റഷ്യ ഉക്രെയ്ന്‍ യുദ്ധത്തിനിടെ ലോകത്തെ വിറപ്പിച്ച് പുടിന്‍. 20ാം തിയതി ബുധനാഴ്ചയാണ് ലോകത്തെ നടുക്കുന്നൊരു നീക്കം റഷ്യയുടെ ഭാഗത്തുനിന്നും ഉണ്ടായത്. അമേരിക്കയും നാറ്റോയും എന്ത് ചെയ്യണമെന്ന് അറിയാതെ ഇപ്പോള്‍ പകച്ച് നില്‍ക്കുകയാണ്. ഈ നിര്‍ണായക വേളയില്‍ അത് റഷ്യയുടെ ഒരു ശക്തിപ്രകടനം കൂടിയായി മാറുകയാണ്. മറ്റൊന്നുമല്ല പുതിയൊരു ഭൂഖണ്ഡാന്തര ബാലിസ്റ്റിക് മിസൈല്‍ തൊടുത്തിരിക്കുകയാണ് റഷ്യ ഇതൊരു സാധാരണ ഭൂഖണ്ഡാനന്തര ബാലിസ്റ്റിക് മിസൈല്‍ വിക്ഷേപണമല്ല. ഒറ്റ പ്രഹരത്തില്‍ 15 ആണവ പോര്‍മുനകള്‍ വരെ തൊടുക്കാന്‍ കഴിയുന്ന മിസൈല്‍ സംവിധാനമാണ് റഷ്യ തൊടുത്തിരിക്കുന്നത്. ആര്‍എസ് 28 സാര്‍മാറ്റ് എന്ന ഈ മിസൈല്‍ സംവിധാനം നാറ്റോയുടെയും യുഎസിന്റെയും ഉറക്കം കെടുത്തിയിരിക്കുകയാണ്. ഈ മിസൈലുകളെ പ്രതിരോധിക്കാന്‍ ഇന്നേവരെ ലോകത്തെ ഒരു രാജ്യവും പ്രതിരോധ സംവിധാനം കണ്ടുപിടിച്ചിട്ടില്ലെന്നുള്ളതാണ് വസ്തുത. 10 ടണ്ണോളമാണ് ഇതിന്റെ മൊത്തം വാഹകശേഷി. യുഎസിന്റെ വിഖ്യാത ഐസിബിഎം ആയ എല്‍ജിഎം 30 മിനിറ്റ്മാനെ എല്ലാ രീതിയിലും നിഷ്പ്രഭമാക്കുന്ന മിസൈലാണ് സാര്‍മാറ്റെന്നാണ് യുദ്ധവിദഗ്ധരുടെ വിലയിരുത്തല്‍. റഷ്യ ഇനി എന്തു ചെയ്താലും തിരിച്ച് അവരെ ആക്രമിക്കണോ വേണ്ടയോ എന്ന് അമേരിക്കയെ 'രണ്ടുവട്ടം ചിന്തിക്കാന്‍' പ്രേരിപ്പിക്കുന്നൊരു ആയുധമാണ് റഷ്യ ഇപ്പോള്‍ വിക്ഷേപിച്ചിരിക്കുന്നത്.

വടക്കന്‍ റഷ്യയിലെ പ്ലെസെറ്റ്‌സ്‌ക് വിക്ഷേപണ കേന്ദ്രത്തില്‍ നിന്നാണ് സര്‍മാറ്റ് ഭൂഖണ്ഡാനന്തര ബാലിസ്റ്റിക് മിസൈല്‍ സംവിധാനം വിക്ഷേപിച്ചതെന്ന് റഷ്യന്‍ പ്രതിരോധ മന്ത്രാലയം പ്രസ്താവനയില്‍ അറിയിച്ചിട്ടുണ്ട്. റഷ്യന്‍ മിസൈലുകളില്‍ ഏറ്റവും കരുത്തുറ്റതും ലോകത്തിലെ ഏറ്റവും നശീകരണശേഷിയുള്ള ഭൂഖണ്ഡാന്തര മിസൈലെന്നാണ് ഇതിനം വിശേഷിപ്പിക്കുന്നത്. രാജ്യത്തിന്റെ വടക്കുകിഴക്കന്‍ മേഖലയായ പ്ലെസെറ്റ്‌സ്‌കില്‍ നിന്നാണു മിസൈല്‍ വിജയകരമായി പരീക്ഷിച്ചത്. ദീര്‍ഘനാളുകളായി വികസനഘട്ടത്തിലുണ്ടായിരുന്ന ഈ മിസൈല്‍ ഇതുവരെ റഷ്യന്‍ സേനയുടെ ഭാഗമായിരുന്നില്ല. എന്നാല്‍ ഇ പരീക്ഷണത്തോടെ ലോകം മുഴുവന്‍ വിറങ്ങലിച്ച് നില്‍ക്കുകയാണ്. ബുധനാഴ്ച ഈ ദൗത്യത്തില്‍ പങ്കാളികളായ മുഴുവന്‍ ഉദ്യോഗസ്ഥരെയും റഷ്യന്‍ പ്രസിഡന്റ് അഭിനന്ദിച്ചു. പുടിന്റെ അഭിപ്രായത്തില്‍, സര്‍മാറ്റ് മിസൈലിന് വിദേശ അനലോഗ് ഇല്ലാത്തതുകൊണ്ടുതന്നെ ഏത് മിസൈല്‍ പ്രതിരോധത്തെയും തുളച്ചുകയറാന്‍ കഴിയുന്നതാണ്.

'യഥാര്‍ത്ഥത്തില്‍ ഈ അതുല്യമായ ആയുധം നമ്മുടെ സായുധ സേനയുടെ പോരാട്ട ശേഷി ശക്തിപ്പെടുത്തുമെന്നും, ബാഹ്യ ഭീഷണികളില്‍ നിന്ന് റഷ്യയുടെ സുരക്ഷ വിശ്വസനീയമാം വിധം ഉറപ്പാക്കുമെന്നും, ഉഗ്രമായ ആക്രമണാത്മക സ്‌ഫോടന ചൂടില്‍ നമ്മുടെ രാജ്യത്തെ ഭീഷണിപ്പെടുത്താന്‍ ശ്രമിക്കുന്നവര്‍ ഇനി രണ്ടുതവണ ചിന്തിക്കും എന്നാണ് വിക്ഷേപണ ശേഷം പുടിന്‍ പറഞ്ഞത്

ഉക്രെയ്‌നിനെതിരായ നടപടിക്ക് വേണ്ടി മോസ്‌കോയുടെ ആയുധവ്യവസായങ്ങളെ ലക്ഷ്യമിടാനുള്ള പാശ്ചാത്യ രാജ്യങ്ങളുടെയും യൂറോപ്യന്‍ യൂണിയന്റെയും നീക്കത്തിന്റെ ഭാഗമായി ഏര്‍പ്പെടുത്തിയ ഉപരോധങ്ങളെ വെല്ലുവിളിച്ചുകൊണ്ടാണ് പുടിന്റെ പുതിയ നീക്കം. ആഭ്യന്തര ഘടകങ്ങളില്‍ നിന്നുമാത്രമാണ് പുതിയ മിസൈല്‍ നിര്‍മ്മിച്ചിരിക്കുന്നതെന്ന് വ്യക്തമാക്കിയ അദ്ദേഹം. ലോകത്തെ ഒരു രാജ്യത്തിന്റെ പിന്തുണയും ഇല്ലാതെ ആയുധങ്ങള്‍ അതും ലോകത്തെ ഏറ്റവും മികച്ച ആണവായുധം തന്നെ നിര്‍മിക്കാന്‍ കഴിയും എന്നുകൂടി തെളിയിച്ചിരിക്കുകയാണ് പുടിന്‍.

അതേസമയം റഷ്യയുടെ മിസൈല്‍ വിക്ഷേപണത്തെക്കുറിച്ചും പടിഞ്ഞാറിനെ ഭീഷണിപ്പെടുത്താനുള്ള സാധ്യതയെക്കുറിച്ചും പെന്റഗണ്‍ പ്രസ് സെക്രട്ടറി ജോണ്‍ കിര്‍ബിയോട് ചോദിച്ചപ്പോള്‍, മിസൈലിന്റെ സവിശേഷതകളെ കുറിച്ചുള്ള പുടിന്റെ അവകാശവാദങ്ങള്‍ തെറ്റാണെന്നായിരുന്നു കിര്‍ബിയുടെ പ്രതികരണം. എന്നാല്‍ വിക്ഷേപണത്തെക്കുറിച്ച് മോസ്‌കോ ഇതിനകം യുഎസിനെ അറിയിച്ചിട്ടുണ്ടെന്നും അദേഹം കൂട്ടിച്ചേര്‍ത്തു.

'ഇത്തരം പരീക്ഷണങ്ങള്‍ പതിവാണെന്നും. അതൊരു അത്ഭുതമൊന്നുമല്ലെന്നും. പരീക്ഷണം അമേരിക്കയ്‌ക്കോ സഖ്യകക്ഷികള്‍ക്കോ ഭീഷണിയാണെന്ന് ഞങ്ങള്‍ കരുതുന്നില്ലെന്നുമായിരുന്നു, എന്നാല്‍ പുറമേ ഭയം കാണിക്കുന്നില്ലെങ്കിലും അമേരിക്കയെ ഒന്നടങ്കം വിറപ്പിക്കുന്നൊരായുധം തന്നെയാണ് റഷ്യയുടേത് എന്നാണ് യുദ്ധ വിദഗ്ദരൊന്നടങ്കം പറയുന്നത്.