അഫ്​ഗാനിസ്​താനില്‍ അരക്ഷിതാവസ്ഥ തുടരവേ ആദ്യമായി ചര്‍ച്ച നടത്തി ഇന്ത്യ. ഖത്തറില്‍ വെച്ചായിരുന്നു ഇന്ത്യ-താലിബാന്‍ നിര്‍ണായക ചര്‍ച്ച നടന്നത്​. ഇന്ത്യന്‍ അംബാസിഡര്‍ ദീപക്​ മിത്തലും താലിബാന്‍ നേതാവ്​ ഷെര്‍ മുഹമ്മദ്​ അബ്ബാസ്​ സ്തനേഷായിയും തമ്മിലായിരുന്നു ചര്‍ച്ച. സുരക്ഷ, അഫ്​ഗാനില്‍ നിന്നുള്ള ഇന്ത്യക്കാരുടെ മടങ്ങിവരവ്​ എന്നിവയെകുറിച്ചായിരുന്നു ചർച്ച.

അഫ്​ഗാന്‍ മണ്ണ്​ തീവ്രവാദികള്‍ ഉപയോഗിക്കാനുള്ള സാധ്യതയില്‍ ഇന്ത്യ തങ്ങളുടെ ആശങ്കയും വ്യക്തമാക്കി. അഫ്​ഗാനില്‍ നിന്ന്​ മടങ്ങാന്‍ ആഗ്രഹിക്കുന്ന ന്യൂനപക്ഷങ്ങള്‍ക്ക്​ അതിനുള്ള അവസരമുണ്ടാവണമെന്നും ഇന്ത്യ ആവശ്യപ്പെട്ടു​. താലിബാന്‍റെ ഭാഗത്ത്​ നിന്നും ഇക്കാര്യങ്ങളില്‍ ക്രിയാത്​മകമായ പ്രതികരണമാണ്​​ ഉണ്ടായതെന്നും വിദേശകാര്യമന്ത്രാലയം പുറത്തിറക്കിയ പ്രസ്​താവനയില്‍ പറയുന്നു.

ഇന്ത്യയുമായി നല്ല ബന്ധമാണ്​ ആഗ്രഹിക്കുന്നതെന്ന്​ താലിബാന്‍ നേരത്തെ പറഞ്ഞിരുന്നു. താലിബാന്‍ വക്​താവ്​ സബിഹുല്ല​ മുജാഹിദ്​ ഇക്കാര്യം പറയുകയും ചെയ്​തിരുന്നു. ഇതിന്​ പിന്നാലെയാണ്​ താലിബാനുമായി ഇന്ത്യ ചർച്ചയ്ക്ക് തയ്യാറായത്.