സുരക്ഷാ കാരണങ്ങളാൽ വാട്സ് ആപ്പ് ഉപയോഗിക്കുന്നതിൽ നിന്ന് സൈനികരെ വിലക്കി സ്വിറ്റ്സർലന്റ്. വാട്സ് ആപ് കൂടാതെ സിഗ്നൽ, ടെലഗ്രാം എന്നിവയുടെ ഉപയോഗത്തിനും സ്വിസ് സൈന്യം വിലക്കേർപ്പെടുത്തി. ഇതിന് പകരമായി ത്രീമ എന്ന സ്വദേശി മെസേജിംഗ് സംവിധാനം ഉപയോഗിക്കാനാണ് നിർദേശം.

യുഎസ് ക്ലൗഡ് ആക്റ്റ് അനുസരിച്ച് യുഎസിന്റെ നിയമ പരിധിയില്‍ പെടുന്ന കമ്പനികള്‍ ശേഖരിക്കുന്ന ഡാറ്റ അമേരിക്കന്‍ അധികൃതര്‍ക്ക് ലഭ്യമാക്കാന്‍ സാധിക്കുമെന്നതാണ് പുതിയ തീരുമാനത്തിന് പിന്നിൽ.

യൂറോപ്യൻ യൂണിയന്റെ ജിഡിപിആർ നിയമങ്ങൾ പാലിച്ചാണ് ത്രീമ പ്രവർത്തിക്കുന്നത്. അതിനാൽ തന്നെ ഈ ആപ്പിന് അമേരിക്കൻ നിയമങ്ങൾ ബാധകമാവില്ല. സ്വിറ്റ്സർലന്റിൽ 16-64 വയസുവരെയുള്ള പ്രായക്കാർക്കിടയിൽ വലിയ ജനപ്രീതിയുള്ള മെസേജിങ് ആപ്ലിക്കേഷനാണ് വാട്സ് ആപ്. വിദേശ മൊബൈൽ ആപ്ലിക്കേഷനുകൾ സൈനികർ ഉപയോഗിക്കുന്നതിൽ സുരക്ഷ പ്രശ്നങ്ങൾ ഉണ്ടെന്ന ആശങ്ക ഇന്ത്യയുൾപ്പെടെ നിരവധി രാജ്യങ്ങൾ പ്രകടിപ്പിച്ചിട്ടുണ്ട്.

2020 ൽ നിരവധി ചൈനീസ് ആപ്ലിക്കേഷനുകൾക്ക് രാജ്യവ്യാപകമായി നിരോധനം ഏർപ്പെടുത്തിയതിനൊപ്പം ഫേസ്ബുക്ക്,സൂം, ഇൻസ്റ്റഗ്രാം പോലുള്ള ആപ്ലിക്കേഷനുകൾ ഫോണിൽ നിന്ന് നീക്കം ചെയ്യണമെന്ന് സൈനികർക്ക് ഇന്ത്യ നിർദ്ദേശം നൽകിയിരുന്നു.

സൈനികർക്ക് വേണ്ടി മാത്രമായി ആർമി സെക്യൂർ ഇൻഡീജിനസ് മെസേജിങ് ആപ്ലിക്കേഷൻ (അസിഗ്മ) എന്ന പേരിൽ ഒരു മെസേജിങ് ആപ്ലിക്കേഷനും ഇന്ത്യൻ സൈന്യം പുറത്തിറക്കിയിട്ടുണ്ട്. സൈനികരുടെ ആഭ്യന്തര നെറ്റ്‌വർക്കിൽ ഉപയോഗിക്കുന്ന മൊബൈൽ ഫോണുകളിൽ മാത്രമുപയോഗിക്കാനാണ് ഈ സേവനം.

അതേസമയം നവംബറിൽ 17 ലക്ഷം ഇന്ത്യൻ അക്കൗണ്ടുകൾ നിരോധിച്ചതായി വാട്സ് ആപ്പ് അറിയിച്ചിരുന്നു. ഇക്കാലത്ത് 602 ഓളം പരാതികൾ ലഭിച്ചതായും വാട്സ് ആപ് പറഞ്ഞു. ഇതിലൂടെ വാട്സ് ആപ്പിന്റെ ദുരുപയോഗം തടയുകയാണ് ലക്ഷ്യമെന്ന് വാട്സ് ആപ്പ് വക്താവ് അറിയിച്ചു.