എത്രയൊക്കെ കിട്ടിയാലും പഠിക്കില്ലാ എന്ന് വെച്ചാല്‍ പിന്നെ എന്താ ചെയ്യാ അല്ലേ? പറഞ്ഞുവരുന്നത് ചൈനയെന്ന മഹാരാജ്യത്തെ കുറിച്ചാണ്. കൊവിഡ് കേസുകളും ലോക്ക്ഡൗണും ഒക്കെ രാജ്യത്തെ തളര്‍ത്തിയിട്ടും ഇപ്പോഴും അതിനുള്ള അവസരങ്ങള്‍ ഉണ്ടാക്കിക്കൊണ്ടിരിക്കുകയാണ്.

നേരത്തെ മുതല്‍ നിരവധി വിവവാദങ്ങളിലൂടെ മറ്റ് രാജ്യങ്ങളെ അമ്പരപ്പിച്ച രാജ്യം, ഇപ്പോള്‍ ലിച്ചി ആന്‍ഡ് ഡോഗ് മീറ്റ് ഫെസ്റ്റിവല്‍ എന്ന വിവാദമായ പരിപാടി സംഘടിപ്പിക്കാനുള്ള നീക്കത്തിലാണ്. പേരുപോലെ തന്നെ പട്ടിയിറച്ചി തന്നെയാണ് ഫെസ്റ്റിവെല്ലിന് കൊഴുപ്പേകുന്നത്.

അടുത്താഴ്ചയാണ് തെക്കന്‍ ചൈനയില്‍ വിയറ്റ്‌നാം അതിര്‍ത്തിയ്ക്ക് സമീപം ഗ്വാംഗ്ഷി പ്രവിശ്യയിലെ യൂലിന്‍ നഗരത്തില്‍ ' ലിച്ചി ആന്‍ഡ് ഡോഗ് മീറ്റ് ഫെസ്റ്റിവല്‍ ' നടക്കുന്നത്. എല്ലാവര്‍ഷവും ചൈനയില്‍ ഈ ഫെസ്റ്റ് നടത്താറുണ്ട്. എന്നാല്‍ കൊവിഡ് കേസുകള്‍ വര്‍ധിക്കുമ്പോള്‍ എന്തിനാണ് ആയിരക്കണക്കിന് ആളുകള്‍ പങ്കെടുക്കുന്ന പരിപാടി സംഘടിപ്പിക്കുന്നത് എന്ന ചോദ്യമാണ് വിവാദത്തിന് വഴിവെച്ചിരിക്കുന്നത്.

ചൈനയെ സംബന്ധിച്ചിടത്തോളം കൊവിഡ് കേസുകള്‍ ദിനം പ്രതിവര്‍ധിച്ചുവരുന്ന പശ്ചാത്തലമാണുള്ളത്. അതുകൊണ്ട് തന്നെ ഷാങ്ഹായിയില്‍ വീണ്ടും ലോക്ഡൗണ്‍ പ്രഖ്യാപിച്ചിരുന്നു. ജൂണ്‍ നാലിനാണ് രണ്ടാഴ്ച നീളുന്ന ലോക്ഡൗണ്‍ പ്രഖ്യാപിച്ചത്. നഗരത്തിലെ ജിന്‍ഗാന്‍, പുഡോംഗ് മേഖലയിലായിരുന്നു ലോക്ഡൗണ്‍ ഉണ്ടായിരുന്നത്. കാര്യങ്ങള്‍ ഇങ്ങനെ മുന്നോട്ട് പോകുമ്പോഴാണ് വീണ്ടും കൊവിഡ് വര്‍ധനക്ക് സാധ്യതയുണ്ടാക്കുന്ന തരത്തില്‍ ചൈനീസ് അധികൃതര്‍ നീങ്ങുന്നത്. മാത്രമല്ല ഇത്തവണ നിയന്ത്രണങ്ങളില്ലാതെ ഇത്തരത്തില്‍ ഫെസ്റ്റിവെല്‍ സംഘടിപ്പിച്ചാല്‍ കൊവിഡ് കേസ് കുതിച്ച് പൊങ്ങും എന്ന് വിദഗ്ദരും മുന്നറിയിപ്പ് നല്‍കിയിട്ടുണ്ട്.

കൊവിഡ് ആശങ്ക മാത്രമല്ല നായക്കളെ കൊല്ലുന്നതും ഇവിടെ വിവാദത്തിന് വഴിമരുന്നിട്ടിട്ടുണ്ട്. നായയിറച്ചി ഫെസ്റ്റിവെല്ലില്‍ ഉള്‍പ്പെടുത്തുന്നതിനെതിരെ പ്രാദേശിക, അന്താരാഷ്ട്ര മൃഗ സംരക്ഷണ സംഘടനകള്‍ രംഗത്ത് വന്നിട്ടുണ്ടെന്നാണ് വിവരം. കഴിഞ്ഞ വര്‍ഷവും ഇത്തരത്തിലുള്ള പ്രതിഷേധങ്ങള്‍ മൃഗ സംരക്ഷണ സംഘടനകള്‍ ഉന്നയിച്ചിരുന്നു. തുടര്‍ന്ന് ഇറച്ചിയ്ക്കായി എത്തിച്ച ഏതാനും ജീവനുള്ള നായകളെ ആക്ടിവിസ്റ്റുകള്‍ രക്ഷിച്ചിരുന്നു.

മൃഗങ്ങളോടുള്ള ക്രൂരത അവസാനിപ്പിക്കണമെന്നാണ് ആക്ടിവിസ്റ്റുകള്‍ ചൈനീസ് ഭരണകൂടത്തോട് ആവശ്യപ്പെടുന്നത്. 2010ലാണ് യൂലിന്‍ ഡോഗ് ഫെസ്റ്റ് ആരംഭിച്ചത്. ചൈനയിലെ ഗ്വാങ്‌സിയിലെ യുലിനില്‍, എല്ലാവര്‍ഷവും ജൂണിലാണ് ഈ ഫെസ്റ്റ് ആഘോഷിക്കുന്നത്. 10 ദിവസമാണ് ഫെസ്റ്റ് നീണ്ടുനില്‍ക്കുന്നത്.

പ്രതിവര്‍ഷം ഏകദേശം 10,000 നായകളെ വരെ ഫെസ്റ്റിവലിന്റെ ഭാഗമായി കൊന്നിട്ടുണ്ടെന്നാണ് കണക്ക്. 2020ല്‍ ചൈനയിലെ കാര്‍ഷിക, ഗ്രാമകാര്യ മന്ത്രാലയം പുറത്തുവിട്ട കരട് നയത്തില്‍ നായയെ ആഹാരത്തിനായുള്ള വളര്‍ത്തുമൃഗത്തിന് പകരം' പ്രത്യേക സഹയാത്രികരായ മൃഗ'മെന്നാണ് ഉള്‍പ്പെടുത്തിയിരുന്നത്. എന്നാല്‍ ഈ നയത്തിന് നിയമത്തിന്റെ പൂര്‍ണ പിന്തുണയില്ല. കൂടാതെ അതേ വര്‍ഷം തന്നെ, ഷെന്‍സന്‍ നഗരത്തില്‍ നടത്തിയ സര്‍വേയില്‍ നായ ഇറച്ചി നിരോധിക്കണമെന്ന ആവശ്യത്തെ 75 ശതമാനം പേര്‍ അനുകൂലിച്ചിരുന്നതായും റിപ്പോര്‍ട്ടുണ്ട്.

അതേസമയം സാധാണ പന്നിയിറച്ചിയും പോത്തിറച്ചിയും കഴിക്കുന്നതില്‍ നിന്ന് വ്യത്യസ്തമല്ല പട്ടിയെ തിന്നുന്നത്. അതുകൊണ്ട് നായ്ക്കളെ കൊല്ലുന്നതില്‍ വിഷമിക്കേണ്ടതില്ലെന്നാണ് ഫെസ്റ്റിവെല്‍ സംഘടിപ്പിക്കുന്നവര്‍ വാദിക്കുന്നത്. ഹ്യൂമേന്‍ സൊസൈറ്റി ഒഫ് ഇന്റര്‍നാഷണലിന്റെ കണക്കനുസരിച്ച് 30 ദശലക്ഷം നായകളെയാണ് ലോകമെമ്പാടും ഇറച്ചിയ്ക്കായി പ്രതിവര്‍ഷം കൊല്ലുന്നത്.

അതേസമയം ചൈനയിലെ ഈ ഫെസ്റ്റിവെല്ലില്‍ നായയുടെ മാത്രമല്ല പൂച്ചകളുടെ ഇറച്ചിയും ലിച്ചി പഴങ്ങളും ഉള്‍പ്പെടുത്താറുണ്ട്.