്തേക്ക് തള്ളിനീക്കുന്ന കാഴ്ച സി സി ടി വി ദൃശ്യങ്ങളില്‍ വ്യക്തമാണ്. തുടര്‍ന്ന് അവര്‍ ഞൊടിയിടയില്‍ വളര്‍ത്തു പട്ടികളെയും കൊണ്ട് വീടിനകത്തേക്ക് കയറിപ്പോകുന്നതും കാണാം.