റഷ്യയേയും, ഇപ്പോള്‍ റഷ്യയുടെ അധിനിവേശത്തിലുള്ളക്രീമിയയേയും തമ്മില്‍ ബന്ധിപ്പിക്കുന്ന കൂറ്റന്‍ പാലം തകര്‍ക്കുമെന്ന് മുന്നറിയിപ്പുമായി യുക്രെയിനിലെ മുതിര്‍ന്ന സൈനികോദ്യോഗസ്ഥന്‍. പാശ്ചാത്യ ശക്തികള്‍ നല്‍കിയ ദീര്‍ഘദൂര മിസൈലുകള്‍ ഉപയോഗിച്ച് പാലം തകര്‍ക്കുമെന്ന് ഇക്കഴിഞ്ഞ ബുധനാഴ്ച്ചയായിരുന്നു മേജര്‍ ജനറല്‍ഡിമിത്രോ മാര്‍ചെന്‍കോ പറഞ്ഞത്.

പുടിന്റെ അധിനിവേശ സേനക്കെതിരെയുള്ള പോരാട്ടത്തില്‍, യുക്രെയിന്റെ കൃത്യവും നിയമപരവുമായ ഒരു ലക്ഷ്യമാണ് ആ പാലം എന്നും അദ്ദേഹം കൂട്ടിച്ചേര്‍ത്തു. റഷ്യന്‍ സൈനികര്‍ക്ക് തെക്കന്‍ മേഖലയിലേക്ക് ആവശ്യസാധനങ്ങളും മറ്റും എത്തിച്ചു നല്‍കുന്നതില്‍ വളരെ സുപ്രധാനമായ ഒരു പങ്കാണ് ഈ പാലം വഹിക്കുനന്ത്. 2.7 ബില്യണ്‍ പൗണ്ട് ചെലവിട്ട് നിര്‍മ്മിച്ച ഈ പാലം തകര്‍ത്താല്‍ പിന്നെ തെക്കന്‍ മേഖലയില്‍ റഷ്യയുടെ നിലനില്‍പ് തന്നെ അപകടത്തിലാകും. പാശ്ചാത്യ ശക്തികളോട് ആവശ്യപ്പെട്ട ആയുധങ്ങള്‍ എത്തിയാല്‍ എപ്പോള്‍ ആക്രമണം തുടങ്ങും എന്ന ചോദ്യത്തിനു മറുപടിയായിട്ടായിരുന്നു, ആദ്യ ലക്ഷ്യം ആ പാലമാണെന്ന് മേജര്‍ ജനറല്‍ പറഞ്ഞത്. പാശ്ചാത്യ ശക്തികളോട് കൂടുതല്‍ ആയുധങ്ങള്‍ നല്‍കി സഹായിക്കണമെന്ന് ഉക്രെയിന്‍ ആവശ്യപ്പെട്ടിട്ടുണ്ട്. കൊടുതല്‍ മെച്ചപ്പെട്ട ആയുധങ്ങള്‍ ഇല്ലാതെ റഷ്യയുടെ ആയുധ ശക്തിക്ക് മുന്‍പില്‍ ഏറെനാള്‍ പിടിച്ചു നില്‍ക്കാനാവില്ലെന്നും യുക്രെയിന്‍ വ്യക്തമാക്കുകയൂണ്ടായി.

2014ല്‍ ക്രീമിയ പിടിച്ചെടുത്ത റഷ്യ 2018ല്‍ ആയിരുന്നു കെര്‍ക്ക് കടലിടുക്കിന്റെ മുകളിലൂടെയുള്ള ഈ പാലം പണി പൂര്‍ത്തിയാക്കിയത്. കരിങ്കടല്‍ മേഖലയിലെ സൈനികര്‍ക്ക് ആവശ്യമായ സാധനങ്ങളും ആയുധങ്ങളും എത്തിക്കുന്നത് ഈ പാലം വഴിയാണ്. 2022 ഫെബ്രുവരി 24 ന് യുദ്ധം ആരംഭിച്ചപ്പോള്‍ ഈ പാലം തന്നെയായിരുന്നു ആക്രമണത്തിനുള്ള ലോഞ്ച് പാഡായി ഉപയോഗിച്ചത്. പാലം റഷ്യന്‍ സൈനികര്‍ അതീവ സുരക്ഷിതമാക്കി സംരക്ഷിക്കുന്നുണ്ടെന്നായിരുന്നു യുക്രെയിന്‍ മേജറിന്റെ വാക്കുകള്‍ക്കുള്ള റഷ്യന്‍ പ്രതികരണം.

റഷ്യയുടെ പ്രതികരണം വന്നതിനു തൊട്ടുപിന്നാലെ ഈ പാലത്തിന്റെ വിശദമായ ഒരു ബ്ലൂപ്രിന്റ് ഇറക്കി, പാലത്തിന്റെ കാര്യം തങ്ങള്‍ ഗൗരവമായി പരിഗണിക്കുന്നുണ്ടെന്ന് വ്യക്തമാക്കി. അതിനിടയില്‍ കരിങ്കടലില്‍ തന്ത്രപ്രധാനമായ സ്ഥലത്ത് സ്ഥിതിചെയ്യുന്ന ഒരു ദ്വീപിലേക്ക് വ്യോമ പ്രതിരോധ സംവിധാനങ്ങളുമായി പോയ റഷ്യയുടെ ഒരു നാവിക യാനം തകര്‍ത്തതായി യുക്രെയിന്‍ അവകാശപ്പെട്ടു.